Josua 11 - Labrador Inuttitut Heritage Bible

Attanit nunab Kanaanib avane nunaᴋartut illagêlerput Israelitit akkerartoromavlugit, salagijaulutiglo. Josuab salaᴋarningit.

¹ Jabinib Hazorib attanertangata tamanna tussaramiuk tilliklerpok Jobabemut, Madonib attannertanganut, Simroniblo attannertanganut, Achsafiblo attannertanganut,

² Attannernullo avane ᴋaᴋᴋane nunaᴋalauktunut, naternamelo Cinerotib seᴋᴋerngane, naksanelo, Nafot Doremelo imarbiub sanniane nunaᴋalauktunut.

³ Kanaaniterit kittanetut kangianetullo Amoriterit, Hetiterillo, Feresiterillo, Jebusiterillo ᴋaᴋᴋane, taimaktauk Heviterit ᴋaᴋᴋab Hermonemik attiggub umangane nuname Mizpamik attelingme.

⁴ Tapkoa illunatik aularput sorsuktuksaksoaᴋotitik kattimgajut illunaita illagilugit, innugasaksuit, siorkatitut imarbiub siksanganêtutitut unnuktigijut, horsillo aksalloaggillo unnuktovaksuit.

⁵ Attannit tapkoa illunatik kattimalerput ᴋailutiglo tangmarput kattimgavlutik tetserme Meromemik attelingme, Israelitit sorsugvigijomavlugit.

⁶ Nalegarlo Josuamut oᴋarpok: Sivorajutiginiarnagit, ᴋaupalle nalliutome tamattomane illunaita ullimarsimalutik unnertutigijomavakka Israelib ᴋittornganginut; horseᴋotingit sibvêtitaksarivattit, ᴋamuteᴋotingillo aksalloaggit ikkomamut ikkitaksarivattit.

⁷ Josuablo suerganit tikkipait, innugasaksuillo sorsuktuksat illagilugit tetserme Meroneme, opingarpaillo.

⁸ Nalekablo tunnivait Israelitit agganginut, ullimarpaillo kemâtilaitalo Zidon angijok tikkidlugo, imiksuillo onartut tikkidlugit, Mizpiblo sania tikkilugo kittâne ullimarpaillo amiakoᴋarungnaiᴋârtinago tapkonangat.

⁹ Tagva Josuab pinniarvigivait, sorlo Nalekab oᴋautilaungmago, horseᴋotingillo sibvêtipait aksalloaliᴋotingillo ikkipait.

¹⁰ Utterlunelo nalliutome taipsomane, Hazorelo salagivait attannertangallo ullimarpa saviksoarmut (Hazorle sivorngagut attaniovît tamakkoa iglugasaksoanginit anginerpaulaukpok.)

¹¹ Tarnillo illunaita tapkonanêlauktut ullimarpait saviksub kênanganut nungupaillo, amiakoᴋarᴋojingilarlo nallianik anernelingmik, ikkipaillo Hazor ikkomamut.

¹² Tappilugillo attannit tapkoa iglugasaksoangit illunaita attannertangit illaliudlugit Josuab salagivait, ullimarlaitalo saviksub kênanganut, nungutipaillo, sorlo Mosese Nalekab kivganga perᴋojilaungmat.

¹³ Israelible ᴋittorngangita iglugasaksuit ᴋaᴋᴋarulangnelauktut ikkilaungilait, Hazorele kissata Josuab ikkipait.

¹⁴ Iglugasaksuillo tamakkoa aksartaujutigijangit, nergjutillo Israelib ᴋittorngangita avikpait ingmingnut; innuille illunaita ullimarpait saviksub ᴋênanganut nungutsiᴋârtinagit tapkoninga, amiakoᴋarᴋojilaungilallo nallianik anernelingmik.

¹⁵ Sorlo Nalekab Mosese kivgane, Mosesiblo Josua perᴋolaungmago, taimak Josua pinniarlaukpok, pinniartaililaungilarlo sunamik Nalekab perᴋolauktanganik Mosesemut.

¹⁶ Taimak Josuab nuna tamanna illunat ᴋaᴋᴋanetok aksarnigariva, illunâllo aunga illingajok, nunalo Gosen illunat, naksallo, naternallo, Israeliblo ᴋaᴋᴋamaringit, naksangit illaliudlugit.

¹⁷ ᴋaᴋᴋamit avititsijomit nunamik takpaunga Seiremit, Baal Gade tikkilugo ᴋaᴋᴋab Libanonib sanianetok ᴋaᴋᴋab Hermonib attâne. Attaningit illunaita salagivait ullimarlaitalo, toᴋᴋolugillo.

¹⁸ Akkunêrtomigle attanit tapkoa unatadlarvigivait.

¹⁹ Iglugasaksoaᴋalaungilarle attautsemiglonêt, ullapirsauteᴋaromavlutik tunnijunik ingminik Israelib ᴋittornganginut, (Heviterit Gibeoneme nunakalauktut assinginik) illunaitale sorsungnermut salagivait.

²⁰ Tamannalo taimak Nalekamit pilaukpok omattingit mangaititauᴋovlugit, sorsuklutik Israelib ᴋittorngangit pârlugit, nungutauᴋovlugit, saimanermiglo pilerᴋonagit, pêjartauᴋovlugillo, sorlo Nalekab Mosese perᴋolaungmago.

²¹ Nalliutome taipsomane Josuab tikkilunelo Enakiterit (innukpait) pêjarpait ᴋaᴋᴋamit, Hebronemit, Debiremit, Anabemit, Judab ᴋaᴋᴋanginit tamainit, Israeliblo ᴋaᴋᴋamaringinit, nungutipaillo iglugasaksoangit illaliudlugit.

²² Amiakoᴋarᴋojilaungilarlo Enakiterinik Israelib ᴋittorngangita nunangane, kissiane Gasame, Gathemelo, Asdodemelo amiakoᴋalaukpok sulle.

²³ Taimak Josuab nuna illunât aksarnigariva, taimamarik sorlo Nalekab Mosese oᴋautilaungmago, tunnivalo Israelitinut kingormgutijaksauvlune tapkonunga, kinguvarêt illunatik attunit ikkupianganik. Nunamelo unnatadlarnaᴋarungnailaukpok.