Josua 10 - Labrador Inuttitut Heritage Bible

Josuab salaᴋarninganik tattamnadlartomik Amoriterinik.

¹ Adoni Zedek Jerusalemib attanertanga tussarame Josuab Ai sâlagilaungmagit nungutilaungmagillo, Ailo, attanertanga illaliudlugo pinniarvigilaungmagit, sorlo Jericho attanertangalo piniarvigilaungmagit, Gibeonemiullo ullapirsauteᴋarᴋattigêngnermik pilaungmatta Israelitinut, tapkoalo akkornganut pilaungmatta,

² Sivoradlalerput (Gibeon iglugasaksoangolaungmatta angijunik, iglugasaksoatitut attaneliktutitut, anginersaulaukporlo Aiemit angutingillo illunatik sorsugungnarlaukput.)

³ Tilliklerporlo Hohamemut, Hebronib attanertanganut, Pireamemullo Jarmutib attanertanganut, Jafiamullo Lachisib attanertanganut, Debiremullo Eglonib attanertanganut, oᴋautsauᴋolugillo:

⁴ Majorarluse ᴋaititse takpaunga uvamnut ikkajorsingalo Gibeonemik ullimarniᴋovluta; Josuamut Israeliblo ᴋittornganginut ullapirsauteᴋarᴋattigêngnermik pilaungmatta.

⁵ Tagva kattimalerput majorarlutiglo Amoriterit attanningit tallimat, tagva Jerusalemib attanertanga, Hebronib attanertanga, Jarmutib attanertanga, Lachisib attanertanga, Egloniblo attanertanga, sorsuktuksaksoaᴋotitik illagilugit Gibeonelo illuvat sorsugvigilugillo.

⁶ Gibeonemiullo tilliklerput Josuamut tangmarvingmut Gilgalemut, oᴋautsauᴋovallo: Aggaktit erkitiniarnagit kivgarnit, majorarlutillo ᴋaisarit uvaptingnut, piulilutalo ikkajortigut; Amoriterit attaningit ᴋaᴋᴋane nunaᴋartut illunatik illagêlermatta akkerartorvigiluta.

⁷ Josua Gilgalemit takpaungarpok, sorsuktuksello illunatik illagivat, angutillo illunatik sorsugungnartut.

⁸ Nalegarlo Josuamut oᴋarpok: Sivoraginiarnagit aggangnut tunimagapkit; nalliellonêt tapkonangat nangerungnarniangilak sângne.

⁹ Taimak Josuab suerganit tikkipait, unuak nâlugo majorarmat Gilgalemit.

¹⁰ Nalekable erksitipait Israelitit sangane, ullimarniᴋovlugit unnatadlarnermik angijomik Gibeoneme, udlapaillo apᴋome Bet-Horonemut torartome, ullimarpaillo Aseka Makedalo tikkilugik.

¹¹ Israelitillo ᴋemângmagit attersarlutik apᴋome Bet-Horonemut, Nalekab kattagvioᴋovait ᴋillangmit nattarᴋonâlungnik Aseka tikkilugo, toᴋᴋolerᴋovlugit. Unuktunniglo toᴋᴋotaujoᴋarnersaulaukpok nattarᴋonâlungnut Israelib ᴋittorngangita toᴋᴋolauktanginit saviksoarmut.

¹² Tagva Josuab Nalegak oᴋarvigiva uvlorme taipsomane Nalekab unertuiviane Amoriterinik Israelib ᴋittorngangita sangane, oᴋarlunelo Israelitit takkoane: Seᴋᴋinak nokᴋarit Gibeonib nallâne, taᴋᴋerlo Ajalonib naksangata nallâne!

¹³ Tagva seᴋᴋinerlo taᴋᴋerlo nokᴋarpuk, innugasaksuit omigijitik kiglugvigiᴋârnagit. Tamanna aglaksimangilâk idluartut aglangine? Taimak seᴋᴋinak nokkarpok ᴋillaub ᴋerᴋane mulludlarlunelo nippinerminut uvlormik illuitokasangmik.

¹⁴ Uvloᴋalaungilarlo adseᴋartomik ominga, sivorngagullonêt kingorngagullonêt, Nalekab nalegvianik angutib nippinganik; Nalegak sorsungmat Israelitit pivlugit.

¹⁵ Josuale utterivok tangmarvingmut Gilgalemut, Israelitillo illunatik illagivât.

¹⁶ Attanille tallimat taipkoa ᴋemâlaukput ijerlutiglo ᴋairosungmut Makedametomut.

¹⁷ Tagva Josua oᴋautsauvok: Attannit tallimat taipkoa nennilaukpavut ijersimatillugit ᴋairosungme Makedametome.

¹⁸ Josua oᴋarpok: Tagva ujaraksuit aksakartisigik ᴋairosub pânganut, anguteᴋarᴋojileritselo udsertortunik taipkoninga.

¹⁹ Illipsele nokᴋarniarase omigijisele udlasigik, kingorlingillo ullimarsigik, ittertailitisigiglo iglugasaksoarmingnut; Nalekap Gudipse tunnimangmagit aggapsingnut.

²⁰ Josuablo Israeliblo ᴋittorngangita unatadlarnak angijoksoak una soraitilaungmatsuk tapkonane, nungulaungmattigiglo; amiakungit iglugasaksoarnut avalulingnut pivut.

²¹ Tagva innugasaksuit illunatik ullapirsauteᴋarlutik utterivut Josuamut, tangmarvingmut Makedamut, nalliatalo oᴋane aulatijaksarilaungila Israelib ᴋittorngangita sangine.

²² Josuale oᴋarpok: Kairosub pânga upkoarsiuk, attannillo tallimat taipkoa ᴋailersigik uvamnut.

²³ Taimailiorput, attannillo tallimat tapkoa âpait ᴋairosungmit tapsomunga, Jerusalemib attanertanga, Hebronib attannertanga, Jarmutib attanertangat, Lachisib attanertanga, Eglonib attanertanga.

²⁴ Attannille tallimat tapkoa âtaumangmatta tapsomunga, Josuab Israelitit illuêngarlutik ᴋaiᴋovait, oᴋarlunelo sorsuktuksat illagijame angajoᴋanginut: ᴋaititse ovunga, attannillo ukkoa tuttisigik ittikkapsingnut ᴋongasingitigut! Kaivullo tagvunga, tuttilutiglo ittikkamingnut tapkoa ᴋongasinginut.

²⁵ Josuablo oᴋautivait: Sivoraniarase kvaksarniaraselo, maksoanaᴋaluselo mungungajuititse; taimak Nalekab omigijise illunaita sorsugvigijase piniarviginiarmagit.

²⁶ Kingornganelo Josuab ullimarpait toᴋᴋolugillo nivingatilugillo nappartunut tallimanut; nivingalaukpullo nappartune unnuk tikkilugo.

²⁷ Seᴋᴋinerle nippijarêrmat perᴋojivok akᴋartitauᴋovlugit nappartunit egitauᴋovlugillo ᴋairosungmut ijervigilauktanganut, ujarᴋaniglo angijunik illijivut ᴋairosub pângata sanganut. Tapkoa tagvaneput sulle uvlok tamana tikkilugo.

²⁸ Uvlorme taipsomane Josuab Makedatauk salagilaurivait ullimârlugillo saviksub kênanganut, attaningat illaliudlugo nungutipaillo, tarnillo tamaita tapkonanelauktut, amiakoᴋarᴋojilaungilarlo nallianik; Makedablo attannertanga pinniarvigiva sorlo Jerichub attannertanga pinniarvigilaungmago.

²⁹ Tagva Josua Israelitillo illuêngarlutik illagilugo aularput Makedamit Libnamut, sorsugvigivaillo.

³⁰ Nalekablo tapkoatauk tunnigivait Israelitit agganginut, attanertangat illaliudlugo; ullimarpaillo saviksub kênanganut, tarnillo illunaita tapkonanelauktut; amiakokarkojilaungilarlo nellianik tapkonane; attanningallo pinniarvigiva sorlo Jerichub attanertanga pinniarvigilaungmago.

³¹ Kingorngane Josua Israelitit illuêngarlutik illagilugit aularpok Libnamit Lachisemut, illulugillo sorsugvigivait.

³² Nalekablo Lachisatauk tunnivait Israelitit agganginnut salaᴋarᴋovlugit tapkoninga uvlub aipangane, ullimarpaillo saviksub kênanganut, tarnillo illunaita tapkonanelauktut, taimamarik sorlo Libna pinniarvigilaungmagit.

³³ Nalliutome taipsomane Horame Geserib attannertanga takpaungarpok Lachis ikkajoromavlugit; Josuable ullimarpa innuᴋotingit tamaita illaliudlugit, amiakoᴋarungnaiᴋârtinago tapkonangat.

³⁴ Josualo Israelitit illuêngarlutik illagilugit aularpok Eglonemut illulugillo sorsugvigivait;

³⁵ Salagilaitalo uvlorme taipsomane, ullimarlugillo saviksub kênanganut, tarnillo illunaita tapkonanelauktut nungutipait uvlorme taipsomane, taimamarik sorlo Lachis pinniarvigilaungmagit.

³⁶ Kingorngane Josua Israelitit illuêngarlutik illagilugit takpaungarpok Eglonemit Hebronemut, sorsugvigivaillo,

³⁷ Salagivaillo ullimarlugillo saviksub kênanganut, attaningallo iglugasaksoaᴋotingillo illaliudlugit, tarnillo illunaita tapkonanelauktut, amiakoᴋarᴋojingilarlo nallianik, taimamarik sorlo Eglon pinniarvigilaungmagit, nungutipaillo tarnillo illunaita tapkonanelauktut.

³⁸ Tagva Josua Israelitillo illuêngarlutik illagilugit utterivok Debiremut, sorsugvigivaillo.

³⁹ Salagilaitalo attaningat iglugasaksoaᴋotingillo illunaita illaliudlugit, ullimarpaillo tarnit illunaita tapkonanelauktut, amiakoᴋarᴋojingilarlo nallianik. Sorlo Hebron pinniarvigilaungmagit, taimak Debire attanningallo pinniarvigivaittauk, sorlo Libna attaningallo pinniarvigilaungmagit.

⁴⁰ Taimak Josuab nunnat illunaita, ᴋaᴋᴋane seᴋᴋinerdlillo, nâksanelo kôngnelo attaningit illaliudlugit ullimartautipait, amiakoᴋarᴋojilaungilak nallianik, tamaitalo annerneggit nungutipait, sorlo Nalegak Israelib Gudinga perᴋojilaungmat.

⁴¹ Ullimartautipaillo Kades Barneamit Gasa tikkilugo, nunalo Gosen illunât, Gibeon tikkilugo.

⁴² Attanillo tapkoa, nunangit illaliudlugit salagivait attautsekut; Nalegak Israelib Gudinga sorsungmat Israelitit pivlugit.

⁴³ Josualo utterivok tangmarvingmut Gilgalemut, Israelitit illuêngarlutik illagilugit.