Josua 1 - Labrador Inuttitut Heritage Bible

Josuab aulatsijôᴋojauninganik.

¹ Mosesib Nalekab kivgangata toᴋᴋungata kingorngane, Nalegak Josuamut Nunib erninganut, Mosesib kivganganut, oᴋarpok:

² Kivgara Mosese toᴋᴋovok; tagva parngnailerit manna, Jordanelo tamna ikkarlugo pit, igvit innugasaksuillo ukkoa illunatik, nunamut tunnilauktamnut tapkonunga, Israelib ᴋittornganginnut.

³ Allupse tullerarviginiartangit tamaita tunnilaukpakka illipsingnut, sorlo Mosese oᴋautilaurapᴋo.

⁴ Sunaᴋajuitomit, Libanonemillo mattomangat, koksoarmut Fratemik attelingmut tikkilugo; Hethiterit nunangat illunât, imarbiksoarmut kangianetomut kiglilervise illingajuksauvut.

⁵ Kialonêt akkerartoraksaringilâtit inôsingne tamât. Sorlo Mosese aiparilaurapᴋo taimak aiparijomavagittauk. Kemagomangilagit aularviginaglonêt.

⁶ Maksoalerit mungungajuilutillo; nunamik aviksijuksaugavit innugasaksoarnut ukkununga, angerutigilauktamnik atâtagijanginnut, tunnijomagapᴋo tapkonunga.

⁷ Maksoatuinarit ᴋuviasudlarlutillo, mallitsiarᴋovlutit, pinniarmariᴋovlutillo perᴋojat Mosesib kivgama perᴋolauktangit illingnut malliklugit. Sanniagorniarnagit tallerpingmullonêt saumingmullonêt, sillatutsiartunnik illuseᴋarungnarᴋovlutit pinniaraksarne tamaine.

⁸ Aglaillo makkoa perᴋojaktaggit ᴋannernit nûlerᴋoniarnagit, nautsertorkille uvlorme unnuarmelo, mallitsiarᴋovlutit pinniarmariᴋovlutillo aglaksimajut tamakkonane malliklugit. Tagva sullitsiarniarpotit sillatutsiarlutillo piniarungnarniarpotit.

⁹ Ahak perᴋolaukpagit maksoalutillo ᴋuviasuktuksaugavit. Keungominak, kakkilarnaglo; Nalekab Gudivit illagingmatit pinniarnerne pinniarneriniartarne tamaine.

¹⁰ Tagva Josuab innugasaksuit angujoᴋângit perᴋovait, oᴋarlunelo:

¹¹ Tangmarvik pissugvigissiuk innugasaksuillo perᴋogissigik, oᴋarluselo: Taᴋᴋoaksamik kattersoileritse uvlut pingasut nâkpatta Jordan una ikkarniarapsiuk, tikkilerᴋovluse tigusilerluselo nunamik Nalekab Gudipse tunniniartanganik illipsingnut.

¹² Rubenakunnullo Gadekunnullo kinguvarênullo Manassib kinguvangita ᴋetterᴋanginut Josua oᴋarpok:

¹³ Erkarsigik oᴋautsit taipkoa, Mosesib Nalekab kivgangata oᴋauserilauktangit illipsingnut, oᴋarlunelo: Nalekab Gudipse merngoêrservingmut âtsarêrpâse tunnitsivigiluselo nunamik ominga.

¹⁴ Nulliaᴋotisse sorruseᴋotisselo nergjuteᴋotisselo ᴋemmaksigik nunamut Mosesib tunnilauktanganut illipsingnut Jordanib miksâne; illipsele, angutit sorsugungnartut sakkulijarluse ᴋattangutisse sivorlervigijaksarivase ikkajoraksarilugillo,

¹⁵ ᴋattangutisse merngoêrservingmut âtauᴋârtinnagittauk Nalekamut illipsatut, aksarniᴋârtillugillotauk nunamik Nakab Gudipse tunniniartanganik tapkonunga. Tagva uttertuksaugivose nunapsingnut, Mosesib Nalekab kivgangata tunnilauktanganut illipsingnut perᴋutauᴋovlugo illipsingnut, Jordanib miksâne, seᴋᴋerngub nuilervingata nallane.

¹⁶ Tapkoalo Josua kiolugolo oᴋarput: Illunaita perᴋolauktatit uvaptingnut pinniarutigijomavavut, namullo tilliklerviginiartarnut uvaptingnik, tagvunga aijomavogut.

¹⁷ Sorlo Mosese nalalauraptigo, taimak igvittauk nalagomavaptigit; kissiane Nalekab Gudivit illagituinarpattit, sorlo Mosese illagilaungmago.

¹⁸ Kannernik nalangitok, nalangnanelo oᴋausernik, tamaine perᴋojarne uvaptingnut, tamna toᴋᴋojuksauvok. Maksoatuinarit mungungajuilutillo.