Jona 4 - Labrador Inuttitut Heritage Bible

¹ Tamannale Jônab angijomik sinaungajutigidlarpâ, ningadlarporlo.

² Tuksiarporlo Nâlekamut, oᴋarlune: Atso ilâ, Nâlegaᴋ, nelautsingilâᴋ oᴋauserilauᴋtara nunamêtilunga sullê? Tamanna pivlugo erinesuavlunga ᴋemâlauᴋpunga Tarsisimut; ᴋaujimagama Gudeogavit saimarsaijoᴋ ilapsudlartorlo, ningarsaraingitoᴋ nâpkigosudlartorlo, idluitorlo ᴋaᴋialerutigisârangne.

³ Taimaimat, Nâlegaᴋ, inôsera tigulauruktôᴋ uvamnit; nakuluarmat uvamnut toᴋoguma, inôgiarmit.

⁴ Nâlegarlo oᴋarpoᴋ: Ningarnît idluarᴋa?

⁵ Jôna tagva anivoᴋ iglugasaksoarnit, ingilunelo iglugasaksuit kitâne, tagvanelo oᴋoalineliorpoᴋ ingilunelo atâne taggaliningane, nâlaklunelo iglugasaksuit ᴋanoᴋ pijaularmangâta.

⁶ Gudible Nâlekab perortomik perorsaraidlartomik atuinarupâ, nuitipâlo Jônab ᴋolâgôrᴋovlugo, taggalinâᴋovlugo niaᴋoanik, idluijutinga malungnarungnaiᴋovlugo. Jônablo perortoᴋ ᴋuviagidlarpâ.

⁷ Kaungmalle ᴋaulertainartilugo Gudib ᴋuglugiaᴋ atuinarupâ, tâpsomalo perortoᴋ kapivâ, toᴋoᴋovlugo.

⁸ Seᴋinerlo nuingmat, Gudib kanangâᴋ ônadlartoᴋ atuinarupâ; seᴋinerublo Jônab niaᴋoa akkingmikpâ, tâmnalo ᴋaujimangerpoᴋ, ᴋilanârporlo toᴋogiarmik, oᴋarlune: Nakuluarpoᴋ uvamnut toᴋoguma, inôgiarmit.

⁹ Gudiblo Jôna oᴋautivâ: Idluarᴋâ ningaravit perortoᴋ pivlugô? tâmnalo kiovoᴋ: Idluartuinarpoᴋ ningadlaruma toᴋo tikidlugo.

¹⁰ Nâlegarlo oᴋarpoᴋ: Igvit perortoᴋ suliaringitat perortingitallo ilapjugivat, unnuangainaᴋ nuijoᴋ unnuangainarlo asserortoᴋ;

¹¹ Uvangalo iglugasaksuit tâpkoa, Ninive, ilapjugijaksaringilakkâ, inuᴋtaᴋartut ununersanik 120,000nit, ᴋaujimangitunik talerpingmingnik saumingmingnit, nergjutetaliksuillotaûᴋ?