Jona 3 - Labrador Inuttitut Heritage Bible

¹ Nalekablo oᴋausingata Jôna tikipâ aipanganik, oᴋarlune:

² Nikovigit, Ninivemullo, iglugasaksoarnut tâpkonunga angijôdlartunut, ailutit, oᴋâlavigikillo oᴋautsinik oᴋautigilauᴋtamnik ilingnut.

³ Jôna nikovipoᴋ tagva ailunelo Ninivemut, Nâlekab oᴋausinga maliklugo. Ninivele iglugasaksoangovut angijôvaksôdlartut, uvlune pingasune ingiKaviusot.

⁴ Jônalo iglugasaksoarnut itilerpoᴋ uvlûb atautsib ingiKavigigianga nâvlugo, oᴋâlalerporlo, oᴋarlune: Uvlut 40 ᴋângerpatta Ninive asserortaulârput.

⁵ Ninivemiullo okperput Gudemut, nerritailiviksaᴋarᴋojivullo, attisivullo pôksajavinernik, erᴋanarnerpânginit erᴋananginerpâk tikidlugo.

⁶ Oᴋautaujullo tamakkoa tikiutivut Ninivib ataninganut, tâmnalo nikovipoᴋ iksivautaksoaminit, annoarânelo iperarpâ, uliklunelo pôksajavinernik ingipoᴋ argjane.

⁷ Perᴋojivorlo, aᴋpârtoᴋartitsivorlo Niniveme ilûnâne ataniub erᴋanartullo perᴋojanganik oᴋartomik; Inuillônêt nergjutillônêt, tuktuvaillônêt saukallônêt oᴋomiarniaratik sumiglônêt, nerriniaratik imerniaratiglônêt;

⁸ Pôksajavinernigle uliksimaniarlit inuillo nergjutillo, ilungertorlutiglo ᴋaigarsuglit Gudemut; ilâ, ilûnatik sâgiarlit apᴋotigijamingnit idluitunit, aggangmiglo idluitulinerijanginit.

⁹ Kina ᴋaujijungnarᴋâ Gude sanguniangimangât ᴋaᴋialerlunelo, allailunelo ningarnersoaminik, asserortauᴋonatâ?

¹⁰ Gudiblo iliorningit takovait, sâgiarmatta apᴋotigijamingnit idluitunit; Gudiblo ᴋaᴋialerutigivâ idluitoᴋ oᴋautigilauᴋtane piniaromavlugo tâpkonunga, piniarnerilungilâlo.