Jona 2 - Labrador Inuttitut Heritage Bible

¹ Jonalo tuksiarpoᴋ Nâlekamut Gudiminut ômajoâlûb aᴋearoanêdlune.

² Oᴋarporlo: Siorniudlarnimne Nâlegaᴋ ᴋaigarsugvigilauᴋpara, tâpsomalo tusarpânga; toᴋungajut ininganit ᴋaigarsukpunga, nippigalo tusarpat.

³ Itijomut egilauramga imarbiksûb iluanut, imaᴋsuit ilumavânga; malliksoatit ᴋâᴋatartullo ilûnatik ᴋâmnôrput.

⁴ Oᴋarpungalo: Pingujartauvunga ijîkpît sângangnit; takosaromârpungale sulle katimavingnut ivsornaitomut.

⁵ Imaᴋsuit ilumavânga, tarniga tikidlugo aglât; itinersuit avatimnêput; ᴋerᴋojat niaᴋora nimervigivât.

⁶ Kaᴋᴋat tungavinginut kivilauᴋpunga; nunab palangairutingita aniviksairutivânga sorairniangitomik; igville inôsera ᴋaᴋitipat asserornermit, Nâlegaᴋ Gudigalo.

⁷ Tarniga mungolermat ilumne, Nâlegaᴋ erᴋarpara; ᴋenuneralo kiblêvoᴋ ilingnut, ivsornaitovingnut.

⁸ Piungitunik suksaungitunik sungertûteᴋartut ᴋemaivut nâpkigijaunermingnik.

⁹ Uvangale tunerguservigijomavagit ᴋujalidlarnermik nippeᴋarlunga, akkilêjomavungalo angerutigilauᴋtamnik. Piuliklerneᴋ Nâlekamit pivoᴋ.

¹⁰ Nâlekablo ômajoâluk oᴋautivâ, tâpsomalo Jôna merriarpâ nunamut.