Jona 1 - Labrador Inuttitut Heritage Bible

¹ Nalekab oᴋausinga Jônamut Amitaib erninganut tikipoᴋ oᴋarlune:

² Nikovigit, Ninivemullo iglugasaksoarnut tâpkonunga angijôdlartunut ailutit, oᴋâlavigikillo; idluitoᴋsôningit sâmnut ᴋagvarsimangmatta.

³ Jônale nikovipoᴋ Tarsisimut ᴋemâjomavlune Nâlekab najorninganit; Joppamullo atersârpoᴋ, naipitsivorlo umiaᴋsoarmik Tarsisiliartomik; akkilêvorlo ingergauserminik ikivigilugolo, Tarsisiliarᴋataujomavlune, Nâlekab najorninganit ᴋemâvlune.

⁴ Nâlekable anoresoaᴋ tikitipâ imarbingmut, aᴋᴋunaᴋsoangolerporlo imarbingme, umiaᴋsoarlo asserortauniarasugivât.

⁵ Umiaᴋsoarmiulle sivôralerput, atunillo gudimingnut ᴋaigarsudlarput; umiaᴋsûblo ussijangit egiokarpait imanut puggilanersauᴋovlugo. Jônale umiaᴋsûb iluanut aᴋᴋarsimalauᴋpoᴋ, inarsimalunelo sinikpoᴋ.

⁶ Umiaᴋsûb angajoᴋângata aivigivâ tagva, oᴋautilugolo: Suvêt, siniktotît? Makigit, Gudîllo ᴋaigarsugvigilugo, imaᴋa Gudivît issumagilârpâtigut assioᴋonata.

⁷ Ingmingnullo oᴋauseᴋautivut: Attê, immeralauᴋta, ᴋaujiᴋovluta kina pitjutigilugo idluitûb tamattoma nelaumangâtigut: Immerarput tagva immerautiblo Jôna nelaupâ.

⁸ Oᴋautivât tagva: Oᴋautilauᴋtigut kina pitjutigilugo idluitûb tamattoma nelaumangâtigut; suniarᴋêt? Nakillo pivêt? Nunat neliat nunagiviûk? Inôᴋatigêksuit nelianit pivêt?

⁹ Oᴋautivaillo: Ebreeriovunga: Nâlegarlo ᴋilaub Gudinga imarbingmik nunamiglo pingortitsijoᴋ, sivôragivara.

¹⁰ Tagva angutit tâpkoa angijomik sivôradlarput, oᴋautivâllo; Sumik piniarᴋêt? Angutit ᴋaujimangmatta tâmna ᴋemâmat Nâlekab najorninganit, oᴋautisimangmagit.

¹¹ Oᴋautivât tagva: Sumik piniarvigijaksarivitigît, imarbik ikublanersauᴋovlugo uvaptingnût? imarbik sugalukpaliadlarmat.

¹² Tâpsomalo oᴋautivait: Tigusinga egilungalo imânut; tagva imarbik ikublialârpoᴋ ilipsingnut; ᴋaujimagama uvanga pivlunga aᴋᴋunaᴋsûb tamattoma nelaumase.

¹³ Angutille epupâdlarput sulle nunaliaromavlutik, saperpulle; imarbik sugalukpaliatuinarmat tâpkonunga.

¹⁴ Tamanna pivlugo Nâlegaᴋ ᴋaigarsugvigivât, oᴋarlutik: Kenuvigidlarpaptigit, Nâlegaᴋ, angutib oma inôsinga asserortaujutiginiaratigo, auglo passijaksaungitoᴋ iliniarnago uvaptingnut; igvit, Nâlegaᴋ, idluarijarnik piniaravit.

¹⁵ Jônalo tiguvât egilâllo imânut; tâvalo imarbik iktulijarungnaipoᴋ.

¹⁶ Angutillo tâpkoa Nâlegaᴋ angijomik sivôragivât; Nâlegarlo tunerguservigivât, angermarivigivâllo.

¹⁷ Nâlekable imarbiksiut ômajoâluk atuinarupâ Jônamik esiᴋovlugo; Jônalo imaᴋsiutib aᴋearoata iluanêpoᴋ uvlut pingasut unnuallo pingasut nâvlugit.