Johannese 9 - Labrador Inuttitut Heritage Bible

Kiglinganit tautungitomik Kristûsib tautuktitsininganik.

¹ Jêsuselo senerᴋotsivok takovlunelo erniangonerminit tautungitomik.

² Ilinniartingitalo aperivât oᴋarlutiglo: Ajoᴋertuijok, kina idluitulilauᴋâ, tâmna, angajoᴋâgiglônêt, tautugane erniangongmât?

³ Jêsusib kiovait: Tâmnalônêt, angajoᴋâgiglônêt idluitulilaungilat; Gûdible piniarningit sakᴋertitaulerᴋovlugit tâpsomane.

⁴ Tilijima piniarningit piniaraksarivakka uvlôtilugo; unnuangojomârpok kialônêt piniarvigijungnangitanga.

⁵ Silaksoarmêtilunga ᴋaumaniovunga silaksoarmiunut.

⁶ Taimâk oᴋarêrame, nunamut oriarpok nuvaglo ivjomut akudlugo, tamattominga tautungitub ijîgik mingoarpak,

⁷ Oᴋautilugolo: Siloab (imaipok: tilijab) tesinganut ailerit ermiklutillo. Tagva ailerpok ermiklunelo, tautuklunelo ᴋaivok.

⁸ Silalingit, tautuktullo tâpsominga sivorngane, ᴋenujôngmat, oᴋarput: Tamnaungilâk iksivalauᴋtok ᴋenuvlunelô?

⁹ Ilangit oᴋarput: Tâmnauvok. Ilangille: Adsigivâ. Nangminerle oᴋarpok: Tâmnauvunga.

¹⁰ Tagva oᴋautivât: ᴋanok tautuktitaulerᴋêt?

¹¹ Kiovok oᴋarlunelo: Inûb, Jêsusemik atiliub, ivjok senavâ, mingoarlugiglo ijîkka, oᴋarlunelo: Siloab tesunganut ailerit, ermiklutillo. Ailerpunga ermiklungalo, tautulerlungalo.

¹² Tagva oᴋautivât: Taimna nanêᴋâ? Oᴋarpok: Nelovunga.

¹³ Tagva Farisêerinut aularutivât tautulaungitok.

¹⁴ Sabbateovorle, Jêsusib ivjok senangmago ijîgiglo uitingmagik.

¹⁵ Tagva Farisêerittauk ama aperivât, ᴋanok tautuktitaulermangât. Tâpsomale oᴋautivait: Ivjomik ilijivok ijîmnut, ermilerpungalo, mânalo tautukpunga.

¹⁶ Tagva Farisêerit ilangit oᴋarput: Inuk taimna Gûdemit pingilak, Sabbate isumaginginamiuk. Asingille oᴋarput: ᴋanok inuk ajortolik taimâk tatamnartitsijungnarᴋâ? Akkerartortigêlerpullo.

¹⁷ Tautulaungitok ama oᴋautivât: Sumik oᴋarᴋêt tâpsominga, ijîkik uitilaungmagîk? Tâmnale oᴋarpok: Nelautaijôvok.

¹⁸ Jûdille okperingilât tautulaungininga, tautulerningalo, ᴋaiᴋojerᴋâratik tâpsoma tautulertub angajoᴋâgingnik.

¹⁹ Apersorlugiglo oᴋautivakit: Ernerivitikô una, oᴋautigijatik tautugane erniangolauᴋtomîk? ᴋanok ilingavâ, mâna tautulermât?

²⁰ Angajoᴋâkita kiovait oᴋautivlugillo: ᴋaujimavavuk, tâmna ernerigaptigo, tautuganelo erniangolaungmat;

²¹ ᴋanorle mâna tautuktitaungmangât, nelovoguk. Inumariogalloak, aperisiuk; ingminik oᴋarᴋosiuk.

²² Taimâk angajoᴋâgik oᴋarpuk, Jûdit erᴋsigigamikik. Jûdit kajusiᴋatigêjarêrmatta, tâpsominga Kristûseojomik kigligiutsijoᴋarpat, tâmna katimavingmit avitauᴋovlugo.

²³ Tamanna pitjutigilugo angajoᴋâgik oᴋarpuk: Inumariogalloak, aperisiuk.

²⁴ Tagva aippanganik inuk tautulaungitok ᴋaiᴋolerpât oᴋautivlugolo: Gûde nertoruk. ᴋaujimavogut, inuk tâmna ajortôngmat.

²⁵ Tâmna kiovok oᴋarlunelo: Ajortôngmangât nelovara; atautsemik nelungigalloarpunga, tautulaunginama, mânalo tautulerama.

²⁶ Tagva ama oᴋautivât: Sumik piniarpâtît? ᴋanok ijîkik uitipagîk?

²⁷ Tâpsoma kiovait: Oᴋautigijarêrpara ilipsingnut, tusangipisiûk? Ama tusaromavisiûk? Tâpsomunga ilinniarteojomagivisê?

²⁸ Tagva oᴋarnerlôtilerpât oᴋarlutiglo: Igvit taipsoma ilinniartigivâtit; uvagulle Môsesib ilinniartigivâtigut.

²⁹ ᴋaujimavogut, Gûdib Môsese oᴋaᴋatigingmago; taimnale ᴋaujimangilavut, nakit pingmangât.

³⁰ Inub kiovait oᴋautivlugillo: Tamanna tatamnadlarpok, ᴋaujimanginapse, nakit pingmangât; ijîkkalo uitilaukpak.

³¹ ᴋaujimavogulle, Gûdib idluitulijut tusangimagit; Gûdemigle opigosuktoᴋarpat, pijomajanganiglo piniartok, tâmna tusarpâ.

³² Silaᴋsûb pigiarninganit tusaumajoᴋangilak tautugane erniangomajub ijîgingnik uititsijoᴋartomik.

³³ Tâmna Gûdemit pingikune, piniarungnarajangilak sumik.

³⁴ Tâpkua kiovât oᴋautivlugolo: Ajornerne erniangomamarigalloarlutit ajoᴋertorpitigût? Pingujarpâllo.

³⁵ Jêsuse tusaumalerpoᴋ pingujalaungmatsuk. Naipinamiuglo oᴋautivâ: Gûdib erninganut okperᴋêt?

³⁶ Tâpsoma kiovâ oᴋautivlugolo: Nâlegak neliat tâmnauvâ? Okperᴋovlunga tâpsomunga.

³⁷ Jêsusib kiovâ: Takolauᴋpat; oᴋaᴋatigijallo, tâmnauvok.

³⁸ Tâpsomale oᴋautivâ: Nâlegak okperpunga! Tuksiarvigivâlo.

³⁹ Jêsuselo oᴋarpok: Erᴋartuijartorlunga silaᴋsoarmut tamattomunga pivunga, tautungitut tautulerᴋovlugit, tautuktullo tautugungnairᴋovlugit.

⁴⁰ Farisêerillo illangita najortingita tamanna tussarpât, oᴋautivlugolo: Tautunginivitâ?

⁴¹ Jêsusib oᴋautivait: Tautungikupse, ajorneᴋarajangilase; mânale oᴋarapse: Tautukpogut; ajortoêrungnangilase.