Johannese 8 - Labrador Inuttitut Heritage Bible

Jêsusib idluarsaininganik arnak ajortulilauᴋtok pivlugo. Inuit akkerartortigêngninginik Kristûsib ajoᴋertutingit ilinniartingitalo ilusingit pivlugit.

¹ Jêsusele ᴋakᴋamut orᴋsoᴋtalingmut aivok.

² ᴋaulermallo katimaviksoarmut ᴋailerivok, inuillo ilûnnatik tikipât, ingidlunelo ajoᴋertorpait.

³ Aglangniglo ilisimajut Farisêerillo arnamik âtsivut tâpsomunga, tigujamingnik anguniartilugo, akornganullo pitipât.

⁴ Oᴋautivlugolo: Ajoᴋertuijok, arnak una anguniartilugo appakataujok!

⁵ Môsesible perᴋojane perᴋolauᴋpâtigut, taimaitut millorlugit ujarᴋanut; Igvit ᴋanok oᴋarᴋêt?

⁶ Taimâgle oᴋarput ôktoromavlugo, pasitiksaᴋaromavlutik tâpsomunga. Jêsusele okkolerpok, tikkerminullo aglaklune nunamut.

⁷ Apersoranermatsugle, makilerpok, oᴋautivlugillo: Akunapsingne ajorneᴋangitûb millorᴋârliuk ujarᴋamut.

⁸ Ama okkovlune aglakivok nunamut.

⁹ Tamanna tusaramitsuk, kingorlerêklutik anilerput inuᴋoarnernit inôsuktut tikilugit, issumamingnut passijauvlutik. Jêsuselo kisimeotilugo ᴋemaktauvok, arnarlo ᴋerᴋane nangertok.

¹⁰ Jêsusele makilerpok; inuksinginamelo arnab asianik, oᴋautivâ: Arnak, ipkoa passijitit nanêkât? erᴋartortaumangilatît?

¹¹ Tâpsomale oᴋautivâ: Âhaila Nâlegak. Jêsusible oᴋautivâ. Tagva uvangatauk erᴋartoromangilagit; aularit, kingorngane ajortulijungnairit.

¹² Tagva Jêsusib oᴋarvigigivait oᴋarlunelo: Silaᴋsoarmiut ᴋaumanerivânga; uvamnik maliktok tâᴋtome arvertarniangilak, ᴋaumajorle inôgutaujok piginiarpâ.

¹³ Tagva Farisêerit oᴋautivât: Ilingnik kigligiutjivotit, kigligiutjinît mikseᴋârtôngilak.

¹⁴ Jêsusib kiovait oᴋautivlugillo: Uvamnik kigligiutjiguma, kigligiutjinera mikseᴋârtônajarpok; ᴋaujimagama, nakit pingmangârma, namullo ainiarmangârma. Ilipsele ᴋaujimangilase, nakit pingmangârma, namullo ainiarmangârma.

¹⁵ Ilipse uvinik maliklugo erᴋartuivose; uvanga erᴋartuingilanga kimiglônêt.

¹⁶ Erᴋartuigumale, erᴋartuinera idluartôvok; kisimaunginama, uvangale Atâtagalo tilijiga.

¹⁷ Perᴋojipsingne aglaksimavok, inûk maggûk kigligiutjiningak mikseᴋârtôngmat.

¹⁸ Uvangauvunga kigligiksautijunga uvamnik, Atâtagalo tilijiga kigligiutsigivok uvamnik.

¹⁹ Tagva oᴋautivât: Atâtat nanêᴋâ? Jêsusib kiovait: Uvamniglônêt, Atâtamiglônêt ilitarsingilase; uvanga ilitarigupsinga, Atâtagatauk ilitarinajarivase.

²⁰ Oᴋautsit tamakkoa Jêsusib oᴋauserivait Gûdib iklervingata senianêdlune, ajoᴋertuigame katimaviksoarme; tigusijoᴋangilarlo tâpsominga; stûndinga tikisimangimat sulle.

²¹ Tagva Jêsusib ama oᴋautivait: Aularniarpunga ᴋeneromârpapsingalo, toᴋoluselo ajornipsingne; aiviginiartara tikitsungnangilase.

²² Tagva Jûdit oᴋarput: Ingminik toᴋotsomavâ? oᴋarame: Aiviginiartara tikitsungnangilase.

²³ Oᴋautivaillo: Ilipse mângat pivose, uvanga takpângat pivunga; ilipse silaᴋsoarmit tamattomangat pivose, uvanga silaᴋsoarmit tamattomangat pingilanga.

²⁴ Taimâk toᴋojomârnipsingnik ajornipsingne oᴋautilaukpapse; toᴋojomârapse ajornipsingne, okpingikupse uvangaugama.

²⁵ Tagva oᴋautivât: Kivauvêt? Jêsusiblo oᴋautivait: Sivorlermik tâmna oᴋaᴋatigijise.

²⁶ Unuktunik oᴋausiksaᴋarpunga ilipsingnut, erᴋartuitiksaᴋarlarmalo; tilijigale mikseᴋârtôvok; tusalauᴋtakkalo tâpsomangat oᴋauserivakka silaᴋsoarmiunut.

²⁷ Tukisingilâlle, Atâtamik oᴋarvigingmagit.

²⁸ Tagva Jêsusib oᴋautivait: Inûb Erninga napautigupsiuk, ilitarsijomârpose uvangaunimnik, uvamniglo pinginimnik; sôrlole Atâtab ajoᴋertulaungmanga, taimâk oᴋâlavunga.

²⁹ Tilijimalo ilagivânga, Atâtab kisimauᴋungilânga; piniatsainarama ᴋuviagijanganik.

³⁰ Taimâk oᴋâlatilugo unuktut okperilerpât.

³¹ Tagva Jêsusib Jûdit okperijine oᴋautivait: Oᴋausikka malitsainalerupsigik, idluartunik ilinniartigivapse.

³² Mikseᴋârnerlo ilitariniarpase. mikserᴋârnerublo kivgaujungnaitiniarpâse.

³³ Tagva kiovât: Âbrahâb kinguvârivâtigut kivgaungitsainarlutalo kimullônêt; ᴋanok oᴋarᴋêt: kivgaujungnainiarposê?

³⁴ Jêsusib kiovait oᴋautivlugillo: Âhamarik, âhamarik oᴋaupapse: Idluitulijok kivgauvok ajornernut.

³⁵ Kivgarle iglomêtsainarniangilaᴋ, ernerle tagvanêtsainarniarpok.

³⁶ Ernerub tagva kivgaujungnaitikpase, nelâgut kivgaujungnairpose.

³⁷ Nelungilanga, Âbrahâb kinguvâringmase; toᴋonasuarpapsingale; oᴋausikka iterviksarsingimatta akunapsingne.

³⁸ Oᴋâlavunga takolauktamnik atâtamne; taimailiorivose takojapsingnik atâtapsingne.

³⁹ Tagva kiovât oᴋautivlugolo; Âbrahâ atâtagivavut. Jêsusib kiovait: Âbrahâb ᴋitorngarikpase, Âbrahâb pinialauktangit piniarajarivase.

⁴⁰ Mânale toᴋonasuarpapsinga, inuk taimaitok, mikseᴋârnermik oᴋautjijoᴋ ilipsingnut, tusalauktamnik Gûdemit: Âbrahâ taimailiulaungilak.

⁴¹ Atâtapse piniarningit piniarnerivase. Tagva oᴋautivât: Tamângainâgaungilagut; atautsemik atâtaᴋarpogut, Gûdemik.

⁴² Jêsusib oᴋautivait: Gûde atâtagigupsiuk, nagliginajarpapsinga; anilaurama, Gûdemillo pilunga; uvamnik ᴋailaunginama, tâpsoma tilivânga.

⁴³ Sôk oᴋausikka illitaringipisigîk? Oᴋausikka tusarungnanginapsigik.

⁴⁴ Atâtapsingnit Sâtanasemit pivose, atâtapselo ikliguningit maligomavase. Tâmna inuartôvok pigiarninganit, mikseᴋârnermêtsainalaungitorlo; mikseᴋârnek tâpsomanêngimat. Saglonermik oᴋâlagune, nangminerijaminik oᴋâlavok; saglotojoᴋsôgame, saglonerublo atâtagivâ.

⁴⁵ Uvangale mikseᴋârnermik oᴋâlagama okperingilapsinga.

⁴⁶ Nelipse akunapsingne ajornermik passijungnarpângâ? Mikseᴋârnermigle oᴋâlaguma ilipsingnut, sôk okperingilapsingâ?

⁴⁷ Gûdemit pijub Gûdib oᴋausingit tusarpait; tamanna pivlugo tusangilase, Gûdemit pinginapse.

⁴⁸ Tagva Jûdit kiovât oᴋautivlugolo: Nelâgut oᴋangilagût, Samâriamiogavit, Sâtanaseᴋarlarpillô?

⁴⁹ Jêsusib kiovait: Sâtanaseᴋangilanga, atâtagale nertorpara, ilipselo nachogivapsinga.

⁵⁰ Nertortauniksara ᴋeningilara, ᴋenertoᴋarporle tamattominga erᴋartuilunelo.

⁵¹ Âhamarik, âhamarik oᴋaupapse: Oᴋausimnik maliktub, toᴋo takoniangilâ isoᴋangitomut.

⁵² Tagva Jûdit oᴋautivât: Mâna nelojungnairpogut Sâtanaseᴋaravit. Âbraha toᴋolauᴋpok, nelautaijullo; oᴋarpotillo: Oᴋausimnik maliktub toᴋo ôngniangilâ isoᴋangitomut!

⁵³ Anginersauvêt atâtaptingnit Âbrahamit toᴋolauᴋtomît? nelautaijullo toᴋolaurivut. Ilingnik sunautipêt?

⁵⁴ Jêsusib kiovait: Uvamnik nertortiguma, nertornera piungilak. Atâtagale, tâmnauvok nertordlertok uvamnik, oᴋautigijase Gûdigivlugo.

⁵⁵ Ilitaringilaselo. Uvangale ilitarivara. Oᴋarajarumalônêt: Ilitaringilara; sagloᴋitsinajarpunga ilipsitut. Ilitarivarale oᴋausingillo malikpakka.

⁵⁶ Âbrahâ atâtase ᴋuviasulerpok, uvluksamnik takojuksaugame; takogamiuglo ᴋuviasulerpok.

⁵⁷ Tagva Jûdit oᴋautivât: Jâreᴋarnak sule 50 inik, Âbrahalo takolauᴋpiûk?

⁵⁸ Jêsusib oᴋautivait: Âhamarik, âhamarik oᴋaupapse: Âbrahâ ilerᴋârtinago uvanga ipunga.

⁵⁹ Tagva ujarᴋanik tigusivut milloromavlugo. Jêsusele ijerpok anilunelo katimavingmit, akorngatigut.