Johannese 7 - Labrador Inuttitut Heritage Bible

Kristûsib oᴋâlaninginik katimaviksoarme, uvloᴋsiorvingme, akkerᴋunik milukatalingnik igloᴋarvingme.

¹ Mattoma kingorngagut Jêsusib Galilêa ingergavigivâ; Jûdêa ingergavigijomanginamiuk, Jûdit toᴋonasuarmatsuk.

² Jûdille uvloᴋsiorvingat, akkerᴋunik milukatalingnik igloᴋarvingat, ᴋanilerpok.

³ Tagva ᴋatangutingita oᴋautivât: Parngnailerit aularlutillo Jûdêamullo ailerit, ilinniartitittauk takoᴋovlugit piniarnernik piniarnerijarnik.

⁴ Angigutjilune piniartoᴋangimat sumik, tautuktaujomagune. Taimailioruvit, saᴋᴋijâlerit silaᴋsoarmiunut.

⁵ ᴋatangutingitalônêt okperingimatsuk.

⁶ Tagva Jêsusib oᴋautivait: Piviksara neliutisimangilak sulle; piviksasele neliutitsainarpok.

⁷ Silaᴋsoarmiut ômigijungnangilâse, uvangale ômigivânga, tâpkoninga kigligiutsigama, piniarningit idluingmatta.

⁸ Ilipse uvloᴋsiorvingmut tamattomunga majoraleritse. Uvanga majoraromangilanga sulle uvloᴋsiorvingmut tamattomunga, piviksara neliutisimangimat sulle.

⁹ Tamattomingale oᴋautijarêramigit, Galilêamêtuarpok sulle.

¹⁰ ᴋatangutingille majoralermatta, tagva uvloksiorvingmut tamattomunga majoralerivok, sakᴋijârane angigutjivlunele.

¹¹ Tagva uvloᴋsiorviotilugo Jûdit ᴋenerpât oᴋarlutiglo: Imna nanêkâ?

¹² Tâpsomingalo oᴋarnilutjijoᴋadlarpoᴋ inuit akorngane. Illangit oᴋarput: Ajungitôvoᴋ. Asingille oᴋarput: Aukak, inuille uivêrivait.

¹³ Sagvartomigle oᴋartoᴋangilak tâpsominga, Jûdit erᴋsigigamigit.

¹⁴ Uvloᴋsiorviotilugole Jêsuse majorarpok katimaviksoarmut, ajoᴋertuilunelo.

¹⁵ Jûdillo tataminiarutigivât, oᴋarlutiglo: ᴋanok ôma aglait ᴋaujimavagît, ilinnialaungigalloaramigît?

¹⁶ Jêsusib kiovait oᴋautivlugillo: Ajoᴋertûtiga uvamnit pingilak, tâpsomangalle tilijimnit.

¹⁷ Tâpsoma pijomajanganik piniaromajoᴋarpat, tukkisiniarpoᴋ, ajoᴋertûseᴋ tamanna Gûdemit pingmangât, ubvalo uvamnik oᴋâlamangârma.

¹⁸ Ingminik oᴋâlajok nertortauniksaminik ᴋenerpok; tâpsomale tilijime nertornarninganik pinasuartok, tâmna mikseᴋârtôvok, idluineᴋangilarlônêt tâpsomane.

¹⁹ Môsesib perᴋojanik tunitjivigilaungilâsê? Akunapsingnelo maliktoᴋangilak perᴋojanik! Sôᴋ toᴋonasuarpisingâ?

²⁰ Inuit kiovut oᴋarlutiglo: Sâtanaseᴋarpotit; kia toᴋonasuarpâtît?

²¹ Jêsuse kiovoᴋ oᴋarlunelo: Tatamnartitamik atausênarmik pinialaukpunga, ilûnapselo tataminiarutigivase.

²² Môsesib kipinermik perᴋolaukpâse (Môsesemit pingigalloartok, atâtagijaptingnille); inuglo kipivase Sabbatemê.

²³ Inugle kipijaukpat Sabbatemê, Mosesib perᴋojangit aserortaulerᴋonagit: Sôᴋ ningarivisingâ, inuk ilûnât âᴋilaurapko Sabbatemê?

²⁴ Kalinetuinak maliklugo erᴋartuiniarase, erᴋartuinermigle idluartomik erᴋartuileritse.

²⁵ Tagva Jerusalemiut illangit oᴋarput: Tâmnaungilâk toᴋonasuartangât?

²⁶ Ahâglo agviartaunane oᴋâlavok, inertingilâllônêt. Angajoᴋâvut tukkisimarilerᴋât mâna, tâmna ᴋolarnangitomik Kristûseongmât?

²⁷ ᴋaujimavogulle, tâmna nakit pingmangât; Kristûsele tikipat, ᴋaujimajoᴋarniangilak, nakit pingmangât.

²⁸ Tagva Jêsuse katimaviksoarme nipperᴋortovlune ajoᴋertuilerpok oᴋarlunelo: Âhaila ilitarivapsinga, ᴋaujimavoselo nakit pingmangârma; uvamniglo tikisimangilanga, mikserᴋartotôvorle tilijiga ilitaringitase.

²⁹ Uvangale illitarivara; tâpsomangat pigama, uvamniglo tiliklilauᴋpok.

³⁰ Tagva tigunasuarpât; aktuijoᴋangilarle tâpsominga Stûndinga tikisimangimat sulle.

³¹ Inuille unuktut okperivât, oᴋarlutiglo: Kristûse tikikune, ôma piniarnerijanginit tatamnartulinersauniarᴋâ?

³² Farisêerillo tusaumalerput, inuit taimâk oᴋautigingmatsuk. Tagva Farisêerit ajoᴋertuijoᴋsuillo kivganik tiliklerput, tigujauᴋovlugo.

³³ Tagva Jêsusib oᴋautivait: Sule anikitomik najorniarpapse, kingorngagullo tâpsomunga ainiarpunga tilijimnut.

³⁴ ᴋeneromârpapsinga nenninangalo; najugaralo tikitsungnangilase.

³⁵ Tagva Jûdit ingmingnut oᴋarput: Namut aijomavâ una, nennijaksaringinaptigô? Grîᴋinut, sunatuinarnut siamangajunut aijomavâ, Grîᴋit ajoᴋertoriartorlugît?

³⁶ Oᴋausingit ᴋanok tukkeᴋarᴋât? oᴋarame: ᴋeneromârpapsinga nenninangalo; najugaralo tikitsungnangilase!

³⁷ Uvloᴋsiorviuble tamattoma uvlungita kingorlerpângane, ᴋuvianernerpângane, Jêsuse nikovipok, nipliarlunelo oᴋarpok: Imeruktoᴋarpat, ᴋailerle uvamnut, imerlunelo!

³⁸ Uvamnut okpertub timinganit, sôrlo aglaksimangmat, kôt inôgumik imalit kôleromârput.

³⁹ Taimagle oᴋarpok Anernek pitjutigilugo, okperijingita tunergusiaksangat; Anernek ajunginek tikisimangimat sule, Jêsuse ânanausijaungimat sule.

⁴⁰ Inuille unuktut, oᴋautsinik tamakkoninga tusartut; oᴋarput: Tâmna nelautaijôvok idluartok.

⁴¹ Asingille oᴋarput: Kristûseovok. Ilangit oᴋarput: Kristûse Galilêamit tikituksauvâ?

⁴² Aglait imaingilât: Dâvidib kinguvânginit, iglugasangnit Betlehemit, Dâvidib najugarilauᴋtanganit, Kristûse tikituksaungmât?

⁴³ Taimâk inuit akkerartortigêlerput tâmna pivlugo.

⁴⁴ Ilangitale tigujomagalloarpât; aktuijoᴋangilarle tâpsominga.

⁴⁵ Kivgat ajoᴋertuijoᴋsoarnut Farisêerinullo tikiput. Tapkoalo oᴋautivait: Sôk ᴋaingipisiûk?

⁴⁶ Kivgat kiovut: Oᴋâlajoᴋalaungimarikpok sule inungmik, inuktut ipsotunak.

⁴⁷ Tagva Farisêerit kiovait: Ilipsetauk uivêrijauvisê?

⁴⁸ Angajoᴋât Farisêerillônêt ilangata okperivaûk?

⁴⁹ Inuille, perᴋojanik ᴋaujimangitut, ôminarneraraksauvat.

⁵⁰ Tagva Nikodêmusib, unnuangotilugo (Jêsusib) nelipsartigilauᴋtangata, tapkoalo illangata oᴋautivait:

⁵¹ Perᴋojat pigijavut maliklugit inungmik erᴋartuijuksauvitâ, kiglisiniartauᴋârtinago tukkisijauᴋârtinagolo piniarninginîk?

⁵² Tâpkoa kiovât oᴋautivlugolo: Galilêamiôgivêt? kiglisiniarit takolutillo, Galilêamit nelautaijomik pijoᴋangilak.

⁵³ Taimâk ilûnnatik angergalerput.