Johannese 6 - Labrador Inuttitut Heritage Bible

Kristûsib nerrititsinganik 5,000 inik. Arvertarninganik imiub ᴋângagut. Oᴋâlaninganik nerrinermik timinganik, imernermiglo aunganik.

¹ Mattoma kingorngagut Jêsusib Galilêab tesseᴋsoanga, tagva Tibêriasib tesseᴋsoanga ikârvigivâ.

² Inugasaksuillo malikpât, tatamnartitangit takolauᴋtatik pivlugit, pinialauᴋtangit ᴋanimajunut.

³ Jêsusele ᴋakᴋamut majorarpok, tagvungalo ingitsartorlune ilinniartine illagilugit.

⁴ Aularviksiorvigle Jûdit uvloᴋsiorvingat ᴋaglilerpok.

⁵ Tagva Jêsuse takosarpok takolunelo inugasaksoarnik tikitiminik, Filippûsemullo oᴋarpok: Nakit ᴋakᴋôjaksarsiniarpitâ makkoa nerᴋiksanginîk?

⁶ Taimagle oᴋarpok oktoromavlugo; ᴋaujimagalloarame piniaromajaminik.

⁷ Filippusib kiovâ: ᴋakᴋôjat kênaujarsungnut 200 inut pisiangovaktut inuit tâpkoa amigarivait, mikijomiglônêt atunit pigalloarunik.

⁸ Ilinniartingita illangata, Andrêasib, Sîmonib Pêtrusib nukangata, oᴋautivâ:

⁹ Nukappiaᴋarpoᴋ ovane ᴋakᴋôjânik tellimanik mingeriangniglo maggûngnik pilingmik; kisianele unuktoᴋsoarnut tâpkoa suglunarput.

¹⁰ Jêsusible oᴋautivait: Inugasaksuit ikterᴋosigik. Iviksukaᴋarporle tagvane unuktunik. Tagva ikterput 5,000 ikasait.

¹¹ Jêsusible ᴋakᴋôjat tiguvait, ᴋujalivlunelo ilinniartiminut tunivait, ilinniartulle iksivajunut; taimâktauk mingeriangnit nâmagijaminik.

¹² ᴋâgungnailermattale, ilinniartine oᴋautivait: Amiakut katersorsigik, assioᴋarᴋonago.

¹³ Tagva katersoilutik amârgaujat 12 it tattapait amiakunik, ᴋakᴋôjanit tellimanit, nerrilauktut kikilauktanginik.

¹⁴ Inuit Jêsusib tatamnartitanga tamanna takogamitsuk, oᴋarput: Tâmna ilâ nelautaijôvok tikituksak silaᴋsoarmut.

¹⁵ Jêsusele malugosulerame, ᴋainajarmatta tigujomavlugolo, ataniotitsomavlugo, ama ᴋemâlerpok ᴋakᴋamut inutôvlune.

¹⁶ Unnulermalle ilinniartut atârput tesseᴋsûb kiglinganut.

¹⁷ Umiamullo ikivlutik ikârniarlutiglo Kapernaumut. Tâᴋsijarêrporlo, Jêsusiblo tikisimangilait.

¹⁸ Tesseᴋsoarlo mallilerpok akᴋunaksoarmut.

¹⁹ Epulauᴋârdlutik isaktanik 25,000 inik 30,000 iniglônêt ungasiktigijomut, Jêsuse imab ᴋângagut pisuktoᴋ umiablo ᴋanitanganut tikitok takovât erᴋsilerlutiglo.

²⁰ Tâpsomale oᴋautivait: Uvangauvunga, erᴋsinase!

²¹ Tagva umiamut ikerᴋolerpât; tagvainarlo umiab nuna aivigijomajatik tikisimalerpâ.

²² Uvlub aippangane inuit tesseᴋsûb miksânêtut takovut umiaᴋangimat asianik, ilinniartingita ikimavigijanganik kisianik, Jêsusiblo ilinniartine ikeᴋatigilaungimagit umiamut, ilinniartingit kisimik aulalaungmatta.

²³ Umiable assingit Tibêriasemit tagvunga pivut ᴋakᴋôjamik nerrimârvinganut Nâlekab ᴋujalininganut.

²⁴ Inuillo takogamik, Jêsuse tagvanêngimat, ilinniartingillônêt, umianut ikilerivut, Kapernaumullo tikilerlutik Jêsuselo ᴋenerlugo.

²⁵ Tesseᴋsûblo akiane nagvâramitsuk, oᴋautivât: Rabbi, ᴋanga tamaungarnerᴋêt?

²⁶ Jêsusib kiovait oᴋautivlugillo: Âhamarik, âhamarik oᴋaupapse tatamnartitakka takolauᴋtase, pivlugit ᴋenilungilapsinga; ᴋakᴋôjamigle nerrilaurapse kâgungnairluselo.

²⁷ Nerᴋiksamik nungusârtomik pinasuarase, inôtsemulle nungusuitomut itsainartomik, Inûb Erningata tuniniartanganik ilipsingnut; tâmna Gûdib Atâtab naᴋitjusilaungmago.

²⁸ Tagva oᴋautivât: Sumîk piniartuksauvitâ, Gûdib piniarᴋojanginik piniarungnarlutâ?

²⁹ Jêsusib kiovait oᴋautivlugillo: Tamadja Gûdib piniarᴋojanga, okperluse tâpsomunga tilijanganut.

³⁰ Tagva oᴋautivât: Sumîk tatamnartitsiniarᴋêt, takovluta okperilutillo pijungnarᴋovlutâ? Sumîk piniarᴋêt?

³¹ Sivorlivut Mannanik nerrilauᴋput inuᴋangitome, sôrlo aglaksimangmat: Tâpsoma ᴋakᴋôjamik tunitjivigivait, nerᴋiksanginik.

³² Tagva Jêsusib oᴋautivait: Âhamarik, âhamarik oᴋaupapse: Môsesib ᴋakᴋôjamik ᴋilangmit tunitjivigilaungilâse, Atâtamale ᴋaᴋᴋôjamik idluartomik tunitjivigivâse ᴋilangmit.

³³ Tamadja Gûdib ᴋakᴋôjanga, ᴋilangmit pijok, tunijijok silaᴋsoarmiunut inôtsemik.

³⁴ Tagva oᴋautivât: Nâlegak, ᴋakᴋôjamik, taimaitomik tunitjivigitsainartigut.

³⁵ Jêsusible oᴋautivait: Uvanga ᴋakᴋôjauvunga inôgutilik. Uvamnut ᴋaijok kângniarungnairpok; uvamnullo okpertok imerosungniarungnairpok.

³⁶ Oᴋautijarêrpapsele, takolaurapsinga, okperingilapsingalo.

³⁷ Ilûnnatik Atâtama ᴋaitangita uvamnut tikipânga; uvamnullo pijok aniti nagolo ajaktorniangilara.

³⁸ ᴋilangmit tikinama, pijomajaraungitok piniaromavlugo, tâpsomale tilijima.

³⁹ Tamadjale Atâtama tilijima pijomajanga, asiojoᴋarᴋonago tamainit, tunilauktanginit uvamnut, ômartitserᴋovlungale tâpkoninga uvlut naggatiksangane.

⁴⁰ Tamadjale tâpsoma tilijima pijomajanga, Erninganik takojok okperivlugolo nungusuitomik inôguteᴋarᴋovlugo; uvangalo ômartitsomârpara uvlut naggatiksangane.

⁴¹ Tagva Jûdit anûtigivât, oᴋarmat: Uvanga ᴋaᴋkôjauvunga ᴋilangmit tikitunga;

⁴² Oᴋarlutiglo: Jêsuseungilâk una, Jôsefib erningâ? atâtangalo anânangalo illitaringilavût? ᴋanorle oᴋarᴋâ: ᴋilangmit tikitungâ?

⁴³ Jêsusib kiovait oᴋautivlugillo: Anûtjiᴋatigêngniarase!

⁴⁴ Uvamnut tikitoᴋarungnangilaᴋ, Atâtab tilijima amuangipago; uvangalo ômartitsomârpara uvlut naggatiksangane.

⁴⁵ Nelautaijut aglangine aglaksimavok: Ilûnnatik ajoᴋertortaumajôjomârput Gûdemut. Atâtamillo tamattominga tusartoᴋ ilinniarlugolo, tâmna ᴋaijungnarpok uvamnut.

⁴⁶ Atâtamik takomajoᴋangilak; Gûdemit pijub kisime Atâta takolaukpâ.

⁴⁷ Âhamarik, âhamarik, oᴋaupapse: Uvamnut okpertok, nungusuitomik inôseᴋarpok.

⁴⁸ Uvanga ᴋakᴋôjauvunga inôgutilik.

⁴⁹ Sivorlise Mannanik nerrilaukput inuᴋajuitome toᴋovlutiglo.

⁵⁰ Tamadja ᴋakᴋôjak, ᴋilangmit tikitok, tamattomangat nerrijok, toᴋoᴋonago.

⁵¹ Uvanga ᴋakᴋôjauvunga ômanartok, ᴋilangmit tikitok. ᴋakᴋôjamit tamattomangat nerriniartok, inôniarpok isoᴋangitomut. ᴋakᴋôjarlo tuniniartara, uvinigivara, tuniniartara, silaᴋsoarmiut inôᴋovlugit.

⁵² Tagva Jûdit akkerartortigêlerput oᴋarlutiglo: ᴋanok ôma uviningminik nerrititsungnarpâtigût?

⁵³ Jêsusib oᴋautivait: Âhamarik, âhamarik oᴋaupapse: Inûb Erningata uvininga nerriniangikupsiuk, aungalo imernago, inôseᴋarungnangilase ilupsingne.

⁵⁴ Uvinimnik nerrijok, aumniglo imertok, nungusuitomik inôguteᴋarpok, uvangalo ômartitsomârpara uvlut naggatiksangane.

⁵⁵ Uviniga ilâ nerᴋiksaungmat, augalo ilâ imiksauvlune.

⁵⁶ Uvinimnik nerrijok, aumniglo imertok uvamnêtsainarpok, uvangalo tâpsomanêpunga.

⁵⁷ Sôrlo Atâtab ômajub tilingmanga, uvangalo inôgama Atâta pivlugo: taimâktauk uvamnik nerrijok inôniarivok pivlunga.

⁵⁸ Tamadja ᴋakᴋôjak, ᴋilangmit tikitok; imângungitok, sivorlise Mannanik nerrilaungmattatut, toᴋovlutiglo. ᴋakᴋôjamik tamattominga nerrijok inôniaromârpok isoᴋangitomut.

⁵⁹ Tamattominga oᴋâlavok katimavingme, ajoᴋertuigame Kapernaume.

⁶⁰ Ilinniartingitale unuktut, tamanna tussaramitsuk, oᴋarput: Oᴋautsit tamakkoa sôngudlarput; kia tusarungnarᴋagît?

⁶¹ Jêsusele ilumigut malugosulerame, ilinniartingita tamanna anûjutigingmatsuk, oᴋautivait: Tamanna sinaungajutigivisiûk?

⁶² ᴋanôk, Inûb Erninga takojomârupsiuk ᴋongmuartok takpikunga itsainarvingminut sivornganê?

⁶³ Anernek tagva ômartitsijok! Uvinik piungilak. Oᴋautsit oᴋauserijakka anerniovut inôgutaularmiglo.

⁶⁴ Akunapsingnêtoᴋarporle illanginik okpingitunik. Jêsuse pigiarninganit ᴋaujimatsiaralloarmat, nelît okpingimatta, neliatalo pititsomârmago.

⁶⁵ Oᴋarporlo: Tamanna pivlugo oᴋautilauᴋpapse: Uvamnut tikitoᴋarungnangilak, Atâtamut tamattominga tunitjiviogune kisiane.

⁶⁶ Taimangat ilinniartingita unuktut tunupât ingergaᴋatigijungnairlugolo.

⁶⁷ Tagva Jêsusib 12 it oᴋautivait: Ilipsetauk aularomagivisê?

⁶⁸ Tagva Sîmonib Pêtrusib kiovâ: Nâlegak, namût aijuksauvitâ? Igvit oᴋauseᴋarpotit nungusuitomik inôgutilingnik.

⁶⁹ Uvagullo okpilauᴋpogut illitarsilerlutalo, Kristûseogavit, Gûdib ômajub Erninga.

⁷⁰ Jêsusib kiovâ: Uvanga 12 iojose anerilaungilapsê? Illaselo atausek Sâtanaseovok.

⁷¹ Jûdasele Iskâriot, Sîmonib (erninga) oᴋautigivâ; tâpsoma kingorngagut pitipâ; tâmnalo 12 it illangat.