Johannese 5 - Labrador Inuttitut Heritage Bible

Jêsusib Sabbateme Jârinik 38 inik ᴋanimalauᴋtok âᴋikpâ. Jûdit tamanna pivlugo unangmilugo pijut oᴋaᴋatigivait suangavlugillo.

¹ Mattoma kingorngagut Jûdit uvloᴋsiorveᴋarmatta, Jêsuse majorarivok Jerûsalemut.

² Jerûsaleme saukat iterᴋattarvingata kiglingane tesseᴋarpoᴋ, Ebrêeritut taijamik Betesdamik, tellimaniglo iglotalingmik.

³ Tamakkonane ᴋanimajut unuktut nelavut, tautungitut, tusiaktullo, uvinêrutisimajullo. (Tâpkoa utaᴋivut imiub aulatitauniarninganik.

⁴ Engele akᴋarpangmat tessermut, neliuninga neliutijarangat, imanganik aulatitsijartorlune. Neliat tagva sivorliovlune imiub aulatitauningata kingorngane misiktok tagvunga, tâmna pijungnailerpok, sumiglônêt ᴋanimasermik pilik).

⁵ Inuᴋarporle tagvane Jârinik 38 inik ᴋanimavlune Nêlalauᴋtomik.

⁶ Jêsusible tâmna nelajok takogamiuk, tussaramelo, Taimâk sivitutigijomik nelalaungmat, oᴋautivâ: Pijungnaileromavêt?

⁷ ᴋanimajûb oᴋautivâ: Nâlegaᴋ, inuᴋangilanga, imek aulajarangat, misiktitsijiksamnik tesermut; tikikumalo assima ingiarpânga.

⁸ Jêsusib oᴋautivâ: Makitit, aumititillo tigulugit aularit.

⁹ Tagvainarlo inuk tâmna pijungnailerpok, aumitinelo tigulugit aularpok. Uvlorle tamanna Sabbateovok.

¹⁰ Tagva Jûdit pijungnailauᴋtok oᴋautivât: Uvlome Sabbateovok; idluangilak aumititit nangmarangne.

¹¹ Tâpsoma kiovait: Pijungnaititima oᴋautivânga: Aumititit tigukit aularlutillo.

¹² Tagva aperivât: Inuk imna kinauvâ, oᴋautjît: Aumititit tigukit aularlutillo?

¹³ Pijungnailertuble ᴋaujimangilâ, kinaungmangât; Jêsuse ᴋemailaungmat, inuliksôngmat tagvane.

¹⁴ Kingorngagut Jêsusib katimaviksoarme naipipâ, oᴋautivlugolo: Udjertulerit; pijungnairpotit; idluitulijungnairit, sôngonersamik sugiartauᴋonak.

¹⁵ Inuk tâmna aivok, Jûdillo oᴋautijartorlugit, Jêsuseongmat pijungnaititine.

¹⁶ Tamanna pivlugo Jûdit Jêsuse unangmivât toᴋotsomavlugo, taimailiulaungmat Sabbateotilugo.

¹⁷ Jêsusible kiovait: Atâtaga mânamut tikidlune piniarpok uvangalo piniarivunga.

¹⁸ Tamanna pivlugo Jûdit piganerterluarlutik toᴋotsomavât, Sabbate isumagingimago kisianeungitok, oᴋarmingmalle: Gûde atâtagigamiuk, ingminiglo Gûdemut adsiotilune.

¹⁹ Tagva Jêsusib kiovait oᴋautivlugillo: Âhamarik, âhamarik oᴋaupapse: Ernek ingminik piniarungnangilak sumik, takojaminik Atâtamit kissênik; tâpsoma piniarutigijanga Ernerubtauk taimaluatsiak piniarutigivâ.

²⁰ Atâtab Ernine erdligivâ piniarninelo tamaita takojautipait tâpsomunga, sullelo piniarnerit pijariaᴋortunersat takotitjutiginiarpait tâpsomunga, tataminiarutigijaksapsingnik.

²¹ Sôrlo Atâtab toᴋungajut tupaktingmagit, ômartilugillo, taimâk Erningatauk ômartitsivok pijomajaminik.

²² Atâta erᴋartuingimat kimiglônêt, Erninele erᴋartuijungortilauᴋpâ tamainik.

²³ Ernek ilûnainut nâlektauᴋovlugo, sôrlo Atâta nâlengmatsuk. Ernermik nâlengitok Atâtamiktauk nâlenginivok tilijinganik.

²⁴ Âhamarik, âhamarik oᴋaupapse: Oᴋausimnik tussartok, okperilugolo tilijiga, tâmna inôseᴋarpok nungusuitomik, erᴋartuivingmullo piniangilak, toᴋomille inôtsemut nuktersimavok.

²⁵ Âhamarik, âhamarik oᴋaupapse: Stûnde neliutsomârpok, neliutijarêrporlo, toᴋungajut Gûdib Erningata nippinganik tussarvingat; tamattomingalo tussartut inôniarput.

²⁶ Sôrlo Atâta inôseᴋarmat ingmine, taimâktauk Ernine tunitjivigivâ inôseᴋarᴋovlugo ingmine.

²⁷ Pitsartunermiglo tunitjivigivâ, erᴋartuirᴋovlugotauk, Inûb Erneringmago.

²⁸ Tataminiarutiginasiuk tamanna. Stûnde neliutsomârmat ilûnatik iluvernêtut tussaromârviksangat tâpsoma nâppinganik;

²⁹ Anivlutiglo makitsomârput ajungitulilauᴋtut inônermut pijuksauvlutik, idluitulilauᴋtulle erᴋartuivingmut pijuksauvlutik.

³⁰ Uvamnik sumik piniarungnangilanga. Tussartaptut erᴋartuivunga, erᴋartuineralo idluarpok; pijomajara piniarutiginginapko, Atâtable tilijima pijomajanga.

³¹ Uvanga nangminimnik kigligiudsiguma, kigligiudsinera mikseᴋârtôngilak.

³² Assigale kigligiudsivok uvamnik; ᴋaujimavungalo, kigligiudsinek mikserᴋârtongmat, kigligiudsininga uvamnik.

³³ Ilipse tiliklilauᴋpose Johannesemut, tâmnalo mikseᴋârnermik kigligiudsilauᴋpok.

³⁴ Uvangale inungnut kigligiutjaujariaᴋangilanga; taimaitomigle oᴋautivapse, piulijaulerᴋovluse.

³⁵ Taimna nennergoangolauᴋpok ikomalik ᴋaumaijorlo; ilipsele anikitomik ᴋuviasûteᴋaromalauᴋpose ᴋaumaninganik.

³⁶ Uvangale pijariarᴋortunersamik kigligiutjuteᴋarpunga Johannesib kigligiutjininganit; piniarnerille, Atâtab ᴋailauᴋtangit uvamnut, nâjerᴋovlunga tamakkoninga, piniarnerit tamakkoa piniarutigijakka, kigligiutjivut uvamnik, Atâtab tilingmanga.

³⁷ Atâtalo tilijiga, tâmna kigligiutjivok uvamnik. Tâpsoma nippinga tussalaungimarikpase, tautualônêt takolaungilase.

³⁸ Oᴋausingalo ilumigingilase; okperinginapsiuk tâpsoma tililauᴋtanga.

³⁹ Aglangne ᴋeneritse; inôtsemik nungusuitomik pitaᴋarasugigapse tâpkonane; tâpkoangovullo kigligiutsijut uvamnik.

⁴⁰ Uvamnullo ᴋaijomangilase inôseᴋaromavluse.

⁴¹ Inungnut nertortaunasuangilanga.

⁴² Illitarivapsele, Gûdib naglingninganik ilumiuteᴋanginapse.

⁴³ Atâtama atingane tikipunga illaliungilapsingalo. Assiga tikipat attermine nangminermine, tâmna illaliorniarpase.

⁴⁴ ᴋanok okperungnarᴋisê, nertortaujomautigupse ilipsingnût? Nertornarnerlo Gûdemit kissianit pijok ᴋenernagô?

⁴⁵ Isumaniarase, uvanga Atâtab sângane passijomârapse. Pasiklertoᴋarpoᴋ ilipsingnik, Môsesemik ipsominga tattigijapsingnik.

⁴⁶ Môsese okperigupsiuk, okperinajarivapsinga; uvamnik aglalaungmat.

⁴⁷ Tâpsomale aglangit okperingikupsigik, ᴋanok oᴋausikka okperinajarpisigîk?