Johannese 4 - Labrador Inuttitut Heritage Bible

Arnamik Samâriamiomik. Ataniub kivgangata erningata âᴋiktauninganik Kapernaume Galilêamêtome.

¹ Nâlegarle tukkisilerame, Farisêerit tusaumalermatta, Jêsuse ununersanik ilinniarteotitsingmat, baptisingmallo Johannesemit,

² (Jêsuse nangminek baptisingigalloarmat, ilinniartimigulle,)

³ Tagva nuna Jûdêa ᴋemakpâ, Galilêamullo ingergarmilune.

⁴ Nunale Samâria apᴋotigijariaᴋarpâ.

⁵ Tagva Samâriab iglugasaksoangita illanginut tikipok, Siᴋaremik atilingnut, iglugasait, Jâkob tunilauᴋtangita ernerminut Jôsefemut ᴋanitanginêtunut.

⁶ Jâkoble imeᴋtarvinga tagvanêpok. Jêsusele ingerganerminut merngortorame, tagva imeᴋtarvingmut ingipok; stûndelo pingasujortôlerpok.

⁷ Tagva arnak Samâriamiok tikilerpok, imermik ᴋalujartorlune. Jêsusib oᴋautivâ: Imertilaunga.

⁸ (Ilinniartingille iglugasaksoarnut aimavut nerᴋiksarsiniaromavlutik)

⁹ Arnab Samâriamiub tagva oᴋautivâ: Sôᴋ ᴋenuvêt uvamnut imertitaunermik, Jûdiogavit, uvangale Samariamiut arnangita ilangât? (Samâriamiullo Jûdillo ingmingnut illagêngimatta).

¹⁰ Jêsusib kiovâ oᴋautivlugolo: Gûdib tunergutâ illitarilerungne, kinaungmangâllo ilingnut oᴋartok: Imertilaunga; tuksiarviginajarpat, tâpsomalo tunitjiviginajarpâtit imermik inôgutilingmik.

¹¹ Arnab oᴋautivâ: Nâlegak ᴋalutiksaᴋangilatillônêt; imeᴋtarviglo itingmat. Nakît inôgutilingmik imeᴋaralloarᴋêt?

¹² Anginersauvêt atâtaptingnit Jâkomit, tunijijomit imeᴋtarvingmik ôminga uvaptingnût? Nangminerle ômangat imilauᴋpok, ᴋitorngangillo nergjutingillo.

¹³ Jêsusib kiovâ oᴋautivlugolo: Imermik ôminga imertok imerulerniarivok.

¹⁴ Imermigle tunergusiarijaminik uvamnut imerniartok imerungniarungnairpok issoᴋangitomut; imerle tuniniartara tâpsomunga iluane puilavioniarpok imermik, inôtsemut nungusuitomut puilajomik.

¹⁵ Arnab oᴋautivâ: Nâlegak, imermik tamattominga tunitjiviginga, imerugungnairᴋovlunga, ovungartuksaujungnairᴋovlunga ᴋalujartorlunga.

¹⁶ Jêsusib oᴋautivâ: Ailerit, uit ᴋaiᴋolugo, ᴋailutillo ovunga.

¹⁷ Arnab kiovâ oᴋautivlugolo: Ueᴋangilanga. Jêsusib oᴋautivâ: Nellâgut oᴋarpotit: Ueᴋangilanga.

¹⁸ Tellimanik ueᴋalauᴋpotit, mânalo najortigijat uigingilat. Nelâgut oᴋarpotit.

¹⁹ Arnab oᴋautivâ: Nâlegak tukkisivunga nelautaijôgavit.

²⁰ Sivorlivut ᴋakᴋame tamâne tuksialauᴋput (Gudemut); ilipsele oᴋarpose: Jerusaleme kisiane tuksiarveᴋartuksaugapta.

²¹ Jêsusib oᴋautivâ: Arnak okperinga, neliutsomârpo ᴋakᴋame tamânelônêt, Jerusalemelônêt Atâtamut tuksiarveᴋarungnairvise.

²² Tuksiarvigijase nelovase; uvagulle tuksiarvigijavut nelungilavut; piulijiksak Jûdinit pingmat.

²³ Neliutsomârporle, neliutijarêrporlo tuksiartut nelâgôrtut Atâtamik tuksiarveᴋarvingat anernerme mikseᴋârnermelo; Atâtalo taimaitunik tuksiartiminik pijomavok.

²⁴ Gûde anerniovok, tuksiartingitalo anernerme mikseᴋârnermelo tuksiarvigijaksarivât.

²⁵ Arnab oᴋautivâ: ᴋaujimavunga, Messîase tikitsomârmat, Kristûsemik atilik; tâpsoma tikikune, tamainik oᴋautiniarpâtigut.

²⁶ Jêsusib oᴋautivâ: Tâmnauvunga, oᴋaᴋatigijat.

²⁷ Taimâk oᴋartilugo, ilinniartingit tikiput, tataminiarutigivâllo, arnak oᴋaᴋatigingmago. Oᴋangigalloarpulle: Sumîk apersornikêt? Ubvalo: Sôk oᴋaᴋatigiviûk?

²⁸ Tagva arnab imeᴋtautine ᴋemakpâ tagvunga, ailunelo iglugasaksoarnut, inuillo oᴋautivait:

²⁹ ᴋaititse, inuk takojartorsiuk, oᴋautjiga tamainik pinialauᴋtamnik, Kristûseungimangât.

³⁰ Tagva iglugasaksoarnit anilutiglo tikilerpât.

³¹ Tikerᴋârtinagit, ilinniartingita innapât oᴋarlutiglo: Rabbi, nerrilerît!

³² Tâpsomale oᴋautivait: Nerᴋiksaᴋarpunga ᴋaujimangitapsingnik.

³³ Tagva ilinniartit ingmingnut oᴋarput: ᴋaitsijoᴋalaunerᴋâ nerᴋiksanganîk?

³⁴ Jêsusib oᴋautivait: Tamadja nerᴋiksara, tilijima pijomajanga piniarutigilugo, piniarningalo pijarêrlugo.

³⁵ Nangminik oᴋalerpangilasê: Takᴋit sitamat nâkpatta, katersiveᴋalârpôᴋ? Ahâk, oᴋautivapse: Uititse, perorsêviglo takolersiuk; perortut ᴋaᴋorsijarêrput katitaksauvlutik.

³⁶ Kibluijorlo akkilertauniksarsivok, katersilunelo perortunik inôtsemut nungusuitomut, ᴋuviasuᴋatigêngniarlutiglo karngasuijok kibluijorlo.

³⁷ Tamâne oᴋautsit nelautsingmatta: Tâmna karngasuivok, asia kibluivok.

³⁸ Uvanga tililauᴋpapse kibluerᴋovluse senalaungitapsingnik; asise senalauᴋput, ilipselo sulianginut tikipose.

³⁹ Samâriamiulle iglugasaksoarnit taipkonangat pijut unuktut okperivât, arnab oᴋausingit pivlugit, kigligiutjijub: Tâpsoma oᴋautilauᴋpânga tamainik pinialaungnimnik.

⁴⁰ Samâriamiulle tikinamitsuk, ᴋenuvigivât uvliviojomavlutik; uvlungniglo maggungnik tagvane uvlivok.

⁴¹ Ununersallo okpilerput oᴋausingit pivlugit.

⁴² Arnamullo oᴋarput: Okperapta oᴋautsitit pitjutigijungnairpavut, nangminek tusarapta tukkisilutalo, tâmna ilâ Kristûseongmat, silaᴋsoarmiut piulijingat.

⁴³ Uvluk maggûk nângmanik, tagvangat aularpok, Galilêamullo ingergalerdlune;

⁴⁴ Nangminerle Jêsuse kigligiutjivok, nelautaijok nunamine nakorijaungimat.

⁴⁵ Galilêamulle tikingmat, Galilêamiut illaliorpât, takolauktut tamainik piniarninginik Jerusaleme aularviksiorviotilugo. Aularviksiorvingmut tikilaungmigamik.

⁴⁶ Jêsuselo ama Kânamut Galilêamêtomut tikinivok, imermik vainiotitsivigilauᴋtaminut.

⁴⁷ Ataniuble kivgangita ilangata erninga ᴋanimavlune nelavok Kapernaume. Tâmna tusaumagame, Jêsuse Jûdêamit Galilêamut tikingmat, tuksiarvigijartorpâ atersârᴋovlugo, ernine âᴋiktauᴋovlugo, toᴋoniarᴋôrdlune ᴋanimangmat.

⁴⁸ Jêsusiblo oᴋautivâ: Nelunaikutanik tatamnartuniglo takungikupse, okperomangilase.

⁴⁹ Ataniub kivgangata oᴋautivâ: Nâlegak, atersâlaurit ᴋitorngara toᴋoᴋârtinago.

⁵⁰ Jêsusib oᴋautivâ: Ailerit, ernît inôvok. Angullo tâmna oᴋautsemik oᴋarvionerminik Jêsusemut okperpok ailerlunelo.

⁵¹ Atersârtilugolo, kivgangita pâᴋpât, nelojungnaitilugolo oᴋautivât: ᴋitgorngat inôvok.

⁵² Tagva kiglisiniarpait stûndemik nakornersaulervigilauᴋtanganik. Oᴋautivâllo: Ippaksak, stûndit 7 oningane ôlingnartub ᴋemakpâ.

⁵³ Tagva atâtanga tukkisivoᴋ, stûnde tâmnaungmat, oᴋautjauvine Jêsusemut: Ernît inôvok. Okpilerporlo iglomioᴋatine ilûnaita illagilugit.

⁵⁴ Tamadja Jêsusib tatamnartitangata aippanga, Jûdêamit Galilêamut tikiname.