Johannese 21 - Labrador Inuttitut Heritage Bible

Jêsusib sakᴋerninganik ilinniartiminut Tibêriasib teseksoangata seniane. Jêsusib, Pêtrusiblo, Johannesiblo oᴋaᴋatigêngningat.

¹ Mattoma kingorngagut Jêsuse sakᴋerivok ilinniartiminut Tibêriasib teseksoangata seniane. Imailiorlunele sakᴋerpok.

² Ilagêklutik tagvanêput Sîmon Pêtruse, Tômaselo Maggôliavinermik taijak, Natanaêlelo, Kanamit Galilêamêtomit pijok, Zebedêusiblo ernîgik, asîgiglo Maggûk ilinniartingita ilâgik.

³ Sîmonib Pêtrusib oᴋautivait: Nuluarniariartoromavunga. Tâpkoa oᴋautivât: Tagva ilagijomavaptigit. Anilutiglo, umiarmut ikisâdlalerput, unnuamelo tamattomane nuluartitsilungilat.

⁴ Uvlângolertilugole, Jêsuse sidjame nangerpok, ilinniartullo ᴋaujimangilat Jêsuseongmat.

⁵ Jêsusib oᴋautivait: ᴋitorngat, nerᴋiksaᴋangilasê? Tâpkoa kiovât: Âhailâ.

⁶ Tâpsomale oᴋautivait: Nulutjat ningitisigik umiab talerpianut, nagvârniarpose tagva. Tagva ningitipait, amuarungnarungnailugillo mingeritjat unurninginut.

⁷ Tagva ilinniartûb, Jêsusib nagliktangata, Pêtruse oᴋautivâ: Nâlegak una. Sîmonib Pêtrusib tusaramiuk, Nâlegaungmat, uvinerune atilerpâ (annorailaurame), imânullo misikpok.

⁸ Ilinniartut asingit umiakut ᴋailerput (nuna ungasinginamitsuk ablornernik 200 inik) nulutjallo mingeriaᴋtalit amuvait.

⁹ Nunamulle niuleramik, aumanik ilimajunik takovut, ᴋânganelo mingeritjanik ᴋakᴋôjamiglo.

¹⁰ Jêsusib oᴋautivait: ᴋaitsileritse mingeritjanit mâna nuluartitapsingnit.

¹¹ Sîmon Pêtruse iperârpok, nulutjallo amuvait nunamut tattatut mingeritjanik angijunik 153 nik. Taimâglo unuktigigalloarmatta, nulutjat aliktaungilat.

¹² Jêsusib oᴋautivait: ᴋaititse nerrimârluselo. Ilinniartingitale neliatalônêt aperijariaᴋangilâ: Kinauvêt? ᴋaujimagamitsuk, Nâlegaungmat.

¹³ Tagva Jêsusib ᴋakᴋôjak tigujartorpâ, tunilâllo tâpkonunga, taimâktauk mingeritjat.

¹⁴ Tamadja pingajuat Jêsusib sakᴋerlaungningita ilinniartiminut, toᴋungajunit makiningata kingorngane.

¹⁵ Nerrijarêramigle, Jêsusib Sîmon Pêtruse oᴋautivâ: Sîmon, Jônasib erninga, ukunangat nagliginersarivingâ? Tâpsoma oᴋautivâ: Âhailâ Nâlegak, nelungilarma nagligigapkit. Oᴋautivâ: Saugârsukka nerritiniakit.

¹⁶ Aippânik oᴋautivâ: Sîmon, Jônasib erninga, naligivingâ? Tâpsoma oᴋautivâ: Âhailâ Nâlegak nelungilarma nagligigapkit. Oᴋautivâ: Saugakka nerritiniakit.

¹⁷ Pingajuangnik oᴋautivâ: Sîmon, Jônasib erninga, nagligivingâ? Pêtrusib kiksalerpok, pingajuangnik oᴋautingmago: Nagligivingâ? Oᴋautivâlo: Nâlegak, tamainik ᴋaujimavotit, nelungilarma nagligigapkit. Jêsusib oᴋautivâ: Saugakka nerritiniakit.

¹⁸ Âhamarik, âhamarik oᴋaupagit: Inôsungnersautilutit, nangminernik tapserusilaukpotit, arvertarlutillo pijomajarnut; itôleruville, aggaktit isagomârpatit, asivîllo tapseruseromârpâtit, tesiorlutillo pijomangitarnut.

¹⁹ Taimâgle oᴋarpok nelunaijailune, toᴋûb ilusingita nelianut Gûde nertoromârmangâgo. Taimâglo oᴋarêrame, oᴋautivâ: Malingâ!

²⁰ Pêtrusele ᴋevialerpok, ilinniartorlo Jêsusib nagliktanga maliktok takovâ, sagvinganullo êgangalauktok unnungme nerrivlutik, oᴋalauktorlo: Nâlegak, ilingnik pititsiniartok kinauvâ?

²¹ Pêtrusib tâmna takogamiuk, Jêsuse oᴋautivâ: Nâlegak, unale ᴋanok ilingajuksauvâ?

²² Jêsusib oᴋautivâ: Pijomaguma tagvanêᴋovlugo tikitsiarilunga, erᴋanangilak ilingnut! Igvit malinga!

²³ Tagva ᴋatangutigêt ingmingnut oᴋalerput: Ilinniartok una toᴋoniangilak. Jêsusible oᴋautilaungilâ: Toᴋoniangilak; imâgle: Pijomaguma tagvanêᴋovlugo tikitsiarilunga, erᴋanangilak ilingnut.

²⁴ Ilinniartok tâmnauvok tamakkoninga kigligiutjijok, tamakkoalo aglalaukpait. ᴋaujimavogullo kigligiutjiningit mikseᴋârtôngmatta.

²⁵ Asingillo unuktut Jêsusib piniarnerilauktangit ilûnnatik kingorlerêklutik aglaktaunajarpatta, silaksoarmiut aglangnik aglagutiksaujunik tukisinajarasugingilakka.