Johannese 20 - Labrador Inuttitut Heritage Bible

Kristûsib makininganik sakᴋerninganiglo Marîa Magdalênamut, ilinniartunullo, Tômasemullo.

¹ Vogib uvlungita sivorlerpângane Marîa Magdalêna tikilerpok iluvermut tâᴋtilugo sulle, takolunelo, ujaraksoak aksakâtitaunermat iluvermit.

² Tagva aᴋpangerdlune Sîmon Pêtruse tikipâ, ilinniartublo aippanga Jêsusib nagliktanga, oᴋautivlugiglo: Nâlegak aᴋsârnigarinerpât iluvermit, nelovavullo, namut ilingmangâtsuk.

³ Tagva Pêtruse asingalo ilinniartok anilerpuk, iluvermullo ailutik.

⁴ Tamarmiglo aᴋpangeᴋatigêkpuk, asiatalo ilinniartûb ingiarpâ, sukalinersauvlune Pêtrusemit, sivorliovlunelo iluvermut tikipok.

⁵ Iluanut itsuarlune uvineruksajat ilimajut takovait, iteranele.

⁶ Tagva Sîmonib Pêtrusib malikpâ, iluvermullo iterlune, uvineruksajallo ilimajut takovait,

⁷ Kidjijârnerublo alarutâ, Jêsusib niaᴋoanut tapsiolauktoᴋ, uvineruksajanut ilimangitok, ingmigulle imumajok, apsimavlune.

⁸ Tagva ilinniartok (Pêtrusib) asia, tikerᴋâlauktok iluvermut, iterivok, takolunelo okperpok.

⁹ Aglait ᴋaujimanginamigit sule, toᴋungajunit makitsariaᴋarmat.

¹⁰ Tagva ilinniartuk aulaᴋatigêlerivuk.

¹¹ Marîale iluviub sângane nangerpok, ᴋeavlunelo silatâne. ᴋeagamelo, iluvermut itsuarpok.

¹² Engelîglo maggûk, ᴋaᴋortângnik annorâlîk, iksivajuk takovak, atausek niaᴋungata iningane, aippangale itigangita iningane, Jêsusib timingata ilijauvigilauktangane.

¹³ Tâpkoalo oᴋautivâk: Arnak, sôk ᴋeavît? Oᴋautivâk: Nâlegara aᴋsârnigarinerpât, nelovungalo, namut ilingmangâtsuk.

¹⁴ Taimâglo oᴋarame, ᴋeviarpok, Jêsuselo nangertok takovâ, nelovlunelo Jêsuseongmat.

¹⁵ Jêsusib oᴋautivâ: Arnak, sôk ᴋeavêt? Kina ᴋenerpiûk? Perorsêvilerijeonasugigamiuk, oᴋautivâ: Nâlegak, nûlaurungne, oᴋautilaunga, namut ilingmangângne. Tagva aijomavara.

¹⁶ Jêsusib oᴋautivâ: Marîa! Tagva ᴋeviarlunelo oᴋautivâ: Rabbûni; imaipok: Ajoᴋertuijok.

¹⁷ Jêsusib oᴋautivâ: Aktorniarnanga, takpaungarsimanginama sule Atâtamnut. Ailerille ᴋatangutimnut oᴋautilugillo: Takpaungarniarpunga Atâtamnut Atâtapsingnullo, Gûdimnut Gûdipsingnullo.

¹⁸ Marîa Magdalêna tikilerpok, ilinniartullo oᴋautivait: Nâlegak takolaukpara, taimâglo oᴋautilaukpânga.

¹⁹ Vogib uvlungita sivorlerpângata unnulerningane ilinniartut katimatilugit, upkuallo parngnanairsimatilugit, Jûdit erᴋsigigamigit, Jêsuse tikipok, akornganelo nangerpok, oᴋautilugillo: Ulapirsauteᴋaritse!

²⁰ Taimâglo oᴋarame, agganelo seneranelo ᴋemergojautipait tâpkonunga. Tagva ilinniartut ᴋuviasulerput, Nâlegaᴋ takogamitsuk.

²¹ Tagva Jêsusib ama oᴋautivait: Ulapirsauteᴋaritse! Sôrlo Atâtab tilingmânga, taimâk tilivapse.

²² Taimâglo oᴋarame, suporpait, oᴋautivlugillo: Anernek ajunginek pigilersiuk!

²³ Isumagijungnaitase ajorninginit, isumagijaujungnaineᴋarput; isumagijungnainiangitaselo ajorninginit isumagijaujungnaineᴋangilat.

²⁴ Tômasible, 12it ilangata, maggôliavinermik taijab ilagingilait, Jêsuse tikitilugo.

²⁵ Tagva ilinniartut asingita oᴋautivât: Nâlegak takolaukpavut. Tâpsomale oᴋautivait: Aggangine kikiaktornerit takungikupkit tikeralo ilingikupko seneranganut, okperijâmangilara.

²⁶ Uvlullo sitamaujortut nângmatta, ilinniartut ama ᴋamanêlerivut, Tômasiblo ilagivait. Jêsuse tikipok, upkuat parngnanairsimatilugit, akornganelo nangerpok oᴋarlunelo: Ulapirsauteᴋaritse!

²⁷ Kingorngagut Tômase oᴋautivâ: Tikît ᴋaitsuk, aggakkalo takolikit; aggaktillo isakkit ovunga, ililugillo senerᴋamnut; okpinginaglo, okperille!

²⁸ Tômasib kiovâ oᴋautivlugolo: Nâlegara Gûdigalo!

²⁹ Jêsusib oᴋautivâ: Takogamga, Tômase, okperpotit. Piloridlarput takolugatik okpertut!

³⁰ Tatamnartutauᴋ asingit unuktut Jêsusib piniarnerivait ilinniartime takoane, aglaksimangitut aglangne tamakkonane.

³¹ Tamakkoale aglaksimavut, okpilerᴋovluse, Jêsuse Kristûseongmat, Gûdib Erninga; okpernermullo inôseᴋarᴋovluse tâpsoma atingane.