Johannese 2 - Labrador Inuttitut Heritage Bible

Jêsusib tatamnartulininganik sivorlerpâmik Kaname Galilêamêtome. Aularviksiorvingmik Jerûsaleme. Tempelib sujungaititauninganik. Jûdit nelunaikutamik takojomaninginik.

¹ Uvluk pingajuangne nuliarêlitainartoᴋarpok Kaname Galilêamêtome; Jêsusiblo anânanga tagvanêpok.

² Jêsusele ilinniartingillo ᴋaiᴋojaugivut nuliarêlitainartungnut.

³ Vainelo amigarmat, anânangata Jêsuse oᴋautivâ: vaineᴋarungnairput.

⁴ Jêsusib oᴋautivâ: Arnaᴋ suliarpîk ilingnût? Stûndiga tikisimangilak sulle.

⁵ Anânangata kivgat oᴋautivait: Oᴋausingit ilipsingnut piniarutigisigik.

⁶ Tagvanele ilijaumajoᴋarpok imeᴋarvingnik ujarᴋanik pingasujortunik, Jûdit sujungairsautingita ilusingititut; tâpkoa maggûngnik pingasuniglônêt ôktuteᴋasôngovut.

⁷ Jêsusib oᴋautivait: Imeᴋarvît ukua imertulersigik. Tâpkoalo imertorpait ullipkidlugit.

⁸ Oᴋautivaillo: Kalutitse mâna, âtsiluselo nerᴋiksaliortomut. Atsilerpullo.

⁹ Nerᴋiksaliortuble vaine imetuinaulauᴋtok ôgamiuk, (ᴋaujimananelo, nakit pingmangât, kivgalle imermik ᴋalulauktut ᴋaujimavât,) nerᴋiksaliortub uiksak ᴋaiᴋovâ,

¹⁰ Oᴋautivlugolo: Ilûnnatik vaine mamarnek sivorlermik ᴋaipât; ᴋaiᴋojaujullo imerugungnairpatta, mamanginersak ᴋaipât; igvit vaine mamarnek kingorliotipat.

¹¹ Tamadja Jêsusib tatamnartitangita sivorlerpângat, piniartok Kaname Galilêamêtome, ajugaᴋanginine saᴋᴋertiniaramiuk. Ilinniartingitalo okperivât.

¹² Mattoma kingorngagut Kapernaumut atârpoᴋ, nangminek, anânanelo, ᴋatangutinelo, ilinniartinelo illagivlugit; tagvanelo akunêngilat.

¹³ Jûdillo aularviksiorvingat ᴋaglilerpok; Jêsuselo Jerusalemut majorarpok.

¹⁴ Katimaviksoarmelo tuktuvangnik, saukaniglo, taubiniglo niorvgutilit naipipait, kênaujaniglo tauᴋsêjut.

¹⁵ Aklunâniglo iperautsiorpok, ilûnnaitalo anitipait katimaviksoarmit, saugallo tuktuvaillo illaliudlugit, kênaujaniglo tauᴋsêjut kênaujaᴋotingit serᴋitivait, sângillo ochotidlugit.

¹⁶ Taubiniglo niorvgutilit oᴋautivait: Tamakkoa anitisigik, atâtamalo iglunga niuverviotiniarasiuk.

¹⁷ Ilinniartingitalo erᴋarpât aglaksimangmat: Ilungertornerub iglut pivlugo nungutipânga.

¹⁸ Tagva Jûdit kiovât oᴋautivlugolo: Sumik tatamnartitsivigijomavitigût taimailiorungnarnernût?

¹⁹ Jêsusib kiovlunelo oᴋautivait: Katimavik una asserorsiuk; uvluglo pingajuangne napartitsomagivara.

²⁰ Tagva Jûdit oᴋarput: Katimavik una jârine 40 ine senajaumavoᴋ, igvillo uvlune pingasune napartitsomajât?

²¹ Timiminigle oᴋarpok tailugo katimavingmik.

²² Toᴋungajunille makisimangmat, ilinniartingita erᴋarpât, tamanna oᴋautigilaungmago; aglaillo, Jêsusiblo oᴋauserilauᴋtangit okperivait.

²³ Aularviksiorveᴋarningane Jerusalemêtilugo, unuktut okpilerput atinganut, tatamnartitangit takogamigit.

²⁴ Jêsusible ingminik sungertorlungilait, ilûnnaita ilitarigamigit.

²⁵ Inungmiglo nelojungnaititaujariaᴋangilak kimullônêt; ᴋaujimatsiarame inûb ilumigijanginik.