Johannese 18 - Labrador Inuttitut Heritage Bible

Kristûsib tigujauninganik perorsêvingme. Kiglisiniartauninganik ajoᴋertuijoksoarmut. Pêtrusib missiarninganik. Jêsusib kiglisiniartauninganik Pilâtusemut.

¹ Jêsuse taimâk oᴋarêrame, ilinniartine illagilugit anivlunelo aularpok kôb Kidrônib, akianut; tagvane perorsêveᴋarpok, tagvunga Jêsuse ilinniartingillo iterput.

² Jûdasible pititiginiartangata tamanna nelunginivâ; Jêsuse ilinniartingillo tagvane katimaᴋattarmatta.

³ Jûdasib sorsuktuksat, ajoᴋertuijoᴋsuillo Farisêerillo kivgangit ilasearileramigit, tagvunga ᴋaivok, nennerutsoalijarlutik, nenneroalijarlarmiglo, sakkolijarlarmiglo.

⁴ Jêsusible tamaita piniarviolârnine ᴋaujimagamigit, anilerpok oᴋautivaillo: Kina ᴋenerpisiûk?

⁵ Kiovât: Jêsuse Nazaremiok, Jêsusib oᴋautivait: Uvangauvunga. Jûdasible pititiginiartangata illagivait.

⁶ Jêsusible oᴋautingmagit: Uvangauvunga; kingorpiosârdlutik nunamut niverput.

⁷ Tagva ama aperivait: Kina ᴋenerpisiûk? Oᴋarpulle: Jêsuse Nazaremiok.

⁸ Jêsusib kiovait: Oᴋautilaukpapse uvangaugama. ᴋenerupsingale, ukkua aularlit.

⁹ Oᴋautsit nelautsilerᴋovlugit oᴋauserilauktangit: Uvamnut tunilauktavit nelianik assiojoᴋangilanga.

¹⁰ Tagva Sîmonib Pêtrusib saviksoalijarame, tâmna amuvâ, ajokertuijoksûblo kivganga ullimavlugo, siutâ talerpia nakapâ. Kivgarlo tâmna Makusemik ateᴋarpok.

¹¹ Tagva Jêsusib Pêtruse oᴋautivâ: Saviksuit kênailitanganut pôleruk! Ermgusiarsûb, Atâtama tunijangata uvamnut, imanga imeraksaringilarâ?

¹² Sorsuktuksalle, angajoᴋâksoangatalo, Jûdillo kivgangita Jêsuse tiguvât ᴋelaksulâllo.

¹³ Sivorlermiglo Hannasemut aularuterᴋârpât, Kaifasib, jâreme tamattomane ajoᴋertuinerojub sakinganut.

¹⁴ Kaifasele tâmnauvok Jûdinut oᴋalauᴋtok, nakornersaungmat, inuk atausek toᴋotaupat inuit pivlugit.

¹⁵ Sîmonible Pêtrusib Jêsuse malikpâ, ilinniartublo, tâpsoma asiata. Ilinniartok tâmna ajoᴋertuijoksûb ilitarijanga, Jêsuselo ilagilugo iterpok ajoᴋertuijoksûb igloksoanganut.

¹⁶ Pêtruselo upkuab silatâne nangerpok. Tagva ilinniartok (Pêtrusib) assia, ajoᴋertuijoksûb illitarijanga anilerpok, arnarlo upkuamik udjertortok oᴋaᴋatigivâ, Pêtruselo itertipâ.

¹⁷ Tagva arnab, upkuab udjertortingata, Pêtruse oᴋautivâ: Inûb tâpsoma ilinniartingit ilagingilatît? Oᴋarpok: illagingilakka.

¹⁸ Kivgallo nangerdlutik ikomamik ikitsilaukpuk itjilidlarmat, kitjaᴋejârlutiglo. Pêtrusible nangeᴋatigivait, kitjaᴋejârlunelo.

¹⁹ Ajoᴋertuijoksûble Jêsuse apersorpâ ilinniartingit pivlugit, ajoᴋertûsingillo pivlugit.

²⁰ Jêsusib kiovâ: Agviartaunanga tusarnartomik oᴋâlalauᴋpunga silaksoarmiunut. Ilinniarvingnelo katimaviksoarmelo ajoᴋertuilaukpunga, Jûdit ilûnnatik katimavingine, oᴋâlalaungnangalo sumik sagvangitome.

²¹ Sôk tamattominga apersorpingâ? Ipkoa apersukit tusalauktut oᴋâlautigilauktamnik tâpkonunga; ahâk, taipkoa ᴋaujimavut oᴋauserilauktamnik.

²² Taimagle oᴋartilugo, kivgat tagvane nangertut ilangata Jêsuse erᴋsârpâ oᴋarlunelo: Ajoᴋertuijoasoak taimâk kiojaksariviûk?

²³ Jêsusib kiovâ: Idluitomik oᴋaruma, nelunailiuk ajormat; idluartomigle oᴋaruma, sôk erᴋsârpingâ?

²⁴ Hannasiblo ᴋelalsorsimatilugo tilikliutigivâ ajoᴋertuijoksoarmut Kaifasemut.

²⁵ Sîmon Pêtrusele nangerpok kitjaᴋejârlunelo. Tagva oᴋautivât: Ilinniartingit ilagingilatît? Misiarporle oᴋarlunelo: Ilagingilakka.

²⁶ Ajoᴋertuijoksûb kivgangita ilangata, ilaliub tâpsominga, Pêtrusib ulimalauktanganik siutingagut, oᴋautiva: Perorsêvingme ilagigangne takolaungilagît?

²⁷ Tagva Pêtruse ama misiarivok; tagvainarlo angutaunek niplerpok.

²⁸ Tagva Jêsuse aularutivât Kaifasemit iglûb kinglisiniarviub sânganut. Uvlângovorlo. Kiglisiniarvingmullo itingilat, ivjornaromanatik, saugârsugle aularviksiorutiksak nerrijomavlugo.

²⁹ Tagva Pilâtusib anivigivait, oᴋautivlugillo: Sumîk inungmut ômunga pasitiksaᴋarᴋisê?

³⁰ Kiovât oᴋautivlugolo: Una idluitulijeongipat, unertujutiginajangilavut ilingnut.

³¹ Tagva Pilâtusib oᴋautivait: Tagva ilipse tigusiuk, erᴋartorlugolo perᴋojat pigijase maliklugit. Tagva Jûdit oᴋautivât: Toᴋotsijuksaungilagut kimik.

³² (Jêsusib oᴋausingit nelautsilerᴋovlugit, oᴋauserilauktangit, tukkisititsigame toᴋoniksame ilusinganik.)

³³ Tagva Pilâtuse ama iterivok kiglisiniarvingmut, Jêsuselo ᴋaiᴋovâ oᴋautivlugolo: Jûdit atanerivâtît?

³⁴ Jêsusib kiovâ: ilingnik tamattominga oᴋarᴋêt? asivîllônêt tamattominga oᴋautilauᴋâtît uvamnîk?

³⁵ Pilatusib kiovâ: Jûdiovêk? Inuᴋativît ajoᴋertuijoᴋsuillo unertûtigilauᴋpâtit uvamnut. Sumik pinialauᴋêt?

³⁶ Jêsuse kiovok: Nâlegauviga silaksoarmit tamattomangat pingilak. Nâlegauviga silaksoarmit tamattomangat pikpat, kivgama sorsugutiginajarpât, Jûdinut unertûtigijauᴋonanga; mânale nâlegauviga tamattomangat pingilak.

³⁷ Tagva Pilâtusib oᴋautivâ: Taimaimat ataniogalloarᴋêt? Jêsusib kiovâ: Nelâgut oᴋarpotit, ataniovunga. Tamanna pivlugo erniangovunga silaksoarmullo tikilunga, kigligiutjerᴋovlunga mikseᴋârnermik. Mikseᴋârnermit pijub nipiga tusarpâ.

³⁸ Pilâtusib oᴋautivâ: Mikseᴋârnek sunauvâ? Taimaglo oᴋarêrame, Jûdit anivigivait, oᴋautivlugillo: Pasitiksarsingilanga tâpsomane.

³⁹ Iluseᴋarposele imaitomik, aularviksiorviolerangat, parngnanairsimajut ilanganik aularᴋojivaklunga; mâna Jûdit ataninganik aulaᴋojerᴋôvisingâ?

⁴⁰ Tagva ama ilûnnamatsiatik niperᴋortovlutik oᴋarput: Tâpsomingaungitok, Barrabasêmigle. Barrabasêle inuartôvok.