Johannese 17 - Labrador Inuttitut Heritage Bible

Kristûsib ajoᴋertuinerojipta tuksiarninganik, nangminek pivlune, ilinniartinelo, illagêktitanelo pivlugit.

¹ Taimâk Jêsuse oᴋarame, ᴋilangmut ârlorpok oᴋarlunelo: Atâtak, stûnde tikisimavok ânanausivît Ernernik, Ernernut ânanausijauᴋovlutittauk.

² Sôrlo pitsartunermik tunitjivigigangne uviningnut tamainut, inôtsemik nungusuitomik tunijerᴋovlugo ilûnnainut, tunijarnut tâpsomunga.

³ Tamadjauvorle inôgut nungusuitok: ilitarsilune ilingnik, kisivit nelâgut Gûdeogavit tililauktarniglo Jêsuse Kristûsemik.

⁴ Ânanausilaukpagit nuname, piniarnerlo nâmaksilaukpara piniarutauᴋolauktat uvamut.

⁵ Mânalo ânanausilaunga, Atâtak, ilingne, ânanaunermut ilingnêdlunga pigilauktamnut silaksoaᴋarᴋârtinago.

⁶ Aternik nelojungnaitilaukpakka inuit tunilauktatit uvamnut silaksoarmiunit. Pigilaukpatit, uvamnullo tunilaukpatit, oᴋautsitillo malilaukpait.

⁷ Mânnale ᴋaujimavut, tamaita tunilauktatit uvamnut ilingnit pingmatta.

⁸ Oᴋautsille tunilauktatit uvamnut, tunilaukpakka tâpkonunga; ilaliulauᴋpaillo, nelâgullo ilitarsilutik, ilingnit anilaurama, okpilerlutiglo, tililauramga.

⁹ Tuksiutivakka, silaksoarmiullo tuksiutinagit, tâpkoale tunilauktatit uvamnut; pigigangne.

¹⁰ Tamaitalo pigijakka pigivatit, pigijatillo pigivakka, tâpkonanelo ânanausijauvunga.

¹¹ Silaksoarmêtsungnairpungalo, tâpkoale silaksoarmêput, uvangalo ilingnut ᴋaivunga. Hailigeojok Atâtak, aternêtsainartikit tunijatit uvamnut, atausioᴋovlugit sôrlo uvaguk.

¹² Najulaurapkit silaksoarme, aternêtitsainarpakka. Tunijatit uvamnut saputilauᴋpakka; asiojoᴋangilarlo tâpkonangat, ᴋitorngak asiojok kisime, aglait nelautsilerᴋovlugit.

¹³ Mânnale ᴋaivunga ilingnut, taimâglo oᴋarpunga silaksoarmêdlunga, ᴋuviasungnimnik ilumiuteᴋarᴋovlugit nâmaktomik.

¹⁴ Oᴋautsitit tunilaukpakka tâpkonunga, silaksoarmiullo ômigivait; ilagingimatigik, sôrlo uvanga silaksoarmiut ilaginginapkittauk.

¹⁵ Tuksiangilanga nûtserᴋovlutit tâpkoninga, silaksoarmit, saputserᴋovlutille tâpkoninga idluitunit.

¹⁶ Silaksoarmiut illagingilait, sôrlo uvanga silaksoarmiut ilaginginapkittauk.

¹⁷ Ivjornaitikit mikseᴋârnerne; oᴋautsitit mikseᴋârtôvut.

¹⁸ Sôrlo silaksoarmut tililauramga, taimâktauk tiligivakka silaksoarmut.

¹⁹ Tâpkoa pivlugit ivjornailivunga, tâpkoatauk ivjornailerᴋovlugit mikseᴋârnerme.

²⁰ Tâpkoa kisêta tuksiutingilakka, tâpkoaletauk oᴋausinginut okperomârtut uvamnut.

²¹ Ilûnnaita atausiolerᴋovlugit, sôrlo igvit Atâtak ilumnênavit uvangalo ilungnênama, tâpkoatauk iluptingne atausiolerᴋovlugit, silaksoarmiut okpilerᴋovlugit, tililauramga.

²² Ânanaunerlo tunilaukpara tâpkonunga, tunilauktat uvamnut, atausiolerᴋovlugit, sôrlo uvaguk atausiogamnuk,

²³ Tâpkonanêdlunga, igvillo uvamnêdlutit; atausemariolerᴋovlugit, silaksoarmiullo ilitarsilerᴋovlugit, tililauramga, nagligigangnelo, sôrlo nagligigamga.

²⁴ Atâtak pijomavunga, najugamne tâpkoatauk uvamnêᴋovlugit, tunilauktatit uvamnut, ânanaunimnik tunilauktarnik uvamnut takoᴋovlugit; nagligilauramga silaksoak tunganilijauᴋârtinago.

²⁵ Idluartok Atâtak, silaksoarmiut ilitaringilâtit; uvangale ilitarivagit, tâpkoalo ilitarsivut tililauramga.

²⁶ Nelojungnaitilaukpakkalo aternik, nelojungnaititsomavakkalo; nagligutsit, nagligutigijat uvamnik, ilunginêᴋovlugo, uvangalo ilunginêdlunga.