Johannese 16 - Labrador Inuttitut Heritage Bible

Anernerûb ajunginerûb piniarninganik. Takôtilânermik Mânakasâkut Tuksiarnermik Jêsusib atingane.

¹ Tamattominga oᴋautilaukpapse sinaungajuteᴋalerᴋonase.

² Ilagêngnermingnit avitsomârpâse. Neliutijomârporle toᴋotsijut ilipsingnik isumaᴋarvingat, tamattomunga Gûde kivgartorasugilugo.

³ Taimailiorvigijomârpâse, Atâtagalônêt uvangalônêt ilitaringinamitiguk.

⁴ Tamattominga oᴋautilaukpapse, neliutikpat erᴋailerᴋovluse oᴋautigilauktamnik ilipsingnut. Tamattominga pigiarnermit oᴋautilaungilapse najulaurapse.

⁵ Mânale tilijimnut ainiarpunga; apersortoᴋangilarlo akunapsingne: Namungarniarᴋêt?

⁶ Taimâgle oᴋautilaurapse, ômatise kiksarnermik ilumertaulerput.

⁷ Mikseᴋârtomigle oᴋautivapse: Idluarpok ilipsingnut, ainiarama. Ainiangikuma, manigorniktub tikiniangimase. Ainiarumale, tilijomavara ilipsingnut.

⁸ Tikikunelo, silaksoarmiut tukkisitiniarpait ajornermik, idluarnermiglo, erᴋartuinermiglo.

⁹ Ajornek pivlugo, okperlungimatta uvamnut;

¹⁰ Idluarnerle pivlugo, Atâtamut ainiarama, takoniarungnairapsingalo.

¹¹ Erᴋartuinek pivlugo, silaksûb mattoma ataninga erᴋartortaungmat.

¹² Sulle unuktunik oᴋausiksaᴋarpunga ilipsingnut, mânale tusarlugit saperpase.

¹³ Ipsomale, mikseᴋârnerûb anerningata, tikikune, mikseᴋârnernut tamainut tesiorniarpâse. Ingminik oᴋâlanianginame; tusartaminigle oᴋautjiniarpok, pijomârtomiglo oᴋautiniarpâse.

¹⁴ Tâpsoma ânanausiniarpânga, pimnit tigusiniarame oᴋautigilugolo ilipsingnut.

¹⁵ Tamaita Atâtab pigijangit pigivakka. Tamanna pivlugo oᴋautivapse: Pimnit tigusiniarpok oᴋautigilugolo ilipsingnut.

¹⁶ Mânakasâkut takoniarungnairpapsinga; amalo Mânakasâkut takoniarivapsinga; Atâtamut ainiarama.

¹⁷ Tagva ilinniartingita ilangit oᴋaᴋatigêkput: Sunauvât oᴋausingit, oᴋautingmatigut: Mânakasâkut takoniarungnaipapsinga amalo mânakasâkut takoniarivapsinga, Atâtamullo ainiarama?

¹⁸ Tagva oᴋarput: Sunauvâ oᴋarninga: Mânakasâkût? oᴋausingit nelovavut.

¹⁹ Tagva Jêsuse malugosulerpok, aperijomangmatsuk, oᴋattivaillo: Tamattominga apersortigêkpose, oᴋalaurama: Mânakasâkut takoniarungnairpapsinga, amalo mânakasâkut takoniarivapsinga.

²⁰ Âhamarik, âhamarik oᴋaupapse: ᴋialuselo ogguarniarpose silaksoarmiulle ᴋuviasudlarniarput. Ilipsele kiksadlarniarpose; kiksarnisele ablatsângorniarivok ᴋuviasungnermut.

²¹ Arnak ernisukkune, kiksarneᴋarpok, stûndinga tikisimangmat; nutarârsugle erniarijarêruniuk, kappiasungnerilauktane isumagijungnairpâ, ᴋuviasungnek pivlugo, inuk silaksoarmut erniangongmat.

²² Ilipselo kiksarneᴋarivose mânna; takojomagivapsele, ômatiselo ᴋuviasudlarniarput, ᴋuviasungnipsingniglo aᴋsârniktoᴋartuksaungilak ilipsingnit.

²³ Uvlormelo taipsomane aperiniangilapsinga sumik. Âhamarik, âhamarik oᴋaupapse: Atâta tuksiarvigigupsiuk sumik atimne, tunitjiviginiarpâse tamattominga.

²⁴ Mâna tikilugo tuksialaungilase sumik atimne. Tuksiaritse, tigusiniarpose tagva, ᴋuviasungnise nâmakserᴋovlugo.

²⁵ Taimâk oᴋautilaukpapse adsiujutigut; neliutijomârporle adsiujutigut oᴋâlajungnaiviginiartara ilipsingnut, tukkisinartomigle oᴋautiniarpapse Atâtamnik.

²⁶ Uvlorme taipsomane tuksiarniarpose atimne. Oᴋautingilapselo, Atâta tuksiarvigijomavlugo pivluse;

²⁷ Nangminek Atâtab nagligingmase, nagligigapsinga, okperluselo, Gûdemit pilaurama.

²⁸ Atâtamit anilaukpunga, pilungalo silaksoarmut; amalo silaksoak ᴋemangniarpara, Atâtamullo ailunga.

²⁹ ilinniartingita oᴋautivât: Ahâk mâna tukkisinartomik oᴋâlavotit, adsiujomiglo oᴋauseᴋarnak.

³⁰ Mânna ᴋaujimavogut, tamaita nelunginangne, aperijaujariaᴋarungnairlutit. Tamanna pivlugo okperpogut, Gûdemit anilauravit.

³¹ Jêsusib kiovait: Mânna okperpose.

³² Ahâk stûnde neliutiniarpok, neliutijarêrporlo siamarviksase, atunit ingmikoartiluse, kisimautilungalo; kisimaungilangale, Atâtab najormanga.

³³ Tamattominga oᴋautilaukpapse, ulapirsauteᴋarᴋovluse uvamne. Silaksoarme kappiasungneᴋarpose; manigoritsele, silaksoak sâlagivara.