Johannese 15 - Labrador Inuttitut Heritage Bible

Kristûsemik napârtôjomik vaineliksamik. Naglingnermik nagliktigêngnermiglo. Okpertut ômigijauninginik silaksoarmiunut.

¹ Uvanga napârtôvunga vaineliksak idluartok, Atâtagalo vaineliksatalingmik perorsêvilerijôvok.

² Akkerᴋut uvamnêtut ilûnnaita paungaᴋarpangitut pêjarniarpait; ilûnnaitalo paungaᴋarpaktut piungininginik pêjaiviginiarpait, paungaᴋarnersauᴋovlugit.

³ Ilipse mâna sujungaipose oᴋautsit pivlugit, oᴋauserilauktakka ilipsingnut.

⁴ Ilumnêtsainaritse, uvangalo ilupsingnêdlunga. Sôrlo Akᴋerok paungaᴋarungnangimat ingminik, napârtomêtsainangikune vaineliksame; taimainivosetauk, ilumnêtsainangikupse.

⁵ Uvanga napârtôvunga vaineliksak, ilipse akkerôvose. Uvamnêtsainartok, uvangalo tâpsomanêdlunga, paungaᴋarniarpok unuktunik, piginanga piniarungnanginapse sumik.

⁶ Ilumnêtsainangitok egitauniarpok akkerᴋotut, panersârlunelo, katitauniarpullo egitaulutiglo ikomamut, ikoalajuksauvlutik.

⁷ Ilumnêtsainarupse, oᴋausikkalo ilupsingnêtsainarpatta, pijomajapsingnik tuksiarniarpose, tunitsiviolâlapselo.

⁸ Tamakutigûna Atâtaga nertortauniarpok, paungaᴋarnialerupse unuktunik, ilinniarteolerluselo uvamnut.

⁹ Sôrlo Atâtama nagligingmanga, taimaktauk uvanga nagligivapse. Naglingnimnêtsainaritse.

¹⁰ Perᴋojakka malikupsigik, naglingnimnêtsainarpose, Sôrlo uvanga Atâtama perᴋojangit malikapkit, naglingninganêtsainarlungalo.

¹¹ Taimâk oᴋarvigivapse, ᴋuviasuteᴋarnera ilipsingnêtsainarᴋovlugo, ᴋuviasungniselo nâmaksivalliaᴋovlugo.

¹² Tamadja perᴋojara, nagliktigêrᴋovluse, sôrlo nagligigapse.

¹³ Nagligosungnersaujoᴋangilaᴋ imaitomit, inôserminik tunijomit ilannârijane pivlugit.

¹⁴ Ilipse ilannârivapse, piniarutjigupse perᴋojamnik.

¹⁵ Mattoma kingorngane oᴋangilanga kivgaugapse; kivgak ᴋaujimangimat angajoᴋâme piniarninginik. Ilipsele ilannârijimnik taimavapse; tamainik Atâtamnit tusalauᴋtamnik, nelojungnaitilaurapse.

¹⁶ Anerilaungilapsinga, anerilauᴋpapsele, isumagivluselo, paungaᴋariartorᴋovluse, paungaᴋarniselo soᴋoserᴋonago; Atâta tuksiarvigigupsiuk atimne, tamattominga tunijerᴋovlugo ilipsingnut.

¹⁷ Mattominga perᴋovapse, nagliktigêrᴋovluse.

¹⁸ Silaᴋsoarmiut ômigikpase, ᴋaujimaleritse, ômigerᴋârmanga ilipsingnit.

¹⁹ Silaksoarmiut ilagigupsigik, silaksoarmiut pitik nagliginajarpait; silaksoarmiulle ilaginginapsigik, anerimalaurapsele silaksoarmiunit: tamanna pivlugo silaksoarmiut ômigivâse.

²⁰ Oᴋausera erᴋarisiuk oᴋauserilauktara ilipsingnut: Kivgak anginersaungilak angajoᴋâminit. Unangmilauruninga, unangminiarivâse; oᴋausikka malilaurunigit, oᴋausisê malingniarivait.

²¹ Tamakkoningale tamainik piniarvigijomârpâse atera pivlugo; ilitaringinamitsuk tilijiga.

²² Tikilaungikuma, tamattominga oᴋautijartorlugit, ajorneᴋarajangilat; mânale pasijaujungnairutiksarsijungnangilat ajornitik pivlugit.

²³ Uvamnik ômisuktub Atâtaga ômigigivâ.

²⁴ Piniarnerit piniarnerilaungikupkit, asimma piniarnerilaungitangit, ajorneᴋarajangilat; mânale takolauralloaramigit, tamamnuk ômigivâtiguk, uvangalo Atâtagalo.

²⁵ Oᴋautsille nelautsilerᴋovlugit aglaksimajut perᴋojangine: Pitjuteᴋaratik ômigivânga.

²⁶ Manigoijorle tikitsomârpat, tilijomârtara ilipsingnut Atâtamit, mikseᴋârnerûb anerninga, Atâtamit anijok: tâmna kigligiutsiniarpok uvamnik.

²⁷ Ilipselo kigligiutsiniarivose; pigiarnermit najulaurapsinga.