Johannese 14 - Labrador Inuttitut Heritage Bible

Jêsusib oᴋâlaninginik ilinniartiminut ainiarnine Atâtamut, tuksiarnerlo; Anernerlo manigoijok pivlugit.

¹ Ilinniartiminullo oᴋarpok: Ômatise ᴋoaksânganiaratik! Gûde okpervigisiuk uvangalo okpervigisinga!

² Atâtama iglungane igluksaᴋarpok unuktunik. Taimainajangipat, oᴋautiginajalaukpara ilipsingnut. (Mânale) ainiarpunga iniksalioriartorluse.

³ Ainiarumalônêt iniksalioriartorluse, uteromagivunga, ailuselo uvamnut, tagvanêrᴋovluse najugamne.

⁴ Aiviksarolo ᴋaujimavase, apᴋullo ᴋaujimagivase.

⁵ Tômasib oᴋautivâ: Nâlegak ᴋaujimangilagut aiviksarnik, ᴋanorlo apᴋut ᴋaujimajungnarpitigô?

⁶ Jêsusib oᴋautivâ: Apᴋutauvunga mikseᴋârniovlungalo inôgutauvlungalo; Atâtamut pijoᴋangilak, uvapkut kisiane.

⁷ Ilitarigupsinga, Atâtaga ilitarinajarivase. Mânamillo ilitarivase takolaukpaselo.

⁸ Filippûsib oᴋautivâ; Nâlegak Atâta takotitsuk uvaptingnut, nâmaksiniarpogut tagva.

⁹ Jêsusib oᴋautivâ: Taimâk sivitutigijomik najorpapse, ilitaringilarmalô? Filippûse, uvamnik tautuktub Atâta tautukkivâ. Sôkle oᴋarᴋêt: Atâta takotitsuk uvaptingnût?

¹⁰ Okpingilatît, Atâtamnênama, Atâtalo uvamnêngmât? Oᴋautsit oᴋauserijakka ilipsingnut uvamnik oᴋauseringilakka, Atâtable uvamne ineᴋartûb, tâpsoma piniarnerit piniarnerivait.

¹¹ Okperisinga, Atâtamnênama, Atâtalo uvamnêngmat; saperupsele, piniarnerit pivlugit okperisinga.

¹² Âhamarik, âhamarik oᴋaupsapse: Uvamnut okpertûb piniarnerit piniarnerijakka piniarutiginiarivait, anginersaniglo tâpkonangat piniaruteᴋarniarpok. Atâtamut aigama.

¹³ Sumiglo tuksiarniarupse atimne, piniaromavunga, Atâta nertortauᴋovlugo ernermigut.

¹⁴ Sumik tuksiarniarupse atimne, piniaromavunga.

¹⁵ Nagligigupsinga, perᴋojakka malingniarsigik.

¹⁶ Atâtalo tuksiarvigijomavara manigoijomik asimnik tunitjivioᴋovluse, ilipsingnêtsainarᴋovlugo isoᴋangitomut.

¹⁷ Mikseᴋârnerub Anerninga, silaksoarmiut pijungnangitangat; takunginamitsuk ilitaringinamitsuglo. Ilipsele ilitarivase, ilagitsainarmase, ilipsingnêniarmallo.

¹⁸ Iliarsôᴋojomangilapse, tikitsomagivapse.

¹⁹ Akuniungitok sulle, tagva silaksoarmiut takoniarungnairpânga, ilipsele takoniarivapsinga; inôgama ilipselo inôjuksaugivose.

²⁰ Uvlorme taipsomane tukkisiniarpose, Atâtamnênama, ilipselo ilumnênapse, uvangalo ilupsingnênama.

²¹ Perᴋojamnik pilik, maliklugillo, tâmnauvok nagliktok uvamnik. Uvamnigle nagliktok nagligijauniarpok Atâtamnut, uvangalo nagliginiarpara nelojungnaitilugolo uvamnik.

²² Jûdasib oᴋautivâ (Iskârioteungitûb): Nâlegak, ilingnik nelonarungnaititsomanît uvaptingnut, silaᴋsoarmiunu-ungitorlo, sunauvâ?

²³ Jêsusib kiovâ oᴋautivlugolo: Uvamnik nagliktub oᴋausikka malingniarpait; Atâtamalo nagliginiarpâ, tikiniarpavuglo inigijartorlugo.

²⁴ Uvamnigle naglingitub oᴋausikka malingilait. Oᴋautsillo tussartase pigingilakka, Atâtable tilijima.

²⁵ Tamattominga oᴋarvigilaukpapse, ilipsingnêlaurama.

²⁶ Manigoijuble, Anernerûb ajunginerûb, Atâtama tilijomârtangata atimne, tâpsoma ajoᴋertorniarpâse tamainik, erᴋaitiluselo tamainik oᴋauserilauktamnik ilipsingnut.

²⁷ Ulapirsaumik ᴋemaivigivapse, ulapirsautimnik tunitjivigivapse. Tunitjivigingilapse silaksoarmiut tunijiningititut. Omatise ᴋoaksârniaratik erᴋsiniaratiglo!

²⁸ Tusalaukpose, oᴋautilaurapse: Ainiarpunga tikiluselo ama. Nagligigupsinga, ᴋuviasugajarpose, oᴋautilaurapse: Atâtamut ainiarpunga; Atâta anginersaungmat uvamnit.

²⁹ Mânalo oᴋautigilaukpara ilipsingnut, tamanna pilerᴋârtinago, okpilerᴋovluse, tamanna pilerpat.

³⁰ Mattoma kingorngane unuktunik oᴋauseᴋarniarungnairpunga ilipsingnut; silaksûb tamattoma ataninga tikilermat peᴋaranelo uvamne.

³¹ Silaksoarmiulle tukkisilerᴋovlugit, Atâta nagligigapko, taimaglo piniarama, sôrlo Atâtab perᴋolaungmanga: Nikovititse ovangallo aulartâ!