Johannese 13 - Labrador Inuttitut Heritage Bible

Jêsusib ilinniartime itiganginik ubvarninganik. Naglingnermik perᴋojininganik. Judasib pititsinasuarninganik. Pêtrusib missialârninganik.

¹ Aularviksiorviuble sivorngane, Jêsuse tukisigame, aularviksane silaksoarmit tamattomangat Atâtamut neliutisimangmat, sôrlo pine silaksoarmêtut nagligilauramigit, taimâk naggatiksaminut tikidlune nagligivait.

² Unnuksiumiglo nerrijarêramik, (Sâtanasib Jûdase Iskâriot Sîmonib erninga ômamiuteᴋartilerêrmago pititsijomanermik tâpsominga,)

³ Jêsuselo ᴋaujimagame, tunitjiviogame tamainik aggangminut Atâtamut, Gûdemillo pilaurame, Gûdemullo ainiarame;

⁴ Nerrimârnermit nikovipok, annorânelo pêrpait, sailitamiglo tigusivok atilugolo.

⁵ Kingorngagut imermik kovisivok ubvarvingmut, ilinniartullo itigangit ubvalerpait, allarterlugillo sailitamut atortaminut.

⁶ Tagva Sîmon Pêtruse tikilerpâ; tâpsomalo oᴋautivâ: Nâlegaᴋ, igvit itigakka ubvaraksarivigît?

⁷ Jêsusib kiovâ oᴋautivlugolo: Sumik piniarama, ᴋaujimangilatit mâna; kingorngagulle tukkisilârpat.

⁸ Tagva Pêtrusibo ᴋautivâ: Itigakka ubvaraksaritsangilatit. Jêsusib kiovâ: Ubvarniangikupkit, illangiuteᴋatiginiangilarma.

⁹ Sîmonib Pêtrusib oᴋautivâ: Nâlegaᴋ itigakka Kisêtaungitôk, aggakkalole, niaᴋoralo!

¹⁰ Jêsusib oᴋautivâ: Ubvarsimajoᴋ itikat assianik ubvariaᴋangilaᴋ, epᴋêjarsimavorle ilûnnane. Epᴋêjarsimavoselo, ilûnnaseungitorle.

¹¹ Pititigilârtane ᴋaujimatsiaramiuk; tamanna pivlugo oᴋarpok: Epᴋêjarsimavose ilûnnaseungitorle.

¹² Itigangille ubvarêramigit, annorâminik tigusivok ingilermilunelo, amalo oᴋautivait: Pinialaungnimnik ilipsingnut ᴋaujimavisê?

¹³ Ajoᴋertuijomik Nâlekamiglo taivapsinga, nelâgullo oᴋarpose; tâmnaugama.

¹⁴ Tamanna pivlugo uvanga, Nâlekapse ajoᴋertortipselo itikase ubvalaurapkit, taimâk ilipsetauk itikapsingnik ubvartigêktuksaugivose.

¹⁵ Igjaraksamik tunitsivigilauᴋpapse, piniarᴋovluse, Sôrlo piniarvigilaurapse.

¹⁶ Âhamarik, âhamarik oᴋaupapse: Kivgaᴋ anginersaungilak angajoᴋâminit, Apostelelônêt anginersaunginivok tilijiminit.

¹⁷ Tamanna ᴋaujimagupsiuk, piloridlarpose, piniarutigigupsiuk.

¹⁸ Ilûnapsingnik oᴋalungilanga. Nelungilakka anerimalauktakka. Aglaille nelautsilerᴋovlugit: ᴋakᴋôjaktôᴋatima itikaminut tullerarpânga.

¹⁹ Mâna oᴋautigivara ilipsingnut piniarutauᴋârtinago; piniarutaujarêrpat, okpilerᴋovluse uvangaunimnik.

²⁰ Âhamarik, âhamarik oᴋaupapse: Illaliortok tiliniartamnik, uvamnik illaliorpok; uvamnigle illaliortub tilijiga illaliorpâ.

²¹ Jêsuse taimâk oᴋarêrame, kiksalerpoᴋ anernermigut, kigligiutilunelo oᴋarpok: Âhamarik, âhamarik oᴋaupapse: Ilapse illangata pitilârpânga.

²² Tagva ilinniartut ingmingnut takonautivut kuksasulerlutiglo, nelitik oᴋautigingmangâgo.

²³ Nerrimârvingmele iksivajoᴋarpok ilinniartingita illanganik, Jêsusib sagvianut êgangajomik Jêsusib nagliktanganik.

²⁴ Tâmna Sîmonib Pêtrusib ijingmikpâ, kiglisiniarᴋovlugo oᴋautigijanga kinaungmangât,

²⁵ Tâpsoma egalerdlunelo Jêsusib sagvianut oᴋautivâ Nâlegak, kinauvâ?

²⁶ Jêsuse kiovok: Tâmnauvok tamuamik misuksiutijara, tunitjivigilugolo. Tamualo misukpâ tunilallo Jûdasemut Iskâriotemut, Sîmonib erninganut.

²⁷ Tamualo êngmago, Sâtanasib pullavâ. Tagva Jêsusib oᴋautivâ: Piniartat piniarsâruk!

²⁸ Nerrimâᴋatingitale nelianiglônêt ᴋaujimajoᴋangilak, suna pivlugo taimâk oᴋautingmangâgo.

²⁹ Ilangit isumavut, Jûdase pôksalijarmat, Jêsusib oᴋautingmago imâk: Pisiniarit ajortaptingnik uvloᴋsiorvingmut! Ubvalo, tunijerᴋovlugo aklujunut sumik.

³⁰ Tagvale tamua êjarêramiuk, anisâdlarpok. Unnuangovorlo.

³¹ Anijarêrmallo, Jêsuse oᴋarpok: Mâna Inûb Erninga ânanausijauvok, Gûdelo ânanausijaugivok tâpsomane.

³² Gûde ânanausijaugune tâpsomane, Gûdibtauk ânanausiniarivâ ingmine, ânanausisârpâlo.

³³ ᴋitorngârsukka, sulle anikitomik najorniarpapse. ᴋeneromârpapsinga; sôrlolo Jûdinut oᴋalaurama: Aiviginiartamnut tikitsungnangilase.

³⁴ Mânalo oᴋautivapse: Perᴋojaktâmik tunitjivigivapse, nagliktigêrᴋovluse, sôrlo nagligilaurapse, nagliktigêlerᴋovluse.

³⁵ Tamattomunga ilûnnatik illitarsiniarput, ilinniartigigapse, nagliktigêkupse.

³⁶ Sîmonib Pêtrusib oᴋautivâ: Nâlegak, namut ainiarᴋêt? Jêsusib kiovâ. Aiviginiartamnut tamattomane, maligungnangilarma; kingorngagulle maligomârparma.

³⁷ Pêtrusib kiovâ: Nâlegaᴋ, sôk tamattomane maligungnangilagît? Inôsera tunijomavara pivlutit!

³⁸ Jêsusib kiovâ: Inôtsît pivlunga tuninajarpiûk? Âhamarik, âhamarik oᴋaupagit; Angutaunek niplerniangilak, pingasuertorlunga misiarutauᴋârtinanga ilingnut.