Johannese 12 - Labrador Inuttitut Heritage Bible

Kristûsib mingoartauninganik Betâniame. Jerûsalemut iterninganik. Nippemik ᴋilangmit. Jêsusib oᴋâlaninginik kingorlerpânik inugiartoᴋsoarnut.

¹ Uvlut pingasujortut aularviksiorviub sivorngagut Jêsuse Betâniamut tikipok, Lazarusib toᴋolauktub Jêsusib ômartitangata toᴋungajunit najugânut.

² Tagvane nerᴋiksaliorutivât unnungme, Martalo kivgartorpok; Lazarusible tâpkoa illagivait iksivaᴋatingit nerrimârvingme.

³ Tagva Marîab mingoarut illaᴋangitok pivianartok tiguvâ, Jêsusiblo itigangit mingoarpait, allarterlugillo itigangit nujarminut; iglole tattalerpok mingoarutib tipitsiaringninganik.

⁴ Tagva ilinniartingita ilangat, Jûdase Iskâriot, Sîmonib erninga, kingorngagut pititigilârtanga, oᴋarpok:

⁵ Sôk mingoarut tamanna pisiangolaungilâ kênaujanut 300 inut, aklujut pijaksanginût?

⁶ Taimâgle oᴋangilak aklujut isumagijomavlugit; tigliktôgamele, ikpiârsulijaramelo, neksalarmelo tunergutinik.

⁷ Tagva Jêsuse oᴋarpok: Ullapinasiuk una, tamanna torᴋolaukpâ uvlormut iluvertauniksamnut.

⁸ Aklujunik illaᴋatsainarapse; uvangale najortigitsainangilapsinga.

⁹ Tagva Jûdit unuktut tusaumalerput, tagvanêngmat; Jêsuselo kisiat ᴋaijutigingilât, Lazaruseletauk takojomavlugo, ômartilauktanga toᴋungajunit.

¹⁰ Ajoᴋertuijoksuille pinasuarput Lazarusetauk toᴋotsomavlugo.

¹¹ Tâmna pivlugo Jûdit unuktut ailermatta okpilerlutiglo Jêsusemut.

¹² Uvlub aippangane inuit unuktut, uvloksiorvingmut tikisimajut, tusaramik Jêsuse ᴋainiarmat Jerûsalemut,

¹³ Palmit ᴋesertutinginik tigusivut, anilerpullo pagreartorlugo, ᴋaggudlarlutiglo: Hosianna, nertortaule Nâlekab atingane tikitok, ataniojok Israêleme.

¹⁴ Jêsusele siuterᴋortojomik pititaulerpok, tâpsomungalo nangmartauvlune ingergavok, sôrlo aglaksimangmat:

¹⁵ Sivôraniarnak, Zionib pania; ahâk atanît ᴋaivok, nangmartauvlune siuterᴋortojûb nogganganut.

¹⁶ Ilinniartingitale tamanna tukisilaungilât sivorngane; Jêsusele ânanausijaungmat, tagva erᴋarpât, taimaitomik aglaksimajoᴋarmat tâpsominga, taimaglo piniarvigilauramitsuk.

¹⁷ Inuille illagijangita, Lazaruse anerᴋolaungmago iluvermit, ômartilugolo toᴋungajunit, piniarninga nertorpât.

¹⁸ Tamanna pivlugo inuit pagreartorpât tussaramik taimâk tatamnartitsilaungmat.

¹⁹ Farisêerille ingmingnut oᴋarput: Takovose, sulitsanginapse; ahâk inuit ilûnnatik malikpât.

²⁰ Grîᴋeᴋalaukporletauk majoralauktut akorngane, tuksiaromavlutik uvloᴋsiorvingme.

²¹ Tâpkoa Filippuse, Betsaidamit Galilêamêtomit pijok, tikilugo ᴋenuvigivât oᴋarlutiglo: Nâlegak, Jêsuse takojomadlaralloarpavut.

²² Filippusib tagva Andrêase oᴋautijartorpâ tamattominga; Filippûsiblo Andrêasiblo ama oᴋautigivâk Jêsusemut.

²³ Jêsusible kiovauk oᴋautivlugiglo: Inûb Erningata ânanausijauvia neliutisimavok.

²⁴ Âhamarik, âhamarik oᴋaupapse: Perorsiaksak senaugaksak ivjomut katangikune toᴋonanelo, kisimêtôlerpok; toᴋogunele singailiktaᴋalerpok unuktunik.

²⁵ Inôserminik ivlersijub asiojijomârpâ: inôserminiglo silaksoarme tamattomane ivlersingitub inôtsemut nungusuitomut pigênarniarpâ.

²⁶ Kivgartoromajûb uvamnik, maliklinga; najukamnelo kivgara tagvanêtsomarivok. Atâtamalo uvamnik kivgartorniartok nertoromârpâ.

²⁷ Mâna tarniga kiksarpok. Sumiglo oᴋarlangâ? (imâk:) Atâtak stûndemit tamattomangat piulingâ? Tamannale pivlugo stûndemut tamattomunga tikipunga.

²⁸ Atâtak, atît ânanausileruk! Tagva nipe ᴋilangmit pivoᴋ: Ânanausilaukpara, amalo ânanausijomagivara.

²⁹ Tagva inuit nangerdlutik nâlektut oᴋarput: Kallilerpoᴋ. Asingit oᴋarput: Engelib oᴋaᴋatigivâ.

³⁰ Jêsusib kiovait oᴋautivlugillo: Nipe tâmna pivlunga pilaungitok, pivlusele.

³¹ Mâna silaksoarmiut erᴋartortaunermut tikitaulerput, mâna silaᴋsûb tamattoma ataninga anititauniarpok.

³² Uvangalo ᴋangatartitauniaruma nunamit, ilûnnaita amuaromavakka uvamnut.

³³ Taimâgle oᴋarpok tukisititsilune toᴋoniarnerme ilusinganik.

³⁴ Tagva inuit kiovât: Perᴋojanit tusarpogut Kristûse isoᴋangitomut-itsainarmat. ᴋanorlo oᴋarᴋât: Inûb Erninga ᴋangatartitaujariaᴋarpôᴋ? Inûb Erninga tâmna kinauvâ?

³⁵ Tagva Jêsusib oᴋautivait: ᴋaumajûb sulle anikitomik najorniarpâse. Arvertaritse, ᴋaumajomik najorteᴋartiluse, tâᴋtomut tikitaulerᴋonase. Tâktome arvertartok ᴋaujimangilak namut ainerminik.

³⁶ ᴋaumajok okpervigisiuk, najorteᴋartiluse tâpsominga, ᴋitorngaulerᴋovluse ᴋaumajomut.

³⁷ Taimâk Jêsuse oᴋâlavok, aularlunelo ijeriartorlunelo tâpkonangat. Taimaglo tatamnartitsigalloarmat takoane, okpervigingilâllônêt.

³⁸ Nelautaijub Jêsaiasib oᴋausingit nelautsilerᴋovlugit, oᴋarmat: Nâlegaᴋ, kia oᴋâlanivut okperivagît? Kimullo Nâlekab talinga sakᴋertitauvâ?

³⁹ Tamanna pivlugo okperungnalaungilat; Jesaiase ama oᴋarmat:

⁴⁰ Tâpsoma takpêtipait ijingit, mangaitilugillo ômatingit; ijimingnut takoᴋonagit, ômatimingnullo tukkiserᴋonagit; sâgiarᴋonagillo ikajortaujungnarlutik uvamnut.

⁴¹ Taimâk Jesaiase oᴋalaukpok, ânanauninga takogamiuk oᴋâlatigigamiuglo.

⁴² Angajoᴋâlle unuktut okpervigigalloarpât; Farisêerille pivlugit kigliutjingilat tamattominga, avitaujomanatik katimavingmit.

⁴³ Nertortaunek inungnut ivlerinersarigamitsuk nertortaunermingnit Gûdemut.

⁴⁴ Jêsusele ᴋaggudlarpok oᴋarlunelo: Uvamnut okpertok uvamnuinak okpingilak, tâpsomungale tiliklertomut uvamnik.

⁴⁵ Uvamniglo tautuktub tâmna tautukpâ tiliklertok uvamnik.

⁴⁶ ᴋaumajôvlunga silaksoarmut tamattomunga tikipunga, uvamnut okpertok tâktomêrᴋonago.

⁴⁷ Oᴋausimniglo tusartoᴋ okperanelo, erᴋartorniangilara; tikisimanginama, silaksoarmiut erᴋartoriartorlugit, silaksoarmiulle piulijauᴋovlugit uvamnut.

⁴⁸ Uvamnik nachojoᴋ illalioranelo oᴋautsimnik, tâmna peᴋalerêrpoᴋ erᴋartortiminik; oᴋautsit oᴋauserilauktama, tamakkoa erᴋartoromarpât uvlut naggatiksangane.

⁴⁹ Uvamnik oᴋalaunginama; Atâtable tilijima perᴋojamik tunitjivigilaukpânga piniaraksamnik oᴋauserijaksamniglo.

⁵⁰ ᴋaujimavungalo perᴋojanga inôgutaungmat nungusuitok. Taimaimat oᴋauserijakka taimâk oᴋauserivakka, sôrlo Atâtab oᴋautilaungmanga.