Johannese 11 - Labrador Inuttitut Heritage Bible

Lazarusib toᴋungajûb ômartitauninganik. Farisêerit toᴋotsijomaninganik Jêsusemik.

¹ ᴋanimajoᴋarporle nelajomik Lazarusemik atelingmik, Betâniamiomik, Marîab angajuatalo iglugasangine.

² Marîale tâmnauvok, Nâlekamik mingoarsilauᴋtok mingoarumut, itiganginiglo alarterijoᴋ nujarminut; tâpsoma aninga Lazaruse ᴋanimalune nelavok.

³ Tagva najâgik tiliklerpuk oᴋautjauᴋovlugo: Nâlegak, ahâk, nagligijat ᴋanimalune nelavok.

⁴ Jêsuse tamattominga tusarame, oᴋarpoᴋ: ᴋanimasek toᴋomut ilingalungilak, Gûdible nertortauninganut, Gûdib Erninga tamattomunga nertortauᴋovlugo.

⁵ Jêsusible Marta nagligivâ, nukangalo, Lazaruselo.

⁶ Tusaramele ᴋanimangmat, sule uvlungnik maggûngnik uvlivok tagvane, najortamine.

⁷ Kingorngagut ilinniartiminut oᴋarpoᴋ: Jûdêamut ama ingergalermita.

⁸ Ilinniartingita oᴋautivât: Ajoᴋertuijok, taipsomane Jûdit milloromalauᴋpâtit ujarᴋanut, amalo tagvunga ingergaromagivêt?

⁹ Jêsuse kiovok: Uvloᴋ 12 inik stûndeᴋangilâk? Uvlôtilugo arvertartok aporniangilak; silaksûb tamattoma ᴋaumaninga tautugamiuk.

¹⁰ Unnuangotilugole arvertartok aporniarpok, ᴋaumaneᴋanginame.

¹¹ Taimâk oᴋarpok, kingorngagullo oᴋautivait: Lazaruse illanârijivut sinikpok; ainiarpungale tupaktitsomavlugo.

¹² Tagva ilinniartingit oᴋarput: Nâlegak sinikune, nakornersauniarpok.

¹³ Jêsusible toᴋoninga oᴋautigivâ, isumaᴋarpulle timib siningninganik oᴋarasugilugo.

¹⁴ Tagva Jêsusib oᴋautitsiarpait: Lazaruse toᴋovok;

¹⁵ ᴋuviasukpungalo, tainganêlaunginama, okpilerᴋovluse. Ingergalertale tâpsomunga.

¹⁶ Tagva Tômase, maggoliavinermik taijak, ilinniartunut oᴋarpok: Ingergaᴋatigêkta toᴋoᴋatigijomavlugo.

¹⁷ Tagva Jêsuse tikilerpok, naipipâlo, uvlunik sitamanik iluvermêlerêrtovinek.

¹⁸ Betâniale Jerûsalemut isaktatitut 15,000 itut ᴋanitigijok.

¹⁹ Jûdillo unuktut Martamut Marîamullo tikilaukput, manigoromavlugik aningak pivlugo.

²⁰ Martale tusaumagame, Jêsuse ᴋaglilermat, pagreartorpâ; Marîale iglome iksivalune nokᴋangavok.

²¹ Tagva Martab Jêsuse oᴋautivâ: Nâlegak, ovanêlauruvit, aniga toᴋonajalaungilak.

²² Sullele ᴋaujimavunga, sumik Gûdemit tuksiaruvit, Gûdib tamattominga tunitsiviginiarpâtit.

²³ Jêsusib oᴋautivâ: Anît makiniarpok.

²⁴ Martab oᴋautivâ: Nelungiᴋalloarpunga, makitsomârmat makivingme uvlut naggatiksangane.

²⁵ Jêsusib oᴋautivâ: Uvanga makitjutauvlungalo inôgutauvunga. Uvamnut okpertok inôjomârpok, toᴋogalloarune.

²⁶ Inôvlunelo okpertok uvamnut toᴋoniangimarikpok. Tamanna okperiviûk?

²⁷ Tâpsoma oᴋautivâ: Nâlegak, âhailâ, okperpunga Kristûseogavit, Gûdib Erninga, silaksoarmut tikisimajotit.

²⁸ Taimaglo oᴋarêrame, ailerpok nukane Marîa angigutjilune ᴋaiᴋovlugo, oᴋautivlugolo: Ajoᴋertuijok tikisimavok, ᴋaiᴋovâtillo.

²⁹ Tâmna tamattominga tusarame, nikovisâdlarpok, aivigilugolo.

³⁰ Jêsuse iglugasangnut tikisimangimat sulle, tagvanêporle sule pagreartortauvingmine Martamut.

³¹ Jûdit najortingita iglome manigortingitalo Marîa takogamitsuk, nikovisârlunelo aningmat, malikpât oᴋarlutiglo: Iluvermut ailerpok, ᴋeajomavlune tagvane.

³² Marîalo tikiname Jêsusib najugânut, takogamiuglo, itiganginut pâmakpok, oᴋautilugolo: Nâlegak, ovanêlauruvit, aniga toᴋonajalaungilak.

³³ Jêsusib ᴋeajok takogamiuk, Jûdillo ᴋeajut tikiᴋatingit, anernermigut ilapsugosulerpok ingminiglo kiksartilune,

³⁴ Oᴋarlunelo: Namut ilivisiûk? Tâpkua oᴋautivât: Nâlegak, ᴋailutillo takojartorit.

³⁵ Jêsusiblo ijîgik ᴋugviolerpuk.

³⁶ Tagva Jûdit oᴋarput: Ahâk, nagligidlalaukpâ!

³⁷ Ilangille akornganêtut oᴋarput: Tautungitut ijinginik uititsijub tâmnatauk toᴋotailititsungnalaungilaûk?

³⁸ Jêsuselo ama ilapsugosudlalerivok ingmine, iluvermullo tikilerdlune. Itersaliorsimajôvorle matumajok ujarᴋamik.

³⁹ Jêsuse oᴋarpok: Ujarak pêrsiuk. Martab oᴋautivâ, toᴋungajub najangata: Nâlegaᴋ tipelulerêrpoᴋ; uvlunik sitamanik tagvanêname.

⁴⁰ Jêsusib oᴋautivâ: Oᴋautilaungilagît, okperuvit, Gûdib ajugaᴋangininga takonajarangnê?

⁴¹ Tagva ujarak pêrpât toᴋungajub iluvinganit. Jêsusele ᴋongmut ârlorpok, oᴋarlunelo: Atâtak ᴋujagivagit tusalauramga.

⁴² Nelungilangale tusatsainaramga; inuille ovane nangertut pivlugit taimâk oᴋarpunga, okpilerᴋovlugit tililauramga.

⁴³ Taimâk oᴋarêrame, niperᴋortovlune ᴋaigarsukpok: Lazaruse anît!

⁴⁴ Toᴋungajorlo anilerpok, imusersimajok uvineruksajanik niukikullo talikikullo, kênangalo matusimajok kitjijârnerûb allarterutânut. Jêsusib oᴋautivait: Tamakkoninga pêrsivigisiuk, pisulerlelo!

⁴⁵ Jûdillo unuktut, Marîamut tikilauᴋtut, takojullo Jêsusib piniarninganik okpervigivât.

⁴⁶ Tâpkoale ilangit Farisêerinut ailerput, oᴋautilugillo Jêsusib piniarnerilauᴋtanganik.

⁴⁷ Tagva ajoᴋertuijoᴋsuit Farisêerillo ᴋaggimiojunik katimatitsivut, oᴋarlutiglo: Sumik piniartuksauvitâ? Inuk taimna tatamnartitsivoᴋ unuktunik.

⁴⁸ Taimailingatileruptigo, tagva ilûnnatik okperviginiarpât. Tagva Rômiut ᴋainiarput, aᴋsârniarlutalo nunaᴋotiptingnik inuᴋotiptingniglo.

⁴⁹ Tâpkoale ilangata, Kaifasib, jâreme tamattomane ajoᴋertuinerojub, oᴋautivait: ᴋaujimangilase sumik,

⁵⁰ Isumaksarsiunginivose sumik; nakornersauvok uvaptingnut, inuk atausek toᴋokpat inûᴋatigêt pivlugit, inuit ilûnnatik aserortuksauninginit.

⁵¹ Tamattominga oᴋâlalungilak ingminik; jâremele tamattomane ajoᴋertuinerogame, nelautsijuksanik oᴋarpok. Jêsuse toᴋojuksaungmat inuᴋatigêt pivlugit;

⁵² Inûᴋatigêllo kisêtaungitok; Gûdible ᴋitornganginik siamangajunik katersoerᴋovlugo.

⁵³ Uvlormit taipsomangat isumaksarsioᴋatigêkput, ᴋanok ilivlutik toᴋoniarlugo.

⁵⁴ Jêsusele sakᴋijârlune arvertarungnailerpok Jûdit akorngane, inuᴋajuituble erᴋânut aularpok, iglugasaksoarnut Efrêmik attilingnut; tagvane piniarveᴋarlune ilinniartine illagilugit.

⁵⁵ Jûdille aularviksiorvingat ᴋaglilerpok, unuktullo Jerusalemut majoralerput tamattoma erᴋânit, aularviksiorvioᴋârtinago, sujungaitijomavlutik.

⁵⁶ Tagvane nangerdlutiglo Jêsuse aperᴋutigivât oᴋaᴋatigêklutiglo katimaviksoarme: ᴋanok isumavisê, uvloᴋsiorvingmut tamattomunga ᴋaingimât?

⁵⁷ Ajoᴋertuijoᴋsuillo Farisêerillo perᴋojaᴋartitsilaukput: ᴋaujimajoᴋarpat nanêninganik, ᴋaujititserᴋovlugo; tigujomagamitsuk.