Johannese 10 - Labrador Inuttitut Heritage Bible

Kristûsemik mianersijomik ajungitomik, saugaᴋotinginiglo. Jêsuselo Messîaseongmangât?

¹ Âhamarik, âhamarik oᴋaupapse: Itertarvikut itingitok saugat iglunganut, asiagulle itertok, tâmna tigliktôvlunelo inuartôvok.

² Itertarvikulle itertok saugat mianerijigivât.

³ Tâmna itertarviub idjertortingata upkuêrutivâ, saugallo nippinga tussarpât, saugaᴋotinelo ᴋaiᴋovait, atingit taivlugit, anitilaitalo.

⁴ Saugaᴋotinelo anititsarêrpagit, saugat sivorlerivât maliklugolo; nipinga ilitarigamitsuk.

⁵ Takorngartarle malingilât, ᴋemâvâlle, takorngartat nipingit ilitaringinamigit.

⁶ Oᴋautsinik tamakkoninga Jêsusib oᴋarvigivait: tukkisingilâlle, sunaungmangât oᴋarvionitik tâpsomunga.

⁷ Tagva Jêsusib ama oᴋautivait: Âhamarik, âhamarik oᴋaupapse: Uvanga saugat itertarvigivânga.

⁸ Ilûnnatik sivunamne tikilauᴋtut tigliktôvlutiglo inuartôlauᴋput; saugallo nâlalaungilait.

⁹ Itertarviovunga: uvapkut itertoᴋarpat, tâmna piulijauniarpok, iterlunelo anilunelo nerᴋiksarsiniarpok.

¹⁰ Tigliktok ᴋailerpangilak, kisiane tiglingnigomavlune, toᴋotsijomavlunelo, aseroijomavlunelo.

¹¹ Uvanga tikipunga, inôtsemik piksaniglo nâmaktunik peᴋarᴋovlugit.

¹² Uvanga mianersijôvunga ajungitok. Mianersijok ajungitok inôtsiminik tunivok saugat pivlugit. Attartugable, mianersijiungitub, nangmineᴋangitub sauganik, amarok ᴋailertok takogamiuk saugat ᴋemakpait ᴋemâvlunelo; amarᴋublo saugat angulugit siamartipait.

¹³ Atartugarle ᴋemâvok; attartugaugame, saugallo kamagingilait.

¹⁴ Uvanga mianersijôvunga ajungitok, pikkalo ilitarivakka, ilitarijauvlungalo pimnut,

¹⁵ Sôrlo Atâtab ilitaringmanga, uvangalo âtâta ilitarigapko. Inôseralo tunivara saugat pivlugit.

¹⁶ Sule asinginik saugaᴋuteᴋarpunga iglomit tamattomangat pingitunik. Tâpkoalo tamaunga pititsariaᴋarpakka, nipigalo tusaromârpât, atautsimêlutiglo katimgajomârput, atautsemiglo mianerijeᴋarlutik.

¹⁷ Tamanna pivlugo Atâtama nagligivânga, inôsera tunigapko, ama tiguserᴋovlunga tamattominga.

¹⁸ Arᴋtaijoᴋangilak tamattominga uvamnit, isumamnigle iperarpara. Pitsartuneᴋarpunga iperarlugo, pitsartuneᴋarivungalo ama tigulugo. Perᴋojamik taimaitomik tunitjiviovunga Atâtamnut.

¹⁹ Tagva Jûdit akkerartortigêlerput oᴋautsit tamakkoa pivlugit.

²⁰ Unuktut tâpkunanêtut oᴋarput: Sâtanaseᴋarpok ilisimaidlarlunelo, sôᴋ nâlakpisiûk?

²¹ Asingit oᴋarput: Tamakkoa (Sâtanasemik) ilumiktub oᴋauseringilait; Sâtanasiblo tautungitut ijingit uitijungnarpagît?

²² Katimaviksûble atortautainarninganik uvloᴋsiorviovok Jerûsaleme, okiongovorlo.

²³ Jêsuselo arvertarpok katimaviksoarme, Sâlomôb iglorusingane.

²⁴ Tagva Jûdit iluvât oᴋautivlugolo: ᴋanok sivitutigijomik tarnivut noᴋᴋangatipigît? Kristûseoguvit, nelâgut oᴋautitigut.

²⁵ Jêsusib oᴋautivait: Oᴋautigijarêrpara ilipsingnut, okperingilaselo. Piniarnerit piniarnerijakka Atâtama attingane, kigligiutsivut uvamnik.

²⁶ Okpingilasele; saugaᴋotiginginapse, sôrlo oᴋautilaurapse.

²⁷ Saugaᴋotima nipiga tusarpât ilitarivakkalo; malikpângalo.

²⁸ Inôtsemiglo nungusuitomik tunitsivigivakka, aserorniatsangilallo, arᴋtaijoᴋarniangilarlônêt tâpkoninga aggamnit.

²⁹ Atâta, tunijijok tâpkoninga uvamnut, anginerovok tamainit; arᴋtaijoᴋarungnangilarlo tâpkoninga Atâtama agganginit.

³⁰ Uvangalo Atâtalo atausiovoguk.

³¹ Tagva Jûdit ama ujarᴋanik tigusivut milloromavlugo.

³² Jêsusib kiovait: Piniarnernik ajungitunik unuktunik Atâtamnit pijunik sakᴋertitsilauᴋpunga ilipsingnut. Piniarnerit tamakkoa neliat pivlugo milloromavisingâ ujarᴋanût?

³³ Jûdit kiovât oᴋautivlugolo: Piniarnerit ajungitut pivlugit milloromangilaptigit ujarᴋanut; Gûdemigle mitauteᴋarnît pivlugo, inutuinaugavillo, ilingniglo Gûdiotinavit.

³⁴ Jêsusib kiovait: Aglaksimangilâk perᴋojapsingne: Oᴋautilaukpapse Gûdiogapsê?

³⁵ Taipkoa Gûdinik taikpagit, Gûdib oᴋausinginik oᴋarviojut (aglaillo akkerartortaujungnangilat);

³⁶ Sôk Atâtab ivjornaititanganut tilijanganullo silaᴋsoarmiunut oᴋarᴋisê: Gûde mitautigivat; oᴋarnera pivlugo: Gûdib ernerivângâ?

³⁷ Atâtama piniarningit piniarneringikupkit, okperiniarasinga.

³⁸ Piniarnerigupkille, piniarnerit okperisigik, uvanga okperijomangikupsinga, ilitarsilerᴋovluse okpilerluselo, Atâta uvamnêngmat uvangalo tâpsomanênama.

³⁹ Amalo tigunasuarpât; agganginille ᴋemâvok,

⁴⁰ Aulalermilunelo Jordanib akianut Johannesib baptisivigilauᴋtanganut, tagvanêlerdlunelo.

⁴¹ Unuktullo tikipât oᴋarlutiglo: Johannese tatamnartitsilaungilak, ilûnnatigle Johannesib oᴋauserilauktangit tâpsominga mikseᴋârput.

⁴² Tagvanelo unuktut okperivât.