Johannese 1 - Labrador Inuttitut Heritage Bible

Kristûsib nelâgut Gudeoninganik uviningorninganiglo. Johannesib baptiterijub oᴋauteᴋarninganik Jêsusemik. Jêsusib annerosungninganik ilinniartime sivorlinginik.

¹ Pigiarnerme oᴋausek ipok, oᴋauserlo Gûdemêpok, oᴋauserlo Gûdiovok.

² Tâmna pigiarnerme Gûdemêpok.

³ Tamaitaᴋsuit tâpsomunga pingortitauvut, tâpsomalo assiagut pingortisimangilat pingortisimajut.

⁴ Inôsek tâpsoma iluanêpok; inuillo inôsek ᴋaumanerivât.

⁵ ᴋaumajorlo ᴋaumaivok tâᴋtomut, tâᴋtomiullo tukkisingilât.

⁶ Inungmik tilijaumajoᴋarpoᴋ Gûdemut, Johannesemik atilingmik.

⁷ Tâmna tikilauᴋpok kigligiutsijôvlune, kigligiutserᴋovlugo ᴋaumajomik, ilûnnaita tâpsomunga okpertitaulerᴋovlugit.

⁸ Nangminek tâmna ᴋaumajôlaungilak, kigligiutsijuksauvlunele ᴋaumajomik.

⁹ Tamadja mikseᴋârtok ᴋaumajok, inungnik ilûnnainik ᴋaumarsaijok, nunamut tikitunik.

¹⁰ Silaᴋsoarmêlauᴋtok, silaᴋsoarlo tâpsomunga pingortitauvok; silaᴋsoarmiullo illitaringilât.

¹¹ Inuᴋotiminut tikipok, inuᴋotingitalo illaliungilât.

¹² Tâpsominga illaliortut ilûnnaita, tâpkoa pitsartunermik tunitjivigivait, ᴋitorngaulerᴋovlugit Gûdemut, okpertut tâpsoma atinganut.

¹³ Tâpkoa aungmit pingitut, uviniub pijomajanganillônêt, angutib pijomajanganillônêt, Gûdemille erniangomajut.

¹⁴ Oᴋauserlo uviniolerpok, inôᴋatigilutalo, (ânanauningalo takolauᴋpavut, ernetuab Atâtamit pijub ânanauningatut) saimanelijartok, mikseᴋârnelijartorlo.

¹⁵ Johannese tâpsominga kigligiutjivok, ᴋaggudlarlunelo oᴋarpok: Tâmnauvok oᴋautigilauᴋtara imâk: ᴋingunipkut ᴋainiarpok sivunimnêlauᴋtok, pilerᴋârtinanga ilaurame.

¹⁶ Tâpsomalo pitaᴋaloringninganit tigusilauᴋpogut saimanermik saimanermut.

¹⁷ Perᴋojalle Môsesekut tunijauvut, saimanek mikseᴋârnerlo Jêsuse Kristûsekut pivuk.

¹⁸ Gûdemik takomajoᴋangilak. Ernetuab, Atâtab sarliartangata, tamattominga nelojungnaitilauᴋpâtigut.

¹⁹ Tamadja Johannesib kigligiutjininga, Jûdit tiliklermatta Jerûusalemit ajoᴋertuijunik Lêvitiniglo, aperijauᴋovlugo: Kinauvêt?

²⁰ Kigligiutjivorlo saglunanelo, kigligiutjivorlo: Kristûseungilanga.

²¹ Aperivâllo: Kinauvêt? Eliaseôvêt? Oᴋarpok: Taimnaungilanga. Nelautaijôvêt? Kiovaillo: Aukak.

²² Tagva oᴋautivât: Kinauvêt? Kiojungnarᴋovluta uvaptingnik tiliklertunut. Igvit ᴋanok pivlutit oᴋauseᴋarᴋêt?

²³ Oᴋarpok: Ajoᴋertuijub nippinga uvanga inuᴋangitome: Nâlekab apᴋotiksanga âᴋiksorsiuk; sôrlo nelautaijoᴋ Jesaiase oᴋarmat.

²⁴ Tilijaujullo Farisêerinit pijut.

²⁵ Tâpkoa aperivât oᴋautivlugolo: Sôk baptisivêt, Kristûseunginavit, Eliaseonaglônêt, nelautaijônaglônêt?

²⁶ Johannesib kiovait oᴋarlunelo: Imermut baptisivunga, akunapsingnêlerporle illitaringitase.

²⁷ Tâmnauvoᴋ kingunipkut ᴋainiartok sivunimnêlauᴋtok, nelopᴋotivigijara itigagutîgik singêjarlugik.

²⁸ Tamattominga pijoᴋalauᴋpok Betâbarame Jordanib akiane, Johannesib baptisivingane.

²⁹ Uvlub aippangane Johannesib Jêsuse nelipsariartortine takovâ oᴋarlunelo: Ahâk tagga Gûdib saugârsunga silaᴋsoarmiut ajorninginik nangmartok!

³⁰ Tâmnauvok oᴋautigilauᴋtara: Kingunipkut angut ᴋainiarpok sivunimnêlauᴋtok; pilerᴋârtinanga ilaurame.

³¹ Ilitarilaungilaralo; Israêlekunulle ilitarijaulerᴋovlugo, tamanna pivlugo baptisijartorpunga.

³² Johanneselo kigligiutjivok oᴋarlunelo: Takolauᴋpunga, Anernek akᴋarmat ᴋilangmit, tingmiatut Taubetut, tâpsomanêlerdlunelo.

³³ Ilitarilaungitaralo; baptisijartorᴋojimale imermut, tâpsoma oᴋautivânga: Takoleruvit Anernerub akᴋarvigijanganik ᴋânganêvigijanganiglo, tâmnauvok Anernermut ajunginermut baptisijok.

³⁴ Takolauᴋparalo; kigligiutsilungalo tâmna, Gûdib erneringmago.

³⁵ Uvlub aippangane Johannese tagvanênivoᴋ ilinniartime illâgik maggûk illagilugik.

³⁶ Jêsuselo arvertartok takogamiuk, oᴋarpok Ahâk, tagga Gûdib saugârsunga!

³⁷ Ilinniartîkitalo oᴋartok tussarpâk, Jêsuselo malikpâk.

³⁸ Jêsusele ᴋeviarpok, maliktîngnelo takovak, oᴋautivlugiglo: Suna ᴋenerpitikô? Tâpkoale oᴋautivâk: Rabbi (imaipok: ajoᴋertuijok), kikkunêkêt?

³⁹ Tâpsoma oᴋautivak: ᴋailutik takojartortiko! ᴋaivuk takolugolo, uvlormelo tamattomane tâpsomane uvlilerpuk; stûndele 10 iolerpok.

⁴⁰ Magguk tâpkua, Johannesemit tussartuk Jêsusemiglo maliktuk, aippanga Andrêaseovoᴋ, Sîmonib Pêtrusib nukanga.

⁴¹ Tâpsoma angajune Sîmon naiperᴋârpâ, oᴋautivlugolo: Messîase naipipavut (imaipok: Kristûse, ubvalo: mingoarsimajok).

⁴² Jêsusemullo pitippâ: Jêsusib takogamiuk, oᴋautivâ: Sîmoneovotit, Jônasib erninga; Kêfasemik ateᴋartuksauvotit (imaipok: Pêtrusemik, ubvalo: ᴋairtomik).

⁴³ Uvlub aippangane Jêsusib ama Galilêamut aijomavlune Filippuse naipipâ oᴋautivlugolo: Malinga!

⁴⁴ Filippusele Betsaidamiôjok, Andrêasiblo Pêtrusiblo iglugasaksoarmioᴋatingak.

⁴⁵ Filippusib Natânaêl naipipâ oᴋautivlugolo: Tâmna naipilauᴋpavut, Môsesib perᴋojane nelautaijullo aglagutigilauᴋtangat, Jêsuse, Jôsefib erninga, Nazaremioᴋ.

⁴⁶ Natânaêliblo oᴋautivâ: Nazaretemit sumik ajungitomik pijoᴋarungnarᴋâ? Filippusib oᴋautivâ: ᴋailutit takojartoruk!

⁴⁷ Jêsusib Natânaêl tikitine takovâ, oᴋautigivlugolo: Ahâk, tagga Israêlite idluartok, nelangaineᴋangitok!

⁴⁸ Natânaêlib oᴋautivâ: Nakît ilitarivingâ? Jêsusib kiovâ oᴋautivlugolo: Filippusemut ᴋaiᴋojauᴋârtinak, napârtub paungatannaᴋarpaktub atânêtilutit, takolauᴋpagit.

⁴⁹ Natânaêlib kiovâ oᴋautivlugolo: Rabbi, Gûdib ernerivâtit, igvit Israêlitit atanerivâtit.

⁵⁰ Jêsusib kiovâ oᴋautivlugolo: Oᴋperpotit oᴋautilaurapkit, napârtûb paungatannaᴋarpaktub atânêtilutit takolaurapkit: tamattomangat pijariarᴋortunersanik takojomârpotit.

⁵¹ Oᴋautivlugolo: Âhamarik, âhamarik oᴋautivapse: Mattoma kingorngagut ᴋilak angmajoᴋ takoniarpase, Gûdiblo Engelingit ᴋangatartut akᴋartullo Inûb Erninganut.