Joel 3 - Labrador Inuttitut Heritage Bible

¹ Ahâk, uvlune tâpkonane, neliutomelo tâpsomane, Jûdab Jerusalemiblo aularutijaujungit utertikupkit,

² Inôᴋatigêksuit tamaita katersoromârpakka tikiutilugillo Jôsafatib naᴋsanganut; tagvanelo erᴋartoromârpakka inuᴋotikka kingormgutijakkalo Israêle pijutigilugit, siamartitangit inôᴋatigêksuit akornganut, nunalo piga avgoarlugo.

³ Inuᴋotikkalo imerautigilauᴋpait; nukappiarlo tauᴋsiutivât anguniarpaktomut, niviarsiarlo vainesiutigivât imerungnarᴋovlugit.

⁴ Ilipselo Tiruse, Zidonelo, Filisterillo erᴋât, suksauvisê uvamnût? Akkiniaromavisê uvamnîk? Akkiniaraloarupsingalo uteromalerivunga tuavidlunga erinesuklungalo akkiniarniselo utertitsomavlugo niaᴋupsingnut.

⁵ Silbereᴋotiga goldeᴋotigalo tigugapsigik, pikkalo pikuminartut ajungitullo âgapsigik katimaviᴋotipsingnut;

⁶ Jûdablo ᴋitorngangit Jerusalemiblo ᴋitorngangit aulailaurapsigik Griggit erninginut, ungasiktitsijungnarᴋovluse tâpkoninga nunamingnit;

⁷ Ahâk, aulartitsomavaᴋᴋa nunamit aulaivigilauᴋtapsingnit tâpkoninga, akkiniarniselo utertitsomavlugo niaᴋupsingnut;

⁸ Erniselo paniselo aulaijomavakka Jûdab ᴋitorngangita agganginut, tâpkoalo aulaijomârivait ama Sibamiunut, inôᴋatigêksoarnut ungasiktunut: Nâlegaᴋ taimak oᴋalaungmat.

⁹ Tamanna aᴋpautigisiuk inôᴋatigêksuit akorngane: Unatarnermik âᴋiksoileritse: angutit sôngojut aulasigik; sorᴋsuktuksat ilûnatik ᴋaglilerlit majoarlillo.

¹⁰ Ibjomik makperteriutise kauktorsigik saviksoangortilugit, iviksukatautiselo ᴋalugiangortilugit; sangêtut oᴋarlit: Sangijôvunga.

¹¹ Tuavigitse ᴋailuselo, ilûnase inôᴋatigêksoangojose, avatânêtose, katimaleritselo: tagvunga aᴋᴋartikit pitsartujoᴋotitit, Nâlegaᴋ.

¹² Inôᴋatigêksuit aulajârlit, majoarlutiglo Jôsafatib naᴋsanganut: tagvane iksivajomagama inôᴋatigêksuit avatânêtut erᴋartoromavlugit.

¹³ Iviksukataut atorsiuk, katersoraksat innersimangmatta; ᴋaigitse, tullerajârileritse, iptejaivik tatadlarmat, ipteᴋautillo ulipkidlarmatta; idluiningat angijôdlarmat.

¹⁴ Inugiartoᴋsuit, inugiartoᴋsuit naᴋsarme erᴋartuivingme! Nâlekab uvlunga ᴋaglimat naᴋsarme erᴋartuivingme.

¹⁵ Seᴋineᴋ taᴋᴋerlo tâᴋsilerpuk, uvloritjallo ᴋaumanitik saᴋᴋijârtailititsomârpât.

¹⁶ Nâlegarlo ᴋalingoaromârpoᴋ Zionemit, nippinelo anitilugo Jerusalemit; ᴋillaillo nunalo sajugomârput: Nâlegarle ᴋemâviksaujomârpoᴋ inuᴋotiminut, saputjauviksauvlunelo Israêlib ᴋitornganginut.

¹⁷ Taimak ᴋaujilârpose uvangaugama Nâlegaᴋ Gudise, Zioneme ᴋaᴋᴋamne ivsornaitome ineᴋartunga: Jerusalem tagva ivsornaijomârpoᴋ, takorngartallo apᴋutigijungnairomârpât.

¹⁸ Uvlorme tâpsomane ᴋaᴋᴋaᴋsuit kusseromârput vainemik mamaktomik, ᴋaᴋᴋallo ᴋôᴋalârput imungmik, Jûdablo kôngit ilûnatik kôlârput imermik; puilajorlo anilârpoᴋ Nâlekab iglunganit, Sittimib naᴋsanga koverarlugo.

¹⁹ Egipten asserornerlukungoromârpoᴋ, Edomelo sunaᴋajuitungoromârpoᴋ asserorsimanelik, idluitulineᴋ piniarutaujoᴋ Jûdab ᴋitornganginut pivlugo, auk passijaksaungitoᴋ kovilaungmatsuk nunangane.

²⁰ Jûdalo soraijuitomik inuᴋaromârpoᴋ, Jerusalemelo kinguvângoᴋatigênit kinguvângoᴋatigênut.

²¹ Aungallo ivsornaitilaungitara ivsornaitilârpara; Nâlegaᴋ ineᴋarmat Zioneme.