Joel 1 - Labrador Inuttitut Heritage Bible

¹ Nâlekab oᴋausinga Joelemut Petuilib erninganut tikitoᴋ.

² Tamanna tusarsiuk, ilipse inutoᴋaujose, siutiselo manisarsigik, ilipse nunamiojose tamapse. Taimaitoᴋalauᴋâ uvlupsingne, atâtapselônêt uvlunginê?

³ Kitorngapsingnut oᴋautigisiuk, ᴋitorngaselo oᴋautjilit ᴋitorngamingnik, tâpkoalo ᴋitorngangit kinguvângolârtunik.

⁴ Kopergut minaumikliutigijangit piglertârait nerrivait piglertâraillo minaumikliutigijangit piglertat nerrivait, piglertallo minaumikliutigijangit piglertaujat nerrivait.

⁵ Tupaleritse, ilipse taladlartose, ᴋealuselo; nipjarlugitse, vainemik imertudlartose, vaine mamaktoᴋ pivlugo; ᴋanipsingnit pêjartaungmat.

⁶ Inôᴋatigêksuit majorarsimangmatta nunamnut, sôngodlartut, kitiksaungitullo; kiguteᴋarput loevib kigutingititut, erᴋlerpaᴋarpullo loevetut sôngojotut.

⁷ Napârtuga vaineliksataliksaᴋ asserorpât, napârtugalo paungatannaktaliksaᴋ serᴋomipât; sunairutimarikpât suksaujungnaitilugolo; akkerungit ᴋaᴋorsititauvut.

⁸ Ogguarit uigasuktut poksajamik atisimajotut inôsungnime uiksanga pivlugo.

⁹ Tunergutiksaᴋ nerᴋiksaᴋ tunergutiksarlo imiksaᴋ noᴋartitauvuk Nâlekab iglunganit; ajoᴋertuijut, Nâlekab kivgangit, ogguarput.

¹⁰ Perorsêvik asserortauvoᴋ, nuna ogguarpoᴋ; senaugaksaᴋ asserortauvoᴋ, vainiksat iptêrutivut, orᴋsuksallo ᴋunolerput.

¹¹ Kangusudlaritse, ilipse perorsêvilerijose, ᴋeadlaritse, ilipse vaineliksalerijose, senaugaksat senaugâluksallo pivlugit; katersoraksat perorsêvingme sujudlarmatta.

¹² Napârtoᴋ vaineliksatalik iptêrutivoᴋ, napârtorlo paungatannaktalik ᴋunolerpoᴋ; napârtut kingminaujarsoaksatalik pâlmillo mamaᴋtuniglo paungalît, ilâ, perorsêviub napârtungit ilûnatik iptêrutivut; ᴋuviasungneᴋ assiongmat inuit ᴋitorngangine.

¹³ Kaigitse, poksajanik atisileritse, ogguarluselo, ilipse ajoᴋertuijose; ᴋeadlaritse, ilipse kivgartortose tunerguservingme; ᴋaigitse, poksajanik atisimavluse, inangagitse unnuaᴋ nâvlugo, ilipse kivgartortose Gudimnik; senaugaᴋ tunergutiksaᴋ, tunergutiksarlo imiksaᴋ ᴋaitaujungnairmatta Gudipse iglunganut.

¹⁴ Nerritailiviksamik âᴋiksoileritse, katimaniksamik opinartomik katimaᴋojileritse, angajoᴋaujut nunablo inungit ilûnatik katimalit Nâlekab Gudipse iglungane, Nâlekamullo ᴋaigarsugitse.

¹⁵ Kapianarmêk uvloᴋ tâmna, Nâlekab uvlunga ᴋanidlarmat, tikilârporlo asserorsaijotut Ajugaᴋangitomit.

¹⁶ Nerᴋiksaᴋ pêrtaungilâᴋ ijipta sânganit, ilâ, ᴋuviasungneᴋ erᴋiertornerlo Gudipta iglunganît?

¹⁷ Karngasûtit auvut ibjub iluane; ᴋematulivît sunairutisimavut, ilijiviksat serᴋomitauvut; senaugaksat iptêrutingmatta.

¹⁸ Kappê! Tuktuvait âlavut! Nergjutit ungôrtat siarklerput, nerrinasugviksaᴋanginamik; ilâ, saukat katimgajut perlilerput.

¹⁹ Nâlegaᴋ, ilingnut ᴋaigarsukpunga; ikoma nungûtsisimangmat nerrinasugvingnik puilaveᴋangitomêtunik, ikoâlanerublo napârtut perorsêvingmêtut tamaita ikipait.

²⁰ Ilâ, nergjutit perorsêvingmêtut angâjorarput ilingnut, kôt imeᴋasût imairutingmatta, ikomablo nerrinasugvît puilaveᴋangitomêtut nungumagit.