Jesaiase 9 - Labrador Inuttitut Heritage Bible

Kristusemik.

¹ Taktoᴋatsainaromangilak kappiasugviojome mãna. Nalliutome ᴋângertome Sêbulonib nunanga Naftaliblo nunanga mittautiginartungortitaumavuk, nalliutome pijomârtome nertornartungortitaujomârput apᴋut imarbingmut sangmijoᴋ Jordaniblo ungatâ Galilêalo nallojolik.

² Nunaᴋatigêt tâᴋsiortut ᴋaumajoᴋsoaᴋ takkovât, nunaᴋatigênullo toᴋub tachalininganẽtunut ᴋaumajoᴋ nuimavoᴋ.

³ Nunaᴋatigêt unuksivalliatipattit, ᴋuviasungningat angijôtipat. Sângne ᴋuviasukput, sôrlo kattersoiviub nalliuningane ᴋuviasuktoᴋarpangmat, sôrlo igiaᴋomijartoᴋarpangmat perᴋutinik aitortuivingme,

⁴ Nangmautit nangmagaksangit, issaᴋautit ᴋollêgingnut attortut, aulatsijingitalo annautangit navigangne, sôrlo Midianib nalliuningane.

⁵ Kammît illũnatik attusût sorsuktuksanut annorâllo sallumaititaumajut aungmut ikkitauvut ikkomamullo nungutauvut.

⁶ Nutarârsuk erniangongmat uvaptingnut, erneᴋ tunijaungmat uvaptingnut; nâlegauninga tuinganẽpoᴋ; atteᴋarporlo: tatamnadlartomik kajusimajomik, Gûdemik pitsartujoᴋsoarmik, Atâtaujomik issoᴋangitomut, Nâlekamik ullapirsaijomik.

⁷ Nâlegauvik angijorortitsomavlugo ullapirsauteᴋatsainartitsomavlugo Dâvidib iksivautanganẽpoᴋ attaniovinganelo, âᴋiksorlugo erᴋartuitsiarnermut idluarsainermullo mãnanit issoᴋangitomut. Kilangmiugasaksuit Nâlegangata illungertorninga tamattominga piniaromârpoᴋ.

⁸ Nâlekab oᴋauseᴋ tillikliutivâ Jâkomut, aᴋᴋartillugo Israêlemut.

⁹ Tukkisileromârpâllo Efraimib inuᴋotingita illũnatik Samâriamiullo, pimmariuterlutik piojoridlarlutiglo imâk oᴋauseᴋartut:

¹⁰ Igaliksajat kattaksimagalloarput, ujaraille sannamatsiartut âᴋigomavavut; nappajut sikomôrit nakkasimagalloarput, zêderille taipkoa inningine napârtitsomavavut.

¹¹ Rêtsinib sorsuktuksaᴋotingit Nâlekab ajugaᴋangititsomârpait tâpkonunga õmigijingillo sakkoᴋartillugit.

¹² Siriamiut Israêle êjomarpât sângannit Filisterillo tunnuannit, ᴋanitik aitarlugit. Tamakkoale tamaita Nâlekab ningausingata sorairutigingilait, aggangillo issamivut sulle.

¹³ Nunaᴋatigêlle sâgiatsengilat sugiartimingnut, ᴋilangmiugasaksuillo Nâlegangat ᴋennilungilât.

¹⁴ Taimaimat Nâlekab kippivait Israêlib niaᴋunga pamiungalo, palmit iviksuillo uvlorme attausẽnarme.

¹⁵ Niaᴋunga tagva inutoᴋaujut nertornartut, pamiunga tagva nallautaijut saeglôtiksanik ajoᴋertuivaktut.

¹⁶ Nunaᴋatigêt tassiortingit uiveriklertôngmatta, tassiortaujullo asseroijôngmatta.

¹⁷ Taimaimat Nâlekab tâpkoa inôsuktoᴋotingit angutit ᴋuviagingilait, illiarsuᴋotingillo uigarneᴋotingillo nâpkigingilait, tâpkoa illunamasiatik tappatojôngmatta idluitullijôngmattalo, illũnatiglo ᴋaningit sillainartoᴋsoarmik oᴋauseᴋarmatta. Tamakkoalle tamaita Nâlekab ningausingata sorairutigingilait, aggangillo issamivut sulle.

¹⁸ Idluitullineᴋ ikkomatut ikkoalangmat ukpiganik perornerdluktuniglo kakkilautilingnik nungutsivlune ikkitsivlunelo ukpiganik napârtoliksoarmẽtunik, iserluksoarmik ᴋongmuartitsivlune.

¹⁹ Kilangmiugasaksuit Nâlegangata ningausinga pivlugo nuna ikkitaumavoᴋ, nunaᴋatigêllo ikkomamut nungutaksaujutitut-iput; ᴋattangutiminik nâpkiniktoᴋangilaᴋ.

²⁰ Tallerpimik tungãne nerᴋelerigalloarlutik kâkput, saumimik tungãnit nerrigalloarlutik aᴋᴋeartulungilat. Illũnatik tallermik uviningit nerᴋiksarivait,

²¹ Manassib Efraime Efraimiblo Manasse. Tamarmiglo illagêklutik Jûdamut sâput. Tamakkoale tamaita Nâlekab ningausingata sorairutigingilait aggangillo issamivut sulle.