Jesaiase 8 - Labrador Inuttitut Heritage Bible

Israêlitit sugiartauningannik Gûdemiglo nâlaktut manigortauningannik.

¹ Nalekable oᴋarvigivânga: Aglagaksamik angijomik tigusilerit aglaklutillo, inuit aglangnerivaktangit attorlugit: Mahersalalemut Hasbasemut! (imaipoᴋ: aᴋsârniksaraitomut, arᴋtaisaraitomut.)

² Uvangalo kigligiudsijuksâk okpernartûk najortigivâkka: Uria ajoᴋertuijoᴋ Saggarialo Jebereggiab erninga.

³ Nallautaijorlo arnaᴋ najortigivara, tâmna singailerpoᴋ ernermiglo ernivoᴋ. Nâlekablo oᴋarvigivânga: una atseraleruk Mahersalalemik Hasbasemik.

⁴ Nukappiarârsuk oᴋarungnalerᴋârtinnago: atâtâk, anânâk — tagva Damaskusib akluitoᴋsôningit Samâriamiullo aᴋsârnigarijangit nangmartaujomârput Assiriamiut attaningata sângagut.

⁵ Ammalo Nâlekab oᴋarvigivânga oᴋarlune:

⁶ Nunaᴋatigêksuit ukkoa Siloab imingit achẽtut nachogingmattigik, Rêtsinelo Remaliablo erninga sajûtigingmattikik,

⁷ Takkûk, tamanna pivlugo Nâlekab tikkitaurᴋojomârpait kôksûb imersoanginut sôngojoᴋsôjunut — tagva Assiriamiut attaningannut pitsartujoᴋotinginullo tamainut. Kudjidlarlunelo (kôksûb) sinâne tamaita ulligomârpait.

⁸ Achevlunelo Jûdamut ulligomârpâ ullutsautillugolo inuit ᴋongasingit tikkidlugit, esarᴋûngnelo issividlugik nunaᴋotit illũnât illumeromârpâ, Imânuele.

⁹ Idluitullititse, nunaᴋatigêktose, serᴋomitaujomârpose. Tussaleritse, illũnase ungasiktome nunaᴋartose: parngnaileritse, serᴋomitaujomârpose — illa parngnaileritse, serᴋomitaujomârpose.

¹⁰ Angeᴋatigêgitse kajusimanipsingnik, serᴋomitauvoᴋ; oᴋausermik oᴋaluaritse, sullitsangilaᴋ Gûdib illagingmattigut.

¹¹ Imâk Nâlekab oᴋarvigingmanga, aggakka tigumiarlugit inerterlungalo, arvertarᴋonnanga, nunaᴋatigêt ukkoa apᴋotigijangine, oᴋarlune:

¹² Pikkablartônerainiarase nunaᴋatigêt ukkoa pikkablartônerarpaktanginik, erᴋsigijangit erᴋsiginiarasigik sivoraginagillo.

¹³ Kilangmiugasaksuit Nâlegangat opigissiuk, tâmnauvoᴋ erᴋsigijaksarijase sivoragijaksarijaselo.

¹⁴ Ivsornaitoviksôjomârpoᴋ tagva ujarauvlunelo aporvik ᴋairtôvlunelo sinaungasautaujoᴋ inûᴋatigênut maggoinut, Israêlib kiguvânginut, nigaujomârporlo ochojutauvlunelo Jerusalemiunut.

¹⁵ Unuktullo aporvigijomârpât ochovlutiglo serᴋomilutiglo, nigarsimajomârput pijauvlutiglo.

¹⁶ Nallunaijaijutiksat kattusikkit perᴋojallo naᴋiterlugit illiniartima akkornganne.

¹⁷ Uvangale Nâlegaᴋ nerriugivara, kênaminik ijersijoᴋ Jâkokkunit, tattigivlugolo.

¹⁸ Ahâk, tamânẽpunga ᴋitorngallo Nâlekab tunijangit uvamnut, Israêlemut nallunaikutaksaurᴋovlugit tataminiarutiksaurᴋovlugillo ᴋilangmiugasaksuit Nâlegangannit, Zionib ᴋaᴋᴋangane inneᴋartomit.

¹⁹ Imâglo oᴋauseᴋarpatta illipsingnut: Angakkullo nallautainerluktullo nipjârtut, issivsortut apperijartorsigik! — ajornarpoᴋ. Nunaᴋatigêt appertsoriaᴋangilât Gûdemingnik? Inôjut pivlugit toᴋungajut apperijartorlugit pijuksauvitâ?

²⁰ Perᴋojanik nallunaijaijutiksaniglo (malligitse!) Taimak oᴋaromângilât ᴋaumajoᴋangitut illumingne?

²¹ Nuname arvertarput kappiasuklutik kâklutiglo. Kâdlaruniglo ningalerput, attanitik Gûditiglo oᴋarnerlûtigivlugik.

²² Arlorput takpaunga takkunârlutiglo nunamut, kappianartoᴋarpoᴋ tagvane tâᴋtomiglo tâᴋsoarmiglo ᴋoaᴋsârnartomik; tâᴋtoᴋsoarmut pititaumavut.