Jesaiase 66 - Labrador Inuttitut Heritage Bible

Idluartut pilloringningannik.

¹ Nalegak oᴋarpoᴋ imâk: Kilak iksivautarivara, nunalo ittikkama ikkovrarivât; sunamik uvamnut iglolioromavisê. sunamiglo innilangaviksamnik?

² Aggama tamakkoa tamaita sanavait, taimaglo tamakkoa illũnatik pingulerput, oᴋarpoᴋ Nâlegaᴋ. Imaitoᴋ takunârpara: ajulertoᴋ, serᴋomisimajomik anernilik, oᴋausimnik sivorajoᴋ.

³ Tuktuvangmik toᴋotsijoᴋ inuartotut-ipok; saugamik tunergusertoᴋ ᴋingmermik ᴋimitsijotut-ipoᴋ; nerᴋiksarnik tunergusertoᴋ tunergusertotut-ipok kuingêngib aunganik; tippitsiariksaumik tunergusertoᴋ nertordlertotut-ipoᴋ piungitomik (Gudingoarmik.) Sôrlo taipkoa apᴋutitik aneringmagit (issumamingnik), sôrlolo tarningita maᴋojungnartut ᴋuviagingmagit,

⁴ Taimak uvangatauᴋ kappiasûtigijaksangit anerijomârpakka (issumamnik), erᴋsigijamingnullo tikkitaurᴋojomârpakka imâk pivlugo: ᴋairᴋojitillunga kiolungimatta, oᴋartillunga tussalungimatta, idluaringitamnigle piniarmatta, ᴋuviagingitamniglo anerosungmatta.

⁵ Nâlekab oᴋausinginik tussaleritse, illipse, tâpsoma oᴋausinginik sivorajose: Kattangutise illipsingnik ômisuktut, avitsijut illipsingnik attera pivlugo oᴋaralloarput: Nâlegaᴋ nertornarsile, ᴋuviasungnipsingnik takonârᴋovluta, — tâpkoale kangusuktitaujomârput.

⁶ Nipliajoᴋarpoᴋ pervalâjomik iglugasaksoarnit, nipliajoᴋarpoᴋ kattimaviksoarmit, Nâlegaᴋ nipliavoᴋ, ômigijiminik akkiniartoᴋ.

⁷ Sillimarᴋârane (Zione) ernilerêrpoᴋ, ernisurᴋârane angutiarsungmik ernertâlerêrpoᴋ.

⁸ Kina taimaitomik tussalauralloarᴋâ? kina taimaitomik takolauralloarᴋâ? Nuna saᴋᴋijârtitaujungnarᴋâ uvlorme attausẽnarme, inugasaksuillo attautsekut erniangojungnarᴋât? Mãnale Zione ernisulerame, ᴋitorngane erniarilerêrpait.

⁹ Igliaᴋ angmartigapko, saᴋᴋijârtitsijuksaungilangâ? oᴋarpoᴋ Nâlegaᴋ. Ubvalo: ernilerᴋojigama, ernijungnailerᴋojijuksaugivêk? oᴋarpoᴋ Gudit.

¹⁰ Jerusaleme illagivlugo ᴋuviasugitse, ᴋuviagisiuk illũnase tamattominga nagliktose, iggiaᴋomijaᴋatigisiuk illũnase, tamattominga kiksaruteᴋartose,

¹¹ Milluksivluse ivianginginit ullapirsautelingnit nãmaksititauvluselo, alluktorluselo nertornarninganit angijoᴋsoarmit nekoᴋsititauvluselo.

¹² Nâlegaᴋ imâk oᴋarmat: Ahâk, ullapirsaut sangutipara illingnut kôksoatut, nallojullo perᴋutevaksoangit kôktut kutjertotut. Tagva milluksijomârpose kivgumiartaujomârluselo tillaijartaujomârluselo, sêrᴋungine iksivavluse.

¹³ Sôrlo anânab ᴋitorngane manigormago, taimak manigoromârpapse, illa, Jerusaleme manigortaujomârpose.

¹⁴ Takojomârpose ômatiselo ᴋuviasugomârput, sauniselo iviksukatitut nutângortitaujomârput. Tagva Nâlekab aggangit mallungnarsijomârput tâpsoma kivgangine, ningaumajârningale tâpsoma ômigijingine.

¹⁵ Ahâgle, ikkomakut Nâlegaᴋ tikkitsomârpoᴋ, ᴋamutingillo aᴋᴋunaᴋsoatut-iput, ningaumajârnine saᴋᴋijârtipâ ikkomakut suangadlarninelo ikkomab ikkoalaningagut.

¹⁶ Nâlegaᴋ ikkomamut uvinilingnik tamainik erᴋartuijomârmat saviksoarminullo. Nâlekablo inôjungnairtitangit unudlaromârput.

¹⁷ Ingmingnik ivsornaititut epᴋêjartullo perorsêvingne, attauseᴋ akkunermingnẽtoᴋ igjarlugo, kuingêngevinermiglo ᴋuglugianiglo nunivakaniglo nerrijut, tâpkoa attautsekut nungutaujomârput, oᴋarpoᴋ Nâlegaᴋ.

¹⁸ Uvangalo piniarningit issumangillo (sugiarutigijomârpakka). Nalliutijomârporlo nallojut oᴋausiggillo illũnamatsiatik kattersortauviksangat, tikkitsomârmatta, nertornarnera takojartorlugo.

¹⁹ Nallunaikutaniglo tunidjijomârpunga, piulijaumajullo illangit tillijomârpakka nallojunut: Tarsusemut Pûlemullo Lûdemullo, pittiktarpaktunut, Tûbalemullo Javanemullo ᴋikkertanullo ungasiktunut, oᴋautigijaunimnik tussalungitunut, nertornarnimniglo takolungitunut; nertornarneralo oᴋautigijaksarivât nallojut akkornganne.

²⁰ Kattangutiselo tamaita nallojunit tamainit tamaungartitsomârpait, tunergutiksarivlugit Nâlekamut, horsikut ᴋemuksikullo akkerautîkkullo horseojârtokullo kamêlikullo Jerusalemut, ᴋaᴋᴋamnut ivsornaitomut, oᴋarpoᴋ Nâlegaᴋ, sôrlo Israêlikkut tunergutiksanik illuleᴋutine ivsornaitune ᴋaitsivangmatta Nâlekab iglunganut.

²¹ Tâpkoalo illangit anerijomârpakka, ajoᴋertuijôrᴋovlugit leviteorᴋovlugillo, oᴋarpoᴋ Nâlegaᴋ.

²² Sôrlo ᴋilak nutâᴋ nunalo nutâk pingortitsomârtakka aulajuitôngmatta kênama sângane, oᴋarpoᴋ Nâlegaᴋ, taimaktauk kinguvâksase attiselo aulajuitôjomârput.

²³ Taᴋᴋeᴋ nutaulerangat, sabbateᴋalerangallo uviniggit illũnamatsiatik tikkitsomârput tuksiaromavlutik sâmne, oᴋarpoᴋ Nâlegaᴋ.

²⁴ Annijomârpullo takojartorlugit toᴋungajut uvamnut idluitullijut timingit; taipkoa ᴋuglugiangat toᴋoniatsangimat, ikkomangalo ᴋamminiatsangimat; uvinilingnullo illũnainut maᴋojugijaujomârput.