Jesaiase 65 - Labrador Inuttitut Heritage Bible

Nâlegaᴋ kiovoᴋ: Idluitut erᴋartortaujomârput, idluartulle piulijaujomârput.

¹ Appersortaujungnarpunga uvamnik apperᴋuteᴋalungitunut, nagvârtaujungnarpunga uvamnik ᴋennerasuangitunut; inungnut attera taivlugo tuksiangitunut oᴋarpunga: Mânẽpunga, mânẽpunga.

² Uvloᴋ nâvlugo aggakka issakpakka inungnut tappatojunut, arvertartunut issumamingnik apᴋome idluangitome.

³ Tamadja inuit ningaumajârtitsitsainartut uvamnik kênama sânganêdlutik, tunergutiksanik ᴋaitsijut perorsêvingne, tippitsiariksaumiglo ikkoalatitsijut ivitât ᴋangine,

⁴ Illuverne inniksaᴋartut, ᴋairosungne siniktartômajut, kuingêngevinermik nerrijut, allupsaᴋartut maᴋojungnartomik ukkosimingne,

⁵ Oᴋartut: Allivarit! aktorniarnanga! ivlernadlarama illingnut. Tâpkoa pujôvut kingâmne, ikkomauvut ikkoalatsainartoᴋ uvloᴋ nâvlugo.

⁶ Ahâk, (idluitulliningit) aglaksimavut kênama sângane. Nippangeromângilanga akkiniaromârpungale, illa sânginut akkiniaromârpakka,

⁷ Idluitullinise atâtagijapselo idluitulliningit kattitillugit, oᴋarpoᴋ Nâlegaᴋ; ᴋaᴋᴋane tippitsiariksaumik ikkoalatitsingmatta, ᴋaᴋᴋârulangnelo mittautigingmanga, taimaimat tunitjerᴋâromârpunga akkiksanginik sânginut.

⁸ Nâlegaᴋ oᴋarpoᴋ imâk: Sôrlo vainiksatalik nagvârtaungmat paungalukat akkornganne oᴋartoᴋarlunelo: asserorniarnagit, attorungnartunik illaᴋarmatta, — taimailioromârpungatauᴋ kivgakka pivlugit, illũnainiungitoᴋ asseroivlunga.

⁹ Jâkomillo kinguvâksamik saᴋᴋertitsijomârpunga Jûdamillo kingormgujijuksamik ᴋaᴋᴋamnik, illa anerijama perᴋutigijaksarivât, kivgakkalo tagvane igloᴋaromârput.

¹⁰ Sâronelo saukkat nerᴋiksarsiorvigijomârpât, naᴋsarlo Aggore tuktuvait aᴋopivigijomârpât, inuᴋotima uvamnik apperᴋuteᴋartut pingita.

¹¹ Illipsele, Nâlekamik ᴋemaijose, ᴋaᴋᴋamniglo ivsornaitomik puigortose, nerrimârviksoarmik âᴋiksoijose Gâtemut, imiksamik amigangitomik kovisijose Mênimut,

¹² Illipse tunijomârpapse saviksoarmut, illũnase putilluse toᴋotauvingmut imâk pivlugo: ᴋairᴋojitillunga kiolunginapsinga, oᴋartillunga tussalunginapsinga, idluaringitamniglo piniarapse ᴋuviagingitamniglo anerosugapse.

¹³ Tamanna pivlugo Nâlegaᴋ Gûde oᴋarpoᴋ imâk: Ahâk, kivgakka nerrijuksauvut, illipsele kâktuksauvose; ahâk, kivgakka imertuksauvut, illipsele imeruktuksauvose; ahâk, kivgakka ᴋuviasuktuksauvut, illipsele kangusuᴋtuᴋsauvose.

¹⁴ Ahâk, kivgakka iggiaᴋomijartuksauvut erᴋiertornermut, illipsele kiksadlarnermut ᴋeajuksauvose ogguartuksauvluselo kappiasumut.

¹⁵ Attiselo ᴋemagomârpasse anerijamnut ôminautiksangortillugo, Nâlekab Gûdib toᴋotsomârmasse; kivganele atseraromârpait attermik assianik.

¹⁶ Imaitsomârpoᴋ: ingminik pillorerᴋojijoᴋ nuname pillorerᴋojomârpoᴋ, Gûde Ameneojoᴋ taiᴋassiutivlugo, angermariktorlo nuname angermarigomârpoᴋ, Gûde Ameneojoᴋ taiᴋassiutivlugo, kappianartut sivorlît puigortaumangmatta saᴋᴋijârungnairlutiglo ijîmnut.

¹⁷ Ahâgle, ᴋilangmik nutâmik nunamiglo nutâmik pingortitsijomârpunga; sivorlît tagva erᴋartaujungnairomârput erᴋaumajaujungnairlutiglo.

¹⁸ Illâle! ᴋuviasugitse iggiaᴋomijarluselo sorairase pingortitakka pitjutigivlugit; Jerusaleme allianartungortitsomârapko inungillo ᴋuvianartungortillugit.

¹⁹ Jerusaleme alliagijomârpara inuᴋotikkalo ᴋuviagivlugit; tussartaujungnairomârporlo tagvane ᴋeajub nippinga ogguartublõnêt nippinga.

²⁰ Tagvane nutaraᴋarungnairomârpoᴋ uvluinalingmik, itomiglõnêt uvluksaminik inoᴋsitomik. Toᴋolertoᴋ jârelik 100 nik inôsuktôjomârpoᴋ, toᴋolertorlo jârelik 100 nik issumagijaujomârpoᴋ idluitullijotut pidlartaujotut.

²¹ Iglolioromârput innigivlugillo, vaineliksatalingnik perorsêvilioromârput paungangillo nerrivlugit.

²² Igloliortuksaungilat assimik inniksanginik, perorsêviliortuksaungilat assimik nerᴋiksarsiorviksanginik. Inuᴋotima uvlungit napârtut uvlungititut unuktigijomârput, aggamiglo sullijangit anerijama attoromârpait.

²³ Sullinatik senajuksaungilat, ernijuksaungilallo toᴋosaraituksanik tagvainaᴋ, Nâlekab kinguvarêt tâpkoa pitsartutingmagit ᴋitorngangillo.

²⁴ Imaitsomârporlo: niplialerᴋârtinagit kiojomârpunga, oᴋartillugit sulle tussaromârpunga.

²⁵ Amaroᴋ saugârarlo nerriᴋatigêgomârpuk, loeve tuktuvaktut ivingnik nerᴋiksaᴋaromârpoᴋ, ᴋuglugiarlo ivjomik nerrijomârpoᴋ. Erᴋsinaromângilat asseroinatiglo ᴋaᴋᴋamne ivsornaitome illũnâne, oᴋarpoᴋ Nâlegaᴋ.