Jesaiase 64 - Labrador Inuttitut Heritage Bible

Amma tuksiarnermik.

¹ Kanoktok ᴋilak alliktorungne aᴋᴋarlutillo, ᴋaᴋᴋat aulatillugit sângne,

² Sôrlo ikkomab ᴋessertutit ikkingmagit, sôrlolo ikkomab imeᴋ tertiktingmago; attit nallonarungnairtitaurᴋovlugo ômigijingnut, nallojullo sajuktitaurᴋovlogit kênavit sângane,

³ Kappianartunik piniaruvit nerriugingitaptingnik. Illa, aᴋᴋalaurittôᴋ, ᴋaᴋᴋat aulatillugit sângne!

⁴ Itsaᴋsoarnit tussartoᴋangimat, missigijoᴋaranele takojoᴋaranelo ijikut Gûdemik assingnik, piniutjijomik tattigijiminik.

⁵ Kuviasuklutik idluartullijut, apkutigijaksaurᴋojarne illingnik erᴋaijut pagrearpattit. Ahâk, ningaumajârpotit, uvagullo idluitullivogut taipkonane (apᴋutigijaksaurᴋojarne) akkunit; piulijauniarkitâ?

⁶ Illûnamatsiata ivsornaitutitut-ipogut, idluarnivullo tamât annorâtut-ipoᴋ salumaitotut; millukataᴋtitut ᴋunorlerpogut illũnata, idluitulliniptingnullo tiktauvogut sôrlo aᴋᴋonamut.

⁷ Attit taivlugo tuksiartoᴋalungilaᴋ pinasuartomiglõnêt tigujomavlutit, kênat ijerangne uvaptingnut, pitilluta idluinipta pitsartuningannut.

⁸ Mãnale, Nâlegaᴋ, igvit atâtagivaptigit; uvagut machauvogut, igvit machaliortigivaptigit; tamapta aggangnut sanajaumavogut.

⁹ Nâlegaᴋ, ningaumajâluarniarnaktôᴋ, idluitullinivut soraijuitomik erᴋaumaniarnagit! Takkuit, erᴋailaurit, tamapta inuᴋotigigaptigut.

¹⁰ Iglugasaksoaᴋotitit ivsornaitut asserorsimavut, Zione inuᴋarungnairtitaumavoᴋ, Jerusaleme igloᴋarungnairtitaumavoᴋ.

¹¹ Kattimavivut ivsornaitoᴋ pinarnartorlo, atâtapta nertordlervigijangat illingnik ikkomamut ikkitaumavoᴋ, perᴋutivullo ivlernartut illũnatik asserorsimavut.

¹² Taimailingatillugo ᴋikkaromavêt, Nâlegaᴋ, nippangeromavlutillo okkungadlartilluta?