Jesaiase 63 - Labrador Inuttitut Heritage Bible

Iptêjaivingmik tullersijomik. Tuksiarnermik.

¹ Kina una Edomemit aggertoᴋ, aupaluktanik annorâlik, Bosramit pijoᴋ? una pinarnartoᴋsoarnik annorâlik, arvertartoᴋ ajugaᴋangitôjotut? Uvangauvunga idluarnermik oᴋâlajunga piuliklerungnartotôvlungalo.

² Sôᴋ ullit aupalukkâ? annorâllo iptêjaivingmik tullersijub annorângatut?

³ Iptêjaivik tullerpara kissima, illaᴋarnanga inugasaᴋsoarnit. Uvanga tullerpakka ningaumajârnimne serᴋalivlugillo ᴋanningaumajârnimne. Taimaimat iptingata serᴋerarpait annorâkka, ulligalo illũnât salumaitipara.

⁴ Uvloᴋ akkiniarviksaᴋ kajusimautigigapko, jârelo piuliklerviksara nalliutingmat.

⁵ Kennerama, ikajortiksaᴋangilaᴋ; tattaminiarpungalo, serngnigijiksaᴋangimat; tagva tallera nangminerijara piulijigivara, ᴋanningaumajârnimalo ikajorpânga.

⁶ Taimaimat innugasaᴋsuit tullerpakka ningaumajârnimne, tallanartomik imertipakka ningaumajârnimne, iptingallo nunamut kovivara.

⁷ Erᴋaumajomadlarpakka Nâlekab saimarsainingit Nâlekablo nertornautingit, idluarmattut Nâlekab piniarnerijangit pivlugit uvaptingnut, pitsiarnersoangalo, Israêlikkunut saᴋᴋijârtitanga nâpkigosumut saimanermullo angijoᴋsoamut.

⁸ Oᴋarpoᴋ: Nallâgut inuᴋotigivakka, ᴋitorngauvut saegloniangitut. Taimaimat piulijigivât.

⁹ Kappiasûtigijangit tamaita kappiasûtigivaittauᴋ, kênangatalo engelingata piulivait. Nagligigamigit nâpkigivlugillo, ᴋelluvait. Kiviklugillo erᴋsukpait uvlut tamaita itsaᴋsoarnit.

¹⁰ Taipkoale tappatovut, anerninga ajungitoᴋ sinaungasarlugo. Tamanna pivlugo ablatsângorlune akkerartulerpoᴋ taipkonunga, nangmineᴋ sorsukpoᴋ taipkonunga.

¹¹ Tagva inuᴋotingita erᴋalerpait uvlut itsarnitat, Môsese inôngmat. Nanẽkâ tassiortoᴋ taipkoninga imarbingmit takpaunga saugaᴋotimelo mianerijingannik? Nanẽᴋâ tunitjijoᴋ anernerminik ajungitomik tâpsoma illuanut!

¹² (Nanẽᴋâ) Môsesib tallerpiagut ingergatitsijoᴋ tallerminik nertornadlartomik, imaᴋsoarnik aviksijoᴋ taipkoa sânganne, erᴋaumanaromavlune issoᴋangitomut?

¹³ (Nanẽkâ) ittinersoakut taipkoninga ingergatitsijoᴋ, sôrlo horsit natername pangalingmatta majangaidlutik?

¹⁴ Sôrlo nergjutit naternamut attersârmatta, taimak Nâlekab anerningata inilangaviᴋartipait. Taimak inuᴋotitit tassiorpattit, opinartoᴋsôjotut erᴋaumanaromavlutit.

¹⁵ Takosâlaurittôᴋ mãna ᴋilangmit, takonâlaurittôᴋ iglungnit ivsornaitoᴋsoarmit pinarnartomillo! Illungertornit pitsartunillo nanẽᴋâk? Illuvit illapsugosungninga nâpkigosungnillo saᴋᴋijâlungilak uvamnut.

¹⁶ Sullele igvit atâtagivaptigit; Abrahable ᴋaujimangilâtigut, Israêliblo illitaringilâtigut; igville, Nâlegaᴋ, atâtagivaptigit; piulijiptingnik — taimak atteᴋarpotit itsaᴋsoarnit.

¹⁷ Nâlegaᴋ, sôᴋ tammarᴋovittigût apkutigijaksaurᴋojarnit, õmativut mangaitillugit, nâlegungnairtillutalo illingnik? Uttilaungmittôᴋ kivgatit pivlugit, kinguvârêt kingormgutijatit pivlugit.

¹⁸ Inuᴋotivit ivsornaitut annikitotuinarmik (nuna) perᴋutigivât: akkerartortipta ivsornaitoviksoaᴋotit tullerpât.

¹⁹ Attaneᴋajuitutitut illingnik illingavogut, taijaujuitutitut atternik.