Jesaiase 62 - Labrador Inuttitut Heritage Bible

Nâlegaᴋ illungertudlarpoᴋ Zione piulijomavlugo.

¹ Zione pitjutigivlugo nippangeromangilanga, Jerusaleme pitjutigivlugo ᴋikkaromangilanga, idluarsijutiksanga nuilerᴋârtinago ᴋaumanartoᴋsôjotut, piulijauviksangalo naneroatut ikkijotut.

² Nallojullo idluarsinernik takojomârput attanersuillo illũnatik ânanaunermik; attermiglo nutâmik taijaujomârpotit, Nâlekab ᴋaningata taijomârtanganik.

³ Niaᴋôtiksaujomârpotillo takorannertoᴋ Nâlekab aggangine ᴋaurutauvlutillo attanersoamut nãmaktoᴋ Gûdivit aggangine.

⁴ Kemadlaraujomik taijaujungnairomârpotit kingorngane, nunallo inuᴋangitomik taijaujungnairomârpoᴋ kingorngane, taijaujomârpotille ᴋuviagijamnik, nunallo uilingmik (taijaujomârpoᴋ), Nâlekab ᴋuviagingmattit, nunallo uiᴋarmat.

⁵ Sôrlo angutib inôsuktub uigasuk nulliarilermago, taimak innigijivit nulliarileromârpâtit. Sôrlolo uiksab nulliaksane ᴋuviagingmago, taimak Gûdivit ᴋuviagijomârpâtit.

⁶ Jerusaleme, pigârtuksanik pititsivunga avaloᴋsoaᴋotivit ᴋângannut, uvloᴋ nâvlugo unnuarlo nâvlugo nippangertuksaungilat. — Illipse, Nâlekamik erᴋaititsijose, nippangerniarase!

⁷ Nippangerviginiarasiuk (Nâlegaᴋ), Jerusaleme tungavilertaurᴋârtinago nertornartitaurᴋârtinagolo nuname tâpsomunga.

⁸ Nâlegaᴋ angermarikpoᴋ tallerpine taiᴋassiutivlugo, talline ajugaᴋangitoᴋ: Kingorngane ômigijitit nerrerᴋojungnairomârpakka ᴋaᴋᴋôjaksarnik, takorngartallo imerᴋojungnairomârpakka vainemik nutâmik siorniorutigijarnik.

⁹ Kattersoijulle tamakkoninga nerᴋiksarivaittauᴋ, Nâlegarlo nertoraksarivât; angeraudjijullo vainemik imiksarivât igluma ivsornaitoviksûb iglorusingine.

¹⁰ Annititse, annititse upkoaᴋsoatigut, inuit apᴋutiksanginik âᴋiksoileritse; maniksaileritse, maniksaileritse apᴋosinersoarmik, ujarait pêrniarsigik, inugasaᴋsoarnut saimasileritse kattilerutiksamik.

¹¹ Ahâk, Nâlegaᴋ tussaksautipoᴋ sillaᴋsûb issuanut: Zionib pannia oᴋautijartorsiuk: Ahâk, piulijiksat ᴋaivoᴋ! Ahâk, akkiliutiksaminik najorteᴋarpoᴋ, akkijutingalo sânganẽpoᴋ.

¹² Taijaujomârpullo inûᴋatigêksoarnik ivsornaitunik Nâlekab piulijanginik, igvillo taijaujomârpotit iglugasaksoarnik takojartortauvaktunik, ᴋemaktauniangitunik.