Jesaiase 60 - Labrador Inuttitut Heritage Bible

Jerusalemib ânanausijaujomârninganik.

¹ Makkilerit ᴋaumalerlutillo, ᴋaumartiksat tikkingmat, Nâlekablo ânanaunersoanga ᴋollikkut nuingmat.

² Ahâk, tâᴋsûb nunaᴋsoaᴋ ullikpâ, tâᴋsinerublo nunaᴋatigêksuit ullikpait, kissianele ᴋollikkut Nâlegaᴋ nuivoᴋ, ânanaunersoangalo saᴋᴋijârpoᴋ ᴋollikkut.

³ Nallojullo ᴋaumanerijarnut arvertaromârput attanivillo ᴋollikkut nuilertub akkisungninganut.

⁴ Ijîkik uitarlugik avatingnẽtunik takonârit; tâpkoa illũnatik kattimgavlutik tikkipâtit, ernitit ungasiktomit aggerput, panitillo erᴋsuktauvut.

⁵ Tagva takonârlutit erᴋiertoromârpotit, õmatillo tiglerlunelo angijororomârpoᴋ, pivianartoᴋsuit imarbiksûb kiglinganẽtut nũtitaukpatta illingnut, nallojoᴋsuillo perᴋutigijangita tikkipattit.

⁶ Kamêlit unuktovaksuit kamêlillo sukkalisût Midianemit Efamillo tatatsomârpâtit; Sebamit tikkitsomârput illũnatik goldemik kutsomiglo tippitsiariksaumik ᴋaitsivlutik, Nâlekablo nertornautâ oᴋautigijomârpât.

⁷ Kêdarib saugaᴋotingit illũnatik kattersortaujomârput illingnut, Nebâjublo angusalluᴋotingit attoraksaujomârput illingnut. Tunergutiksaujomârput ᴋuviagijaujut tunerguserviᴋotimnut, iglugalo takorannertoᴋ ânanausititsomârpara.

⁸ Kikkût ukkoa nuvujatitut sukkalidlartut taubititullo tingijutitut inniksamingnut?

⁹ Illa, ᴋikkertat utaᴋᴋivânga, umiaᴋsuillo Tarsusemẽtut sivorliovut, ᴋitorngatit tamaungartitsomavlugit ungasiktomit, silbereᴋotitik goldeᴋotitiglo naksarlugit Nâlekab Gûdivit attinga pitjutigivlugo, ivlernartitorlo Israêlikkune pitjutigivlugo, ânanausingmattit.

¹⁰ Takorngartat avaluᴋsoaᴋotitit sanajomârpait, attanersoangitalo kivgartoromârpâtit, ningaumajâdlarlunga sugiarapkit, saimarlungale nâpkigingmigapkit.

¹¹ Upkoaᴋsoaᴋotitillo angmatsainaromârput, uvlôtillugolõnêt unnuangotillugolõnêt pallangairtaujomâtsangilat, nallojut perᴋutingit âtaurᴋovlugit illingnut, attanersoangillo tamaungartitaurᴋovlugit,

¹² Nallojut attaniovillo kivgartoromangitut illingnut nungutaujomârmatta, inungillo asserortauvlutik.

¹³ Libanonib ânanausijutigijangita tikkitsomârpâtit: zipressit platânillo buksillo illũnatik, igluga ivsornaitoviksoaᴋ pinarnarsititaurᴋovlugo, ittigamalo innigijangat ânanausititsomârpara.

¹⁴ Okkuvlutik tikkitsomârivut illingnut aksorôtijivit erningit, mittautigijitillo illũnatik ittikkavit sângannut pâmakteromârput, taijomârpâtillo Nâlekab iglugasaksoanginik, Zionemik ivlernartitub Israêlikkune pinganik.

¹⁵ Kemaktaumagavit nachogijaularpillo, taimaktauᴋ pissuktoᴋarungnairmat illingne, tagva pinarnartitsomârpagit nâksaungitomut ᴋuvianartillutillo kinguvârêt kingordlinginut.

¹⁶ Nallojut immungannik milluksijomârpotit, attanivillo iviangingit millugomârpattit, tukkisileromârpotillo, uvanga Nâlegaujunga piulijigigamga, uvangalo ajugaᴋangitunga Jâkokkune ᴋellujigigamga.

¹⁷ Golde taungniutigijomârpara kannujamik, silbere taungnintigijomârpara kikiangmik, kannujaᴋ taungniutigijomârpara ᴋejungmik, kikiak taungniutigijomârpara ujaramik; angajoᴋâtillo ullapirsaumik illumertitsomavakka, pairijitillo idluarnermik illumertillugit.

¹⁸ Idluiluktomik tussaumajoᴋaromângilaᴋ nunangne, pijaksaungitomiglõnêt asserornartomiglõnêt nunavit erᴋâne. Avaluᴋsoaᴋotitit atseraromârpattit piulijaunartunik upkoaᴋsoaᴋotitillo nertornartunik.

¹⁹ Seᴋineᴋ ᴋaumautigijungnairomârpat uvlôtillugo, taᴋᴋerlo ᴋaumajungnairomârpoᴋ ᴋaumaksarlutit, Nâlegarle ᴋaumautigijomârpat issoᴋangitomut, Gûdillo nertornautigijomârpat.

²⁰ Seᴋineᴋotit nippileromâtsangilaᴋ, taᴋᴋeᴋotillo nunguleromânginivoᴋ, Nâlegaᴋ ᴋaumautigijomârangne issoᴋangitomut; tagva uvlut kappiasugvigijatit sorairomârput.

²¹ Inuᴋotitit illũnatik idluartôjomârput, nunaᴋsoarlo kingormgutijomârpât issoᴋangitomut, perorsiangongmatta nangmineᴋ illijakka, aggangmalo sanangmagit nertornautiksamnut.

²² Mikkinerôjomit tausendit pijomârmatta ajulernerpângojomillo nunaᴋatigêksuit pitsartuneliksuit. Uvanga Nâlegaujunga tamanna piniasâromârpara, nalliutijuksaukpat.