Jesaiase 6 - Labrador Inuttitut Heritage Bible

Jesaiasib Gûde takkovâ.

¹ Jareme taipsomane, attaneᴋ Usia toᴋongmat, Nâlegaᴋ takkovara iksivajoᴋ iksivautaᴋsoarme ᴋotsiktome poᴋtojomelo, annorângatalo siningata igloᴋsoaᴋ ullikpâ.

² Sêrafit ᴋollânẽput attunit pingasôjortunik esarolît; maggungnut kênatik mattuvait, maggungnut ittigatik mattuvait, maggungnut tingilerput.

³ Kaigarsuvigijigêkpullo oᴋarlutik: Ivlernarpoᴋ, ivlernarpoᴋ, ivlernarpoᴋ ᴋilangmiugasaksuit Nâlegangat; nunat illũnatik illumertauvut tâpsoma nertornarninganik.

⁴ Ablorallo tungavingit sajukpilukput ᴋaigarsuktut nippinginut, iglolo iserlungmik tatapoᴋ.

⁵ Tagva oᴋarpunga: Kappianarmêk uvanga nungutaksauvunga ᴋangasinâᴋartunga ivsornartoᴋsôjûngnik inuillo ᴋangasinâᴋartut ivsornartoᴋsôjunik akkornganne nunaᴋartunga, ijîngma takkongmakko attaneᴋ ᴋilangmiugasaksuit Nâlegangat.

⁶ Tagva Sêrafit illangat tingilerpoᴋ uvamnut, auma tigumiarlugo tigujane kingmautîkkut tunerguservingmit.

⁷ Kaneralo tâpsomunga aktorpâ oᴋarlunelo: Ahâk, ôma ᴋangasinâkik aktormagik, idluitullinitit illingnit pêrtauvut, ajornitillo issumagijaujungnairput.

⁸ Nâlekablo nippinga tussarpara imâk oᴋartoᴋ: Kina tillijaksarivigô: kina uvaptingnut tillijaujomavâ? Uvangale oᴋarpunga: Tagga uvanga, tillilaunga!

⁹ Oᴋarvigivângalo: Ailerit, nunaᴋatigêt tâpkoa oᴋautijartorlugit imâk: Tussadlaritse tukkisinaselo, takkudlaritse illitarsinaselo.

¹⁰ Inuit tâpkoa õmatingit mangaitikit siutingillo tussilartikit, ijingillo takpẽtikit, ijimingnut takkurᴋonnagit, siutimingnut tussarᴋonnagit, õmatimingnullo tukkiserᴋonnagit, sâgiarᴋonnagillo inûlijaurᴋonnagillo.

¹¹ Uvangale oᴋarpunga: Nâlegaᴋ, ᴋanoᴋ sivitutigijomik? Oᴋarvigivânga: Iglugasaksuit asserortauviksangat tikkidlugo, tagvanẽtoᴋarungnairpat, iglullo inuᴋarungnairtitaukpatta, nunalo asserortaulerpat inuerutjauvlune.

¹² Nâlekab inuit aulartitsomârmagit ungasiktomut, nunablo asserortauniksanga angijôjomârmat.

¹³ Inuille unurningita tallimaujortungit tagvanẽtsomârput sulle; taipkoa pititaujariaᴋaromârivut ikkomamut, kissianele — sôrlo terebintemut aigemullo kippaᴋarmat (kippijaukpanik) — taimak taipkoa kippangat kinguvâksauvoᴋ ivsornaitoᴋ.