Jesaiase 59 - Labrador Inuttitut Heritage Bible

Israêlikkut idluininginik piulijauninganniglo.

¹ Ahak, Nâlekab aggangit piuliklernermut nailuangilat, siutîgiglo simiksimangilak tussarnermut.

² Idluitullinipsele avipâse Gûdipsingnit, idluinipselo kênanga ijerpât illipsingnut, tussartailitillugo.

³ Tallise aungmut sallumaidlarmatta, aggaselo idluitullinermut, ᴋangasinâselo saeglonermik oᴋâlangmatta, oᴋaselo idluitunik oᴋauseᴋarmatta.

⁴ Idluarnermik attortoᴋangilaᴋ, nallâgôrtomik erᴋartuijoᴋangilaᴋ. Piungitunik tattiksaᴋarput, saeglonernik oᴋâlavut, pijaksaungitunik illumiutaᴋarput, oᴋumainartuniglo saᴋᴋertitsivut.

⁵ Kuglugiarâlub manningit ivavait, âsivaillo nulluanginik pergaivut. Manninginik nerrijoᴋ toᴋojuksauvoᴋ; tullertaukpattale; ᴋuglugiarâlungmik annijoᴋarpoᴋ.

⁶ Nulluangit annorâksaungilat, pergaijangillo ᴋipiksamut piotsangilat, piniarningit piniarniovut piungitut, aggangillo idluiluktunik sullijaksaᴋarput.

⁷ Ittigangit akpangerput idluitomut, sukkalidlarput, passijaksaungitub aunganik kovisijomavlutik, issumangillo issumauvut piungitut, apᴋutingine asserornartoᴋarpoᴋ kiksarnartoᴋalarmelo.

⁸ Apᴋut ullapirsartauvionartoᴋ illitaringilât, pissugvingine idluartoᴋangilaᴋ, apᴋosinitik mumikpait, tamakkoninga attortoᴋ ullapirsauteᴋatsangilaᴋ.

⁹ Tamanna pivlugo erᴋartuitsiartoᴋ ungasikpoᴋ uvaptingnit, idluarsaijomullo tikkitaujungnangilagut. Kaumajoᴋ nerriugigalloarpavut, sunaubvâle! târpoᴋ; ᴋau (nerriugigalloarpavut), sunaubvâle! tâᴋtome arvertarpogut.

¹⁰ Karmaᴋ tapsikârpavut tautungitutitut, ijeᴋangitutitut tapsikârpogut; uvlub ᴋetterarningane naukiutivogut sôrlo tâᴋtome, atsuilijut akkornganne toᴋungajutitut-ipogut.

¹¹ Illũnata aklaᴋtitut ᴋallingoarpogut, taubititullo anersaumivogut: idluarsartauviksaᴋ nerriugigalloaraptigo, saᴋᴋingilaᴋ, piulijauviksarlo (nerriugigalloaraptigo) ungasidlarpoᴋ uvaptingnit,

¹² Idluitullinivut unuluadlarmatta sângne, idluiniptalo passingmattigut. Idluitullinivut uvaptingnẽput, idluinivullo ikpigivavut.

¹³ Nâlegaᴋ tunnugaptigo missiarutigivlugolo, nâlegungnairlugolo Gûdivut, taisinerdlukluta aksorôtjijomanermik tappatojomanermiglo, oᴋautsit uivêriklernartut illumiutarivlugit annitillugillo õmatiptingnit.

¹⁴ Taimaimat erᴋartuijutiksat uttimuartitauvut, idluarnerlo ungasiktome ᴋikkarpoᴋ, nallâgôrneᴋ pâlangmat iglut akkornganne, idluarnerlo itterlune ajormat.

¹⁵ Nallâgôrneᴋ assiomavoᴋ, idluituniglo attoromairtoᴋ serngnigijeᴋangilaᴋ. Tamanna Nâlekab tautukpâ idluaringilâlo, erᴋartuitsiartoᴋarungnairmat.

¹⁶ Takovoᴋ, anguteᴋangimat; tattaminiarpoᴋ, piniutjijoᴋangimat. Kissianele talline ikajortigilerpâ, idluarnine ajakparpâ.

¹⁷ Idluarneᴋ attivâ sagvingmiutarivlugo, piuliklerutiksaᴋ illivâ niaᴋominut niaᴋôtigivlugo, akkiniarneᴋ attivâ annorâᴋtut, illungertornerlo ulligivâ ulliksoatut.

¹⁸ Piniarnerijangit malliklugit, illa tamakkoa malliklugit akkileromârpait akkerartortine ningaumajârnermik, ômigijine akkiniarnermik; ᴋikkertallo akkiniadlaromârpait,

¹⁹ Nâlekab attinga opigijaurᴋovlugo seᴋinerub nippivianit nertornarningalo nuivianit, kappianartut tikkilermatta kôksoatut, Nâlekab anerninganut aulatitaumajotut.

²⁰ Zionemulle piuliklerte tikkitsomârpoᴋ sâgiartunullo tappatonermit Jâkokkune, oᴋarpoᴋ Nâlegaᴋ.

²¹ Imâglo angervigivakka, oᴋarpoᴋ Nâlegaᴋ: Anernera illingnẽtoᴋ oᴋausikkalo ᴋanernut illijakka ᴋanernit ᴋitorngavillo erngutavillo ᴋaninginit nũtuksaungilat, oᴋarpoᴋ Nâlegaᴋ, mãnanit issoᴋangitomut aglât.