Jesaiase 58 - Labrador Inuttitut Heritage Bible

Nerritailinermik sabbatemiglo.

¹ Nipperᴋortojomik nipliagit illerasungnak, nipliadlarit tiptulautitut, inuᴋotikka ᴋaujitikit tappatoninginik Jâkokkullo idluitullininginik.

² Uvlut tamaita appersorpânga, apᴋutigijaksaurᴋojakka ᴋaujijomadlarpait, inuktitut idluartullitsainartutitut nâlatsiatsainartutitullo Gûdimik perᴋojanginik illiorlutik erᴋartuijartorᴋovânga idluartomik, tussuvullo Gûdemut najortaujomavlutik.

³ Sôᴋ nerritailiᴋattarᴋitâ, igvit takonânginaptigut? Sôᴋ tarnivut piojorijungnairtipitigîk, igvit tamanna kamaginginangne? — Ahâk, nerritailijarangapse, idluarᴋutiksarsiorpose, erᴋinaidlarluselo sullijaksaᴋarpose.

⁴ Ahâk, akkerartôtivluse ningautivluselo nerritailivakpose, tigluktigêkluselo idluiluktomik. Taimak nerritailivaktilluse nippise tamattomane tussartaujungnangilak ᴋotsiktome.

⁵ Tamannauvâ nerritailineᴋ anerijara, uvloᴋ inûb piojorijungnairtitsivia tarniminik, okkungajoᴋarpat iviksoatut, pititsijoᴋarpat pôksajanik argjaniglo attiminut? Tamanna taijomaviûk nerritailinermik uvlormiglo Nâlekab ᴋuviagijanganik?

⁶ Nerritailineᴋ anerijara imailingavoᴋ: ᴋellarutit attoraksaungitut ᴋellarutjãkit, nangmautat aklunâᴋtangit pẽkit, aksorôtijaumajut aularᴋokit kippalôjungnairtillugit, nangmautallo tamaita serᴋomikit!

⁷ Ammalo: Kâktoᴋ aitoruk nerᴋiksarnik, ajulertut inniksaᴋangitut iglomut itterᴋokit; annorâᴋangitomiglo takoleruvit, annorâᴋartileruk, uviniᴋaᴋatit allarniarnago.

⁸ (Taimailioruvit), ᴋaumartiksat allakkaromârpoᴋ ᴋaub aupalungningatut, ikkillo mammisaraitsomârpoᴋ, idluarnit sivunikkut ingergajomârpoᴋ, Nâlekablo nertornartoᴋsôninga kingunikkut malligomârpoᴋ.

⁹ Tagva niplialeruvit, Nâlekab kiojomârpâtit, tuksiadlaruvillo, oᴋautijomârpâtit: tamânẽpunga — aksorôtjijungnairuvit mittagungnairlutillo oᴋarnerdlugungnairlutillo.

¹⁰ Kâktorlo ikligijarnik tunidsivigigungne, tarnelo ajoᴋsadlartoᴋ nãmaksitilerungne, tagva ᴋaumartiksat nuileromârpoᴋ tâᴋsoarme, tâᴋtorlo illingne uvlub ᴋetterarningatut-itsomârpoᴋ.

¹¹ Nâlekablo tassiutsainaromârpâtit, tarnit nerritillugo nuname kângnartolingme saunitillo nakoᴋsitillugit, perorsêviktullo ᴋausertitaumajotut puilaviktullo imeᴋatsainartotut illingajomârpotit.

¹² Illavillo serᴋomakut itsarnitat âᴋiksoromârpait, tungavivinîllo, itsaᴋ inôjut sanajaviningit nutângortitsomârpattit; taijaujomârpotillo: ᴋoppanik âᴋiksoijeojomik, igluliorteojomik apᴋutivinerne.

¹³ Ittikkatit udsertorungne sabbateme, sullijaksatit piniarnagit uvloᴋotimne ivsornaitome; sabbate ᴋuvianarnerarungne, Nâlekablo (uvlunga) ivsornaitoᴋ ivlernarnerarungne opigivlugolo, apᴋutigijomajatit attornagit, sullijaksatit piniarnagit, oᴋautsit piungitut attornagit,

¹⁴ Tagva Nâlegaᴋ ᴋuviagijomârpat, nunablo ᴋaᴋᴋangitigut ᴋemukserᴋojomârpagit, nerrititsomârpagillo atâtavit Jâkob kingormgutijanganik; Nâlekab ᴋaningata tamanna oᴋautigingmago.