Jesaiase 57 - Labrador Inuttitut Heritage Bible

Gûdingoanik kivgartortut piunginingannik; Nâlekamik nâlaktut piulijauningannik.

¹ Idluartok perlerpoᴋ, õmammiutarᴋsijoᴋangilarlo; inuit idluitailijut pêrtaulerput, mallugosuktoᴋangilarlo, idluartut pêrtaungmatta kappiasugvingmit.

² Ullapirsartaunartomut itterput, innangavingmingne merngoerserviksaᴋarput nallâgôrtomik arvertartut.

³ Illipsele ᴋaileritse maunga, illipse angakkub ᴋitorngangit, ajortullijub anguniarpaktublo kinguvângit.

⁴ Kina mittagvigivisiûk? Kina pivlugo ᴋanersoapsingnik aitarᴋisê, oᴋase saᴋᴋertillugit? Kitorngaungilasê tappatonersoamut, saeglonermullo kinguvângongilasê?

⁵ Ikligosuktose (Gûdingoarnut) napârtoᴋsuit, illa napârtut tungujoᴋtat illũnatik attânne, sorrutsiniglo toᴋotsijose kôrungne, ᴋairtut kôrungnângine.

⁶ Kôt ujaraᴋtangit anerivattit pinnârivlugillo; taipkonunga tunergutiksanik imiksanik kovisivotit, tunergutiksanik nerᴋiksanik âtsivotit taipkonunga. Tamanna manigorutigijaksarivigô?

⁷ Innangaviksarnik âᴋiksoivotit ᴋaᴋᴋab kingiktub, poᴋtojub ᴋângane, takpaungalo majorarpakpotit, tunergutiksarnik âtsivlutit.

⁸ Erᴋaumajaksarijatillo upkuab katallo ungatânnut illivattit; uvanga tunullunga usserterpotit, majoarpotit, sinnigvit angijorortipat, taipkonungalo angerpotit, ᴋuviasukpotit sinniᴋatigivlugit — tamattomunga inniksarsivotit.

⁹ Orᴋsuᴋarlutit aivotit attanersoamut (Gûdingoamut) mingoarutiniglo tippitsiariktunik sunatuinarnik naksarlutit; kivgatillo tillivattit ungasiktomut attersârlutillo anernerit inningannut aglât.

¹⁰ Apᴋutigijat takkijôdlarmat, merngortoralloarpotit, sullele oᴋalungilatit: sullitsangitunga! nakoᴋsinartomik nagvâravit, nukkingingilatit.

¹¹ Kina pivlugo kuksasukêt sivoravlutillo, saeglûtiksanik attudlaravit, erᴋaumatsanginamgalo õmammiutarinangalo? Imaingilâᴋ: nippangerama, akkunit aglât, sivoragingilarma?

¹² Uvangale idluarnernik ᴋaujititsomârpagit, sullijatillo idluarᴋutigijomângilattit.

¹³ Niplialeruvit, kattersulauᴋtavit (Gûdingoat) piulilitit! Kissianele anoremut illũnatik tiktaujomârput, anersarnẽnarmut pêrtaujomârput. Uvamnigle tatteᴋartub nuna kingormgutijaksarijomârpâ, ᴋaᴋᴋaralo ivsornaitoᴋ perᴋutigijomârpâ.

¹⁴ Oᴋartoᴋaromârporlo: Apᴋosinelioritse, apᴋosinelioritse, apᴋut âᴋiksorsiuk, agviarutiksat tamaita inuᴋotima apᴋutigijaksanginit pêjarsigik.

¹⁵ Kotsiktomẽtoᴋ Nâlegaviksôjorlo, soᴋosijuitomik inneᴋartoᴋ, atteᴋartorlo ivsornaitoᴋsôjomik imâk oᴋarmat: Kotsiktome ivsornaitovingmelo inneᴋarpunga, taimaktauᴋ õmateᴋartune serᴋomisimajunik nallopᴋotijuniglo, nallopᴋotijut anerningat nakoᴋsititsomavlugo serᴋomisimajullo ômatingat nakoᴋsititsomavlugo.

¹⁶ Sugiaromangilanga nâksaungitomut, ningaumajâromanangalo soraijuitomik, anernerit perlerajarmatta kênama sângane tarnillo pingortitakka.

¹⁷ Pijomatudlarnermut idluitullingmatta, ningaumajârvigivakka sugiarlugillo (ijerlunga ningarlungalo), tagva kingumut arvertarput apᴋutigijomajamikkut.

¹⁸ Apᴋutingillo takovakka, inûlijomârpakkalo tassiorlugillo manigormivlugillo nãmaktomik taipkoa kiksautigijingit.

¹⁹ Kangasinângita nertordlerutiksanginik pingortitsivoᴋ Nâlegaᴋ, oᴋarame: Ullapirsauteᴋarlit, ullapirsauteᴋarlit ᴋanningitullo ᴋannitullo, inûlijomârpakka.

²⁰ Idluitullijulle imarbiksoatut-iput iktullijâdlartotut; ikkublaumijungnangilaᴋ manna, malliksoangillo maujâlungmik mamaitoâlungmiglo tipjautitsivut.

²¹ Idluitullijunut ullapirsauteᴋangilaᴋ; oᴋarpoᴋ Gûdiga.