Jesaiase 55 - Labrador Inuttitut Heritage Bible

Sâgiarᴋojaunermik Nâlekamut.

¹ Atte, illũnase imeruktose, imermut ᴋaititse, kênaujaᴋangitoselo, ᴋaititse pissiniarluse nerrivluselo! Attê, ᴋaititse, vainemiglo immungmiglo pissiniaritse kênaujaᴋarase akkiliutiksaᴋaraselo.

² Sôᴋ kênaujanik kittitsivisê nerᴋiksaungitomut, kivgartornipselo akkingit tunivlugit aᴋᴋeartorutiksaungitomut? Tussalersingatôk, ajungitomik nerrijomârapse tagva, tarniselo nakoᴋsijaujomârmatta orᴋsumut.

³ Siutise mannivlugit ᴋaititse uvamnut, tussaleritse, tarnise tagva ômajomârput, angervigijomârpapselo issoᴋangitomut illingajuksanik, saimanartunik pilliutigijamnik Dâvidemut soraijuitomik.

⁴ Ahâk, taimna (Dâvide) kigligiudsijungortipara (uvamnik) inungnut, angajoᴋângortillugolo attaningortipara nunaᴋatigêksoarnut.

⁵ Ahâk, inuit illitaringitatit ᴋairᴋojomârpattit, inuillo illitarᴋsingitut illingnik akpangervigijomârpâtit Nâlegaᴋ Gûdit pivlugo, ivlernartitoᴋ Israêlikkune pivlugo, tâpsoma nertornartingmattit.

⁶ Nâlekamik ᴋennileritse, nagvârtaujungnarmat, nipliavigisiuk ᴋannidlarmat!

⁷ Idluitub apᴋutigijane ᴋemakliuk, idluitullijublo issumagijane allarligit sâgiarlunelo Nâlekamut, tâpsoma nâpkigijomârpâ tagva, Gûdiptingnullo sâgiarle, tâpsoma angijomik issumagijungnairvigijomârpa tagva.

⁸ Issumakka illipse issumaginginapsigik, apᴋutiselo uvanga apᴋutigitsanginapkit, oᴋarpoᴋ Nâlegaᴋ.

⁹ Imâgle: sôrlo ᴋilak nunamit ᴋotsingmat, taimaktauᴋ apᴋutikka ᴋotsikput apᴋutipsingnit issumakkalo issumapsingnit.

¹⁰ Sõrlolo sillaluk ᴋannîllo ᴋilangmit kattangmatta, utteratik takpaunga — nunale ᴋausertipât perorsiaᴋartillugolo tungujoᴋtanik, karngasoijartortorlo karngasûtiksaᴋartillugo, nerrijomajorlo nerᴋiksaᴋartillugo —

¹¹ Taimailingagivoᴋ oᴋausera ᴋanimnit annijoᴋ. Sullinane uttertuksaungilaᴋ uvamnut, idluarijakkale piniaraksarivait, nãmaksititaksarivlugolo, suna pivlugo tilligapko.

¹² Kuviasukluse aularomârapse, ullapirsauteᴋarluselo ingergatitaujomârapse. Kaᴋᴋat ᴋaᴋᴋârulaillo sivunipsingne iggiaᴋomijaromârput, napârtullo naternamẽtut illũnatik pattaktoromârput.

¹³ Keblariktut peroromârput ukpigait kakkilautiggit innangerlugit, mirtillo perornerdluktut kakkilautiggit innangerlugit; Nâlekamullo tamanna nertornautiksaujomârpoᴋ nallunaikutaksaularmelo asserojuitoᴋ nâksaungitomut.