Jesaiase 54 - Labrador Inuttitut Heritage Bible

Zionib ânanausijaujomârninganik.

¹ Kitorngisuitotit, ernisuitotit opigosugit, singaingitotit erᴋiertorlutit iggiaᴋomijarit! Aipaᴋarungnairtoᴋ ᴋitorngaᴋarnersaungmat aipaᴋartomit, oᴋarpoᴋ Nâlegaᴋ.

² Tuppit nerrotonersautileruk, tuppivit itsangit issivillugit ᴋassutailitillugillo, aklunâᴋtangit tassitikit, perungillo aulajungnangertikit!

³ Tallerpivit tungânut saumivillo tungânut sivumuaromâravit; kinguvâksavillo nallojut kingormgutijaksarijomârmagit, iglugasaksuillo asserorsimajut inuᴋartillugit.

⁴ Sivoraniarnak, kangusuktitauniatsanginavit; illerasungniarnak, kangusungniatsanginavit; uigasûnivit kangusûtigijanga puigoromârpat uigarnionivillo kangunarninga erᴋaumajungnairomârpat.

⁵ Pingortitit aiparigangne, ᴋilangmiugasaksuit Nâlegangat tagva attinga; ivlernartitorlo Israêlikkune piulijigigangne, sillaᴋsoarmiut illũnamatsiatik Gûdigijangannik atserartaujoᴋ.

⁶ Nâlekab ᴋairᴋungmattit arnatut ᴋemaktaujotut, kiksartitaujotut, inôsuktub nulliangatut ᴋenugijaujotut, oᴋarpoᴋ Gûdit.

⁷ Anikitomik ᴋemadlaralloarpagit, nâpkigosungnermulle angijomut kattersoromârivagit.

⁸ Kanningaumajârnermut tikkitauvlunga sivikitomik kenara ijerpara illingnut, saimarsainermulle soraijuitomut nâpkigijomârivagit, oᴋarpoᴋ Nâlegaᴋ piulijit.

⁹ Tamanna illingavoᴋ uvamnut ullitornivaksoatut Noa inôtillugo. Sôrlo angermarigama, ullitornivaksoaᴋ, (pijoᴋ) Noa inôtillugo, pijungnairᴋovlugo kingorngane nunaᴋsoarmut, taimak angermarikpungatauᴋ ningaumajârvigijungnairomavlutit suangajungnairomavlutillo.

¹⁰ Kaᴋᴋat nuktilerpattalõnêt, ᴋaᴋᴋârulaillo aulajârpattalõnêt, nâpkigosungnera nukteromângilaᴋ illingnit, angerneralo ullapirsartaumanimnik aulajâromânginivoᴋ, oᴋarpoᴋ Nâlegaᴋ nâpkigijit.

¹¹ Ajulidlartotit, tiktautitaujotit aᴋᴋonamut, manigoijeᴋangitotit, ahâk, ujarᴋatit illijomârpakka ânanausivlugit, tungaveᴋartillutillo ujarᴋanik tungujoᴋtanik,

¹² Avalutillo nuvutsiariktillugit allikkunik, upkoaᴋsoaᴋartillutillo ujarᴋanik aupalluktanik, nunavillo kiglinginut tamainut ujarᴋat pivianartoᴋsuit illijomârpakka.

¹³ Kitorngatillo illũnatik Nâlekamut ajoᴋertortaujomârput, ᴋitorngatillo ullapirsaumik angijomik tunidjiviojomârput.

¹⁴ Idluarsainipkut tungavilertaujomârpotit. Issumajârungnairit sâlagijaugiamik, sivorajariaᴋaromânginavit, ᴋoaᴋsârnartomiglõnêt, tamattomunga tikkitaujomâtsanginavit.

¹⁵ Ahâk, pikkabladlartoᴋaralloarpat illingnut, uvamnit pingilat; pikkabladlartut illingnut illũnatik pâlautigijomârpâtit.

¹⁶ Ahâk, uvanga pingortitsivunga sabviortemik, sabviorutiksanik supôrutemut ikkititsijomik, sakkoliortemik attornartunik; amma nvangatauᴋ pingortitsivunga asseroijomik, serᴋomitserᴋovlugo sakkunik.

¹⁷ Sakkut illũnatik, sorsugvigijomavlutit senajaujut, sullijomângilat, oᴋallo ilũnaita erᴋartoromavlutit pilertut igvit erᴋartoromârpattit. Tamadja Nâlekab kivgangita kingormgutijaksangat idluarᴋutiksangallo uvamnit pijoᴋ, oᴋarpoᴋ Nâlegaᴋ.