Jesaiase 53 - Labrador Inuttitut Heritage Bible

Gûdib kivgangata ãnianinganik nertornartitauninganiglo.

¹ Kia oᴋaudjaunivut okperivagît? kimullo Nâlekab tallinga nallonairsimavâ?

² Nuilerpoᴋ perorsiaksatut (Nâlekab) sângane, nutaijoᴋtotullo ivjomit pallermit. Takominartomik tautuᴋangimat, kamagingilavut; takorannertoᴋangimat, ᴋuviagingilavut.

³ Nachogijaujôvoᴋ, inungnut ᴋemaktaumajoᴋ, angut ãnialik, ᴋanimainartoᴋ, nachonaluartoᴋ, illũnatik kênatik tâpsomangat allarmagit; tamanna pivlugo suksaunasugingilavut.

⁴ Sunaubvâ! tâpsoma ᴋanimanivut nangmarpait, ãnilakteradlarnivullo ingminut pitipait. Uvagulle sugiartaunasugivavut, Gûdemut annaujaunasugivlugo ãniatitaunasugivlugolo.

⁵ Kissianele ikkilertauvoᴋ idluitullinivut pitjutigivlugit, ajornivullo pitjutigivlugit nerᴋerᴋsudlartitauvoᴋ. Tâmna pidlartauvoᴋ idluarᴋutiksaptingnut, ikkinginullo inûlijauvogut.

⁶ Illũnatale saukkatitut tammarpogut, ingmikôrluta apᴋutigijomajavut kamagituinarlugit. Nâlekable idluinivut illũnamatsiatik pitipait tâpsomunga.

⁷ Aniatitaudlaralloarlune ᴋenuersârpoᴋ, ᴋaninelo aitalungilâ sôrlo saugâraᴋ pititaujoᴋ toᴋotauvingminut sôrlolõnêt saugaᴋ niplingitoᴋ sallijiminut, ᴋaninelo aitarnago.

⁸ Anianikut sugiartaunikullo pêrtauvoᴋ; inûᴋatingitalo akkornganne — kina issumaksarsiorᴋâ, inôjut nunangannit avitaungmat inûᴋatima idluitulliningit pivlugit, pidlartauniksangit pivlugit?

⁹ Illuveᴋartipâllo idluitullijut akkornganne, akluitut akkornganne (illuveᴋartipât) toᴋungatillugo, idluitullilungigalloarmat uivêriklernermiglo ᴋanermiutaᴋalungigalloarmat.

¹⁰ Kissianele Nâlekab idluarivâ, nerᴋerᴋsudlartitsomavlugo ãniatitsomavlugolo. Tarninga (nangminerminik) tunergutiksatut sattûtiksatut tunikpat, kinguvâksaminik takojomârpoᴋ, uvluksane unuksitillugit, Nâlekablo idluarijanga pivalliatitaujomârpok aggangitigut.

¹¹ Tarnime siorniorninga pivlugo nãmaksititaunerminik takojomârpoᴋ, illitarᴋsinerminullo kivgama tâpsoma idluartotôjub unuktoᴋsuit idluarsititsomârpait, ajorningit pêjaramigit.

¹² Tamanna pivlugo angijoᴋsoarnik illangiutititsomârpara, pitsartuneliksuillo aitûtigijomârpait aᴋsârnigaujutitut, imâk pivlugo: inôtsine tuningmago toᴋomut, idluitullijunullo adsiotitaungmat, unuktut ajorningit nangmaralloarlugit, idluitullijullo simerdlugit.