Jesaiase 52 - Labrador Inuttitut Heritage Bible

Amma okpertut kaiblartauningannik.

¹ Tupalerit, tupalerit, pitsartunit attileruk, Zione! Annorâlerit uvloᴋsiorutinik, Jerusaleme, iglugasaksoangojotit ivsornaitotit! Mattoma kingorngagut kippisimangitomik ivsornartomiglõnêt ittertoᴋaromângimat illingnut.

² Sanningnik kattaraigit, makkilerit ingidlutillo, Jerusaleme; ᴋellarutjâlerit ᴋongaserpit ᴋellarutinginit, Zionib panninga parngnanairsortaujotit.

³ Nâlegaᴋ oᴋarmat imâk: Akkeᴋangitomik niorvgutigijaugapse, kênaujat attornagittauᴋ piulijaujomârpose.

⁴ Nâlegaᴋ Gûde oᴋarmat imâk: Inuᴋotikka sivorngane ingergavut Egiptenemut, taikunga tujormiangojartorlutik, Assiriamiullo aksorôtivait pitjuteᴋaratik.

⁵ Mãnalo suksauvêk tamâne? taimak oᴋarpoᴋ Nâlegaᴋ. Inuᴋotikka aularutjauvut akkeᴋartinagit, aulatsijingillo ᴋaggudlarput, taimak oᴋarpoᴋ Nâlegaᴋ, atteralo mittautautuinarpoᴋ uvlut tamaita.

⁶ Tamanna pivlugo inuᴋotima attera illitarijaksarivât; tamanna pivlugo taipsomane (illitarᴋsijomârput), uvangaugama oᴋartunga: tamânẽpunga.

⁷ Kuvianartoᴋsôvut illa ᴋaᴋᴋane oᴋalloriktut ittigangit, ullapirsaumik oᴋâlajut, ajungitomiglo oᴋautjijut, piulijaunermiglo oᴋâlajut, Zionemullo oᴋartut: Gûdit attaniolerivoᴋ!

⁸ Omât, udsertortitit nipliadlalerput illũnatik iggiaᴋomijarlutik, Nâlegaᴋ kênarsilerêramitsuk uttertoᴋ Zionemut.

⁹ Iggiaᴋomijaritse nertordleᴋatigêkluselo, Jerusalemib serᴋomakungit illipse, Nâlekab inuᴋotine manigormagit, Jerusalemelo piulingmago.

¹⁰ Nâlekab talline ivlernartoᴋ saᴋᴋertipâ, nallojut illũnamatsiatik tautuktillugit; sillaᴋsûblo issungit illũnatik Gûdipta piuliklerninganik takovut.

¹¹ Pêritse, pêritse, aularitse tagvangat! Ivsornartomik aktuiniarase! Akkorngannit aularitse, epᴋêjaritse, Nâlekab perᴋutinginik erᴋsuktose!

¹² Tauviluarluse aulariaᴋanginapse, ᴋemâjutitullo ingergajariaᴋanginapse, Nâlegaᴋ sivunipsigut ingergajomârmat, Israêliblo Gûdinga kingunipsigut malligomârmat.

¹³ Ahâk, kivgara sullitsiaromârpoᴋ aglivalliavlunelo angijororpalliavlunelo nertornarsivlunelo.

¹⁴ Unuktut (mãna) maᴋojugigalloarmatsuk, — tautua asserrorsimangmat, inuktut itsungnairtillugo, kênangalo itsungnairtillugo inûb ᴋitorngangita kênangititut —

¹⁵ Nallojut unuktut (sukutsiane) tattaminiartitsomârpait nangminerminik, attanersuillo oᴋausiksaerutivlugit, unipkautigijaumangitunik takojomârmatta, tussangitamingniglo missigijomârmatta.