Jesaiase 51 - Labrador Inuttitut Heritage Bible

Okpertut kaiblartauningannik.

¹ Tussalersinga illipse idluarnermik pinasuartose, Nâlekamik ᴋennertose! Kairtoᴋ takonârsiuk ulloᴋsitauvigijase, ᴋongnâᴋ ittijoᴋ pingortitauvigijase!

² Abraha takonârsiuk atâtagijase, Sâralo illipsingnik ernijoᴋ! Attausiotillugo ᴋairᴋovara saimauserlugolo ᴋitorngaᴋartillugolo unuktunik.

³ Nâlekab Zione manigormago, nunangit asserorsimajut tamaita âᴋiklugit, perortoᴋangitoᴋ Edenetut illingatillugo naternarlo Gûdib perorsêviatut; tagvane serrijoᴋaromârpoᴋ ᴋuviasuktuniglo, ᴋujalitiksaniglo nertordlerutiksaniglo imgertunik.

⁴ Inuᴋotigijakka, kamagitsialersinga, inuᴋotikka, tussaleritse uvamnik: Perᴋojamik annijoᴋaromârpoᴋ uvamnit, erᴋartuijutaurᴋojakka tungaviᴋartitsomârpakka, ᴋaumaksaijungortillugit nunaᴋatigêksoarnut.

⁵ Idluarsaiviksara ᴋannidlarpoᴋ, piuliklerviksaralo saᴋᴋijâlerpoᴋ, tallîngmalo nunaᴋatigêksuit erᴋartoromârpait. Kikkertarmiut nerriugivânga talleralo utaᴋᴋivât.

⁶ Kilak ârlorvigisiuk, nunalo ᴋilaub attânẽtoᴋ ullernairsiuk! Kilak iserluktut nungujomârpoᴋ, nunalo annorâtut sujugomârpoᴋ, inuillo nunamẽtut toᴋojomârivut. Piuliklerviksarale sorairomângilaᴋ issoᴋangitomut, idluarsaiviksaralo asserortaujomângilaᴋ.

⁷ Tussalersinga illipse idluarnermik illitarᴋsijose, nunaᴋatigêktose perᴋojamnik õmamiutaᴋartose. Sivoraniarase, inuit suangadlarpasse, ᴋoaᴋsârniaraselo oᴋauserludlarningit pitjutigivlugit.

⁸ Kaurulit nerrijomârmagit annorâtut, ᴋoppergut nerrijomârmagit attigeksajatut; idluarsaiviksarale sorairomângilaᴋ issoᴋangitomut, piuliklerviksaralo (sorairomângilaᴋ) kinguvârêt kingordlinginut.

⁹ Tupalerit, tupalerit, pitsartunermik attilaurit, Nâlekab tallinga igvit! Tupalerit sivornganetut, sôrlo itsaᴋsoaᴋ inôlauᴋtut akkornganne! Igviungilatît pingijaitomik sâlaᴋartoᴋ, ômajoâlungmik toᴋotsijoᴋ?

¹⁰ Igviungilatît imarbingmik imaerutjijoᴋ, imarmik iktullijâdlartomik, imarbiublo erᴋanik apᴋosineliortoᴋ, pissugviksautillugo uttertitaumajunut?

¹¹ Nâlekablo uttertitangit uttileromârput, Zionemulle tikkitsomârput iggiaᴋomijarlutik, ᴋuviasungnerub nâksaungitub ᴋollangiaromârpait, ᴋuviasungnerub serrinerublo tikkitsomârpait, kiksarnerlo anersauminerlo ᴋemâjomârpuk.

¹² Uvanga, uvanga manigorpapse. Suvêt, inungnik toᴋojomârtunik erᴋsigavit? inuit ᴋitornganginik iviktitut nungujomârtunik?

¹³ Nâlegarlo puigorpat pingortitit, ᴋilangmiglo issivitsijoᴋ, nunamiglo tungaviliorijoᴋ. Kaut tamât erᴋsitsainarpotit aksorôtjijub ningaumajârninganik, kajusimangmat asseroromavlutit. Aksorôtjijub ningaumajârninga naûk?

¹⁴ Sannikterijoᴋ ᴋellarutjârtausarainiarpoᴋ, toᴋolerniangilaᴋ ittersâlungme, nerᴋiksaminiglo ajoᴋsarniangilaᴋ.

¹⁵ Uvangale Nâlegauvunga Gûdit, aulatsijunga imarbingmik, malliksoangit iktullijâdlartillugit. Kilangmiugasaksuit Nâlegangannik atteᴋarpunga.

¹⁶ Oᴋausikkalo illivakka ᴋanernut ullikpagillo aggama tachalininganut, ᴋilak illijomavlugo, nuna tungaviktâromavlugo, Zionemiunullo oᴋaromavlunga: Inuᴋotigivapse.

¹⁷ Tupalerit, tupalerit makkilutillo, Jerusaleme, Nâlekab agganginit imerangne ermguseᴋ ningaumajârningata pinga, ermgusiarsuk kaibjaijutiksatalik nungupat, (kuttingit) alluktorlugit.

¹⁸ Kitorngame erniarijame illũnamatsiatik akkornganne tassiortiksaᴋangilaᴋ. Kitorngame inugoijame illũnamatsiatik akkornganne tigumiartuksaᴋangilaᴋ.

¹⁹ Makkoa tikkingmattit, kia naiperᴋotigijungnarᴋâtît: asserortaunerublo nungutaunerublo, kângnerublo saviksûblo? Kanoᴋ manigoijungnarᴋêk illingnik?

²⁰ Kitorngatit kaibjaivlutik iglut akkornganne, terreᴋungine illũnaine nallavut tuktungajotut nulluarsimajotut, Nâlekab ningausinganut Gûdivillo suanganinganut tikkitaummarigamik.

²¹ Tamanna pivlugo tamattominga tussalerit, ajulidlartotit, kaibjaijotit vaine pitjutigingigalloarlugo.

²² Imâk oᴋarpoᴋ Nâlekat, Nâlegaᴋ Gûdit, inuᴋotime serngnigijingat: Ahâk, ermguseᴋ kaibjaijutiksatalik tiguvara aggangnit, ermgusiarsuk ningaumajârnima pinga, imertuksaungilatit tamattomangat kingorngane.

²³ Tunijomavarale kappiasuktitivit agganginut, oᴋartut tarningnut imâk: Pâmakterit, pissugvigijaksarigaptigit, tunnuit nunatut illingatiuk, naternatut pissugviksatut.