Jesaiase 50 - Labrador Inuttitut Heritage Bible

Amma Gûdib kivganganik.

¹ Imak oᴋarpoᴋ Nâlegaᴋ: Aglait avititsijutiksat, anânapsingnik aularᴋojijut uvamnit naûk? Ubvalo kina akkiliksaᴋarvigigapko, akkiliutigivapsê tâpsomunga? Ahâk, idluitullinise pivlugit niorvgutigijauvose, anânaselo aularutjauvoᴋ tappatonise pivlugit.

² Sôᴋ inuᴋangilâᴋ, tikkinama? sôᴋ kiojoᴋangilâᴋ, nippeᴋarama? Aggakka piuliklernermut nailuarᴋât? ubvalo pitsartuneᴋarungnairᴋêk ᴋellujinermut? Ahâk, imarbik suangalerapko, imaerutilerpoᴋ, kôksuillo ipteriliktipakka, mingeriangit imeᴋangimut tippeluktillugit imerungnermullo toᴋolugit.

³ Kilak tâᴋtomik annorâᴋartipara ulleᴋartillugolo pôksajanik.

⁴ Nâlekab Gûdib tunitjivigivânga oᴋamik illisimajomik, ᴋaujerᴋovlunga merngortortut maksoatillugit oᴋautsitigut. Kaut tamât angmartipânga, siutiga angmartillugo, illiniartotut tussarᴋovlunga.

⁵ Nâlekab Gûdib siutiga angmartipâ, uvangalo tappatolungilanga utternangalo.

⁶ Tunnuga manivara annaulerniktunut, ulluâkkalo umingnik nussuksijunut, kênara ijertorlungilara mittautautillunga ᴋetserartautillungalo.

⁷ Nâlekable Gûdib ikajorpânga, taimaimat kangusuktitaungilanga, taimaimat kênara ujaraᴋtut manivara, ᴋaujimagama kangusuktitaunianginimnik.

⁸ Idluartôneraijoᴋ uvamnik ᴋannipoᴋ. Kia akkerartorvigijomavângâ? Kattimalerta! Kia erᴋartoromavângâ? ᴋaile uvamnut!

⁹ Ahâk, Nâlekab Gûdib ikajorpânga. Kia pidlaraksautipângâ? Ahâk, illũnatik sujuleromârput annorâtut, ᴋaurulillo nerrijomârpait.

¹⁰ Kia akkunapsingne Nâlegaᴋ sivoragivaûk, kivgangata nippinga nâleklugo? Tâᴋsoakut arvertartub ᴋaumaksartaungitublo Nâlekab attinga nerriugiliuk, Gûdinelo tattigiliuk!

¹¹ Okoᴋsê tamapse, ikkomamik ikkitsijose, ᴋargjolijartose ikkomalingnik, ingergaleritse ikkomakut ikkitapsigut ᴋargjuᴋtigullo ikkomaliktigut ikkitapsigut. Agganginit tamanna pivoᴋ illipsingnut, ãnernartome innangajuksauvose.