Jesaiase 5 - Labrador Inuttitut Heritage Bible

Perorsêvingmik vaineliksatalingmik.

¹ Imgerut mãna attorlago illannâra pivlugo, illannâma imgerutinga perorsêvinga vaineliksatalik pivlugo! Illannâra perorsêviᴋarpoᴋ vaineliksatalingmik ᴋaᴋᴋame ivjoriktome.

² Poagijarpâlo ujaraijarlugolo illijivigivlugolo vaineᴋutiarsungnik ânanaudlartunik. Nuvugusersoaliorporlo illuane iptêjaivingmiglo sanavoᴋ tagvane nerriukporlo paungaᴋarniksanganik; kissianele paungalukaᴋarpoᴋ.

³ Erᴋartuileritse mãna, Jerusalemẽtose Jûdamiôjoselo, pivlunga perorsêvigalo vaineliksatalik pivlugo.

⁴ Sumik sulle pijarialingmik perorsêviga vaineliksatalik pivigingilarâ? Sôᴋ paungalukaᴋarᴋâ, ajungitunik paungaᴋarniksanga nerriugigapko?

⁵ Mãnalo ᴋaujititsomavapse, ᴋanoᴋ perorsêviga vaineliksatalik piniarvigijomârapko. Sappûlutangit pêjaromavakka asserortaurᴋovlugo, avalungillo serᴋomitsomavakka tullerajartaurᴋovlugo.

⁶ Nungutitsomavaralo pairijautailitillugo poagijartautailitillugolo; perortoᴋaromârpoᴋ ukpiganik perornerdluktuniglo kakkilautilingnik, nuvujallo inerteromavakka sillalugviorᴋonnago.

⁷ Imaiporle: Kilangmiugasaksuit Nâlegangata perorsêvia vaineliksatalik tagva Israêlikkut, Jûdablo angutingit tagva illijivigijanga (perortuksanik) ᴋuviagijanga. Idluartullinermik nerriugame, aksorûtjineᴋ takkovâ; idluarnermik nerriugame, ogguarneᴋ tussarpâ.

⁸ Kappianarmêk pititsivalliajut iglunik igloᴋotimik sanniannut perorsêvingniglo perorsêviᴋotimik sanniannut, inniksaᴋarungnairtillugo; kissipselo nuna innigijomavasse.

⁹ Siutimnut ᴋilangmiugasaksuit Nâlegangat oᴋarpoᴋ: Ahammarik, iglut unuᴋtoᴋsuit ᴋemaktaujomârput, angijut ânanaujullo inuᴋarungnairomârput.

¹⁰ Perorsêvik vaineliksatalik, tuktuvâk makpiterarpaktangaktut angitigijoᴋ uvlune tallimaujortune, vaineᴋaromârmat ᴋattamik attautsemik, karngasûtiksallo ᴋattaujaᴋsoatut tallimaujortut unuktigijut paungaᴋaromârmatta ᴋattamik attautsemik.

¹¹ Kappianarmêk taipkoa uvlârorpaktut imiksaᴋ tallanartoᴋ pinasuarlugo, unnuamullo iksivajut vainemut ônartitauvlutik.

¹² Harfiniglo ᴋellularaniglo ᴋillautiniglo nipjautiniglo vainemiglo ᴋuviasûteᴋarput, Nâlekab piniarningit kamaginagit aggangitalo sullijangit takkonârnagit.

¹³ Taimaimat inuᴋotikka aulartitauliaᴋijomârput, ivlerijaujullo tâpkonanẽtut kâdlaromârput, inungillo unudlartut ᴋêleromârput.

¹⁴ Taimaimat anernerit inningata pijomatunine angijorortipâ, ᴋaninelo aitarpâ angijoᴋsoarmik, (Zioniblo) ivlerijangit inungillo unudlartut ᴋuksalaitullo ᴋuviasukpaktullo takanunga aᴋᴋalerput.

¹⁵ Tagva inuit suksaujungnairtitaujomârput angutaujullo nallopᴋotijariaᴋartitaujomârput, piojorijutitullo tautusôngojut kattalungatitaujomârput.

¹⁶ Kilangmiugasaksuille Nâlegangat nertornartitsomârpoᴋ erᴋartuinerminut, Gûdelo ivsornaitoᴋsôjoᴋ ivsornaititsomârpoᴋ idluarsainerminut.

¹⁷ Saugârᴋallo iviksukasioromârput nerᴋiksarsiorviᴋarlutik (tagvane), angusalluarsuillo nerᴋiksarsioromârput akluitut innigijaviningine.

¹⁸ Kappianarmêk amuasût idluitomik aklunâtigut nãmangitullivlutik, ajortomiglo uniutatigut sôrlo.

¹⁹ Oᴋauseᴋartut imâk: Tuavilune piniasârle, piniaraksaminik takkurᴋovluta, ivlernartitublo Israêlikkune kajusijutigijanga ᴋaglilerle tikkisarailunelo, tukkiserᴋovluta tamattominga.

²⁰ Kappianarmêk idluitomik idluartôneraijut idluartomiglo idluitôneraijut tâᴋtomik ᴋaumajônasugiklertut ᴋaumajomiglo tâᴋtônasugiklertut, sêrnartomik mamarasugiklertut mamartomiglo sêrnarasugiklertut.

²¹ Kappianarmêk illisimanasugijut sillatonasugijullo.

²² Kappianarmêk vainemik imertovaktut illisimajullo imiksaliornermik tallanartomik,

²³ Idluitullijunik passijaksaujungnairtitsijut pilliusiat pitjutigivlugit idluartullijullo aᴋsârlugit idluarningannik.

²⁴ Tamanna pivlugo, sôrlo ikkomab ikkoalajub ivivinît nungungmagit, sôrlolo iviksukat pannertut ikkoalajut ochongmatta, taimaktauᴋ taipkoa amângat auniojomârpoᴋ nuvugulângillo sanniktut tiktaujomârput, ᴋilangmiugasaksuit Nâlegangata perᴋojangit kamagingimagit, ivlernartitublo Israêlikkune oᴋausingit nachogingmagit.

²⁵ Taimaimat Nãlegaᴋ katsungaitomik ningalerpoᴋ inuᴋotiminut, agganelo issakpait tâpkonunga, pattakpaillo, ᴋaᴋᴋat sajukpiluktillugit timingillo toᴋungajut aktarlukkutitut egidlugit apᴋosinermut.

²⁶ Saimaseromârpoᴋ kattilerutiksaujomik nallojunut ungasiktomẽtunut, taipkoalo ᴋairᴋojomârpait nunaᴋsûb kiglinganit. Ahâglo, tuavidlarlutik akpangeromârput ômunga.

²⁷ Taipkoale akkornganne merngortortoᴋaromângilaᴋ naukiutijoᴋaranelo, sikkungijoᴋaromângilaᴋ siniktoᴋaranelo; tapserutingit pêromângilat, ittigagutingita singingit kiktoraromângilat.

²⁸ Kargjungit ipikput, pittiksingillo illũnatik noᴋarsimavut. Horseᴋotingita kukkiujangit ᴋairtotut illingarᴋôrput ᴋamutingitalo aksalloangit aᴋᴋunaᴋsoatut.

²⁹ Nipliadlarput loevititut, nipliavut loeviaraᴋtitut, kallingoarlutik aᴋsârnigarijatik tiguvait angerautivlugillo tigujiniktoᴋangilarlo.

³⁰ Nalliutomelo tamattomane iktullijâdlaromârput (Israêlitinut), sôrlo imarbiksoaᴋ iktullijârmat. Nuna ullernaigijaulerpat, ahâk tâᴋtoᴋ kappianartoᴋ, ᴋaumajorlo takpânẽtoᴋ ᴋaumajungnairpoᴋ nuvujanut.