Jesaiase 49 - Labrador Inuttitut Heritage Bible

Gûdib kivganganik. Israêlitit nâpkigijauningannik.

¹ Tussalersinga ᴋikkertamiôjose, nunaᴋatigêktoselo ungasiktome kamatsialeritse. Nâlekab ᴋairᴋovânga nutaraunimnit; anânama timingata illuanẽtillunga sulle attera erᴋaumavâ.

² Kaneralo saviksoatut ipiktotut illingatipâ, aggame tachalininganut ijertorpânga, kẽnariktomik ᴋargjungortipânga, ᴋargjoᴋautiminelo ijertorpânga.

³ Oᴋautivângalo: Kivgarivagit, Israêle, illingne nertornarsilerpunga.

⁴ Uvangale oᴋarpunga: Sullitsananga sullijaksaᴋadlarpunga, nukkimniglo nungutsinerdlukpunga suksaunanga. Sullele erᴋartortaujutiksara Nâlekamẽpoᴋ, akkilertaujutiksaralo Gûdimnẽpoᴋ.

⁵ Mãnalo oᴋarpoᴋ Nâlegaᴋ nutaraunimnit pijoᴋ uvamnik kivgarijomavlunga, Jâkokkunik sâgiartitserᴋovlugo tâpsomunga, Israêlitillo kattersortaurᴋovlugit — taimaidlungalo nertornarpunga Nâlekab sângane, Gûdigalo pitsartutigivara —

⁶ Oᴋarporlo: Nãmangilaᴋ, kivgarigapkit kinguvarêt Jâkokkut makkitillugit torᴋortaumajullo Israêlikkunit uttertingmivlugit, ᴋaumaksaijungortipagittauᴋ nallojunut, piuliklerutigivlutit sillaᴋsûb kiglinganut.

⁷ Nâlegaᴋ, Israêlib piulijinga ivlernartitoᴋ oᴋarpoᴋ imâk tarnilît nachogijangannut, inuit maᴋojugijangannut, attaniâluit kivgangannut: Attanersuit takonâromârput nikkovilutiglo, attanerillo pâmakteromarput Nâlegaᴋ nertornartoᴋ pivlugo, ivlernartitoᴋ Israêlikkune pivlugo illingnik anerosuktoᴋ.

⁸ Nâlegaᴋ oᴋarpoᴋ imâk: Tussarpagit nalliutome saimarsaivingme ikajorlutillo uvlorme piulijauvingme; serngnigijomavlutillo angerutigijaujotut illingatipagit inuit akkornganne, nunamik idluarsairᴋovlutit, kingormgutijaksaniglo asserortaumajunik aitortuilerᴋovlutit.

⁹ Oᴋarᴋovlutit parngnanairsimavingmẽtunut: annititse! tâᴋsiortunullo: saᴋᴋeritse! Apᴋosinerne nerᴋiksarsijomârput, ᴋaᴋᴋârulangnelo tamaine nerrimârviksaᴋaromârput.

¹⁰ Kâgomângilat imerulugatiglo, kiangmullõnêt seᴋinermullõnêt pijaujomângilat, nâpkigijingata pairijomârmagit tassiorlugit imernut puilajunut.

¹¹ Kaᴋᴋakka tamaita apᴋutiksautitsomârpakka, apᴋosinikkalo maniksidlaromârput.

¹² Ahâk, ukkoa ungasiktomit tikkitsomârput; ahâglo, ukkoa avangat imarbingmillo, ukkoalo Sinît nunangannit.

¹³ Kilait illipse, opigosugitse! nunaᴋsoaᴋ igvit, ᴋuviasugit! ᴋaᴋᴋat illipse iggiaᴋomijaritse! Nâlekab inuᴋotine manigormagit ajulertoᴋotinelo nâpkigingmagit.

¹⁴ Zionele oᴋarpoᴋ: Gûdib ᴋemakpânga, Nâlekab puigorpânga.

¹⁵ Arnab nutarane puigorungnaralloarᴋaûk, erniarijane nâpkiginago? Tâpsoma puigorungnaralloarpagolõnêt, uvanga puigutsangilagit.

¹⁶ Ahâk, ittimamnut aglakpagit, avaluᴋotitit sâmnêtsainarput.

¹⁷ Kitorngatit tuavitsomârput, illingnik serᴋomitsijut asseroijullo aularomârput illingnit.

¹⁸ Ijîkik uitarlugik avatingnẽtunik takonârit; tâpkoa kattimajut illũnatik nallipsarpâtit. Sôrlo nallâgut inôgama, oᴋarpoᴋ Nâlegaᴋ, tâpkoa tamaita attijomârpattit ânanausijutiksatut sôrlo, tapserutigivlugillo nulliaksatut sôrlo.

¹⁹ Nunat inuerutijoᴋ asserortaumajorlo serᴋomitaujorlo nalliutome tamattomane mikkiluaromârpoᴋ inungnut, asseroijullo illingnik ungasikput.

²⁰ Kitorngatillo assine erniangomajut tussartillutit oᴋaromârput: Nerrokiluarpoᴋ inniksara, nũgalagit, inniksaᴋarᴋovlunga.

²¹ Omatingnelo oᴋauseᴋaromârpotit tagva imâk: Kia ukkoninga ernertârtipângâ ᴋitorngaerutijunga, ᴋitorngisuitunga, pingujartaujunga, nũsimajunga? Kialo ukkoa inugoivagît uvamnut? Ahâk, kissima amiakôlauᴋpunga; ukkoale nanẽlauᴋât?

²² Imâk oᴋarpoᴋ Nâlegaᴋ Gûde: Ahâk, aggamnut nallojut nulloraromârpakka, nunaᴋatigêksoarnullo saimaseromârpunga kattilerutiksaujomik, tagva ernitit sârdliarlugit panitillo erᴋsuklugit tamaungartitsomârpait.

²³ Attanersuillo pairijigijomârpattit, attaniojullo nulliangit amâmaktitigijomârpattit. Pûtsomârput nunamut sângne, ittikavillo sanningit alluktoromârpait. Tagva missigijomârpotit, uvanga Nâlegaugama, tâpsomingalo nerriuktut kangusuktitautsangimatta.

²⁴ Sangijoᴋsoaᴋ aᴋsârtaujungnarᴋâ piminik? ubvalo parngnanairsimavingmẽtut annijungnarᴋât, idluartôgamik?

²⁵ Imâgle Nâlegaᴋ oᴋarpoᴋ: Illâle! sangijoᴋsaoᴋ aᴋsârtaujomârpoᴋ parngnanairsortaurᴋojaminik, pimmariutertub aᴋsârnigarijangit annijomârput; akkerartortitit uvanga akkerartoromârpakka, ᴋitorngatillo uvanga piulijomârpakka.

²⁶ Aksorôtjijut illingnik nerrerᴋojomârpakka uvinimingnik, aungmingnullo tallatitaurᴋojomârpakka sôrlo vainemut nutâmut, uviniggillo illũnamatsiatik tukkisijuksauvut, uvanga Nâlegaugama piulijit, ᴋellujit, ajugaᴋangitôjoᴋ Jâkokkune.