Jesaiase 47 - Labrador Inuttitut Heritage Bible

Bâbelib asserortauninganik

¹ Akkarit sanningnullo ingitit, uigasuk igvit, Bâbelib pannia; iksivautaᴋarungnairlutit ivjomut ingitit, Kaldêarit panningat. Maitomik nikkanartomiglo taijaksaungilatit kingorngagut.

² Serᴋalitsivik tiguvlugo sannaugaliorit, kênailitat pêjaruk, annorât ᴋugvartiuk, niûkik annoraijarlugik imakôrit.

³ Kangusûtiksat saᴋᴋijârtuksauvoᴋ, kangunarnit takuksaurᴋovlugo. Akkiniaromavunga, inuit nalliallõnêt nikkaginago.

⁴ Piulijivut tâmnauvoᴋ, ᴋilangmiugasaksuit Nâlegangat tagva attinga, ivlernartitoᴋ Israêlikkune.

⁵ Nippangerlutit ingitit, tâᴋsoamullo ailerit, igvit Kaldêarit panningat, arnamik attaniovingnut attaniojomik taijaksaungilatit kingorngagut.

⁶ Inuᴋotikka ningaumavigivlugit kingormgutijakkalo ivlerijungnairlugit aggangnut tunigapkit, takopsoajuipotit taipkonunga, inutoᴋaujut oᴋumailuartomik perᴋovattit.

⁷ Issumaᴋarlutillo imâk: Soraijuitomik attaniovunga. Tagva tamakkoa õmamiutaringilattit issumaksarsiorutiginagillo kinguniksangit.

⁸ Taimaimat, mattominga tussarᴋovagit mãna, igvit ikligosuktotit, terliklutit inôjotit, oᴋauseᴋartotillo õmatingne: Uvangauvunga, uvaptut-itoᴋangilaᴋ. Uigarniojomâtsangilanga, ᴋitorngairutinermik tukkisijomângilanga.

⁹ Kissianele tamakkungnunga tamangnut tikkitaujomârpotit tagvainaᴋ uvlorme attausẽnarme; ᴋitorngaerutivlutit uigarniojomârpotit, illa tamakkungnunga tikkitaummarigomârpotit, angakkoᴋaluaralloartillugo elisêniartoᴋaluaralloartillugolo sôngojunik illingne.

¹⁰ Pingijaitoᴋsônit tattigivat issumaᴋarlutit: Takunârtoᴋangilaᴋ uvamnik. Illisimanivit sillatunivillo uivêringmattit, õmatikkut oᴋarpotit: Uvangauvunga, uvaptut-itoᴋangilaᴋ.

¹¹ Taimaimat, ᴋanoetub tikkitsomârpâtit, pêrlugolo ᴋanoᴋ nallojomârpat; asseroijub tupvigijomârpâtit, saimarlugolo ajoromârpat; tagvainaᴋ nungutitsijub tikkitsomârpâtit, mallugosurᴋârtinak taimak.

¹² Attê! saᴋᴋijâtuinarit elisêniartoᴋotitit angakkoᴋotitillo unuktovaksuit illagivlugit, taipkoa inôsungnernit illungertûtigigangne! Sullitsiarungnarpalukpotit imaᴋâ ajugauvlutit.

¹³ Issumaksarsioᴋattarlutille merngortulerpotit. Ikajoriartorlit tagva illisimajut ᴋilaub illinganinganik, uvlorianik ullernaituivaktut, pijomârtuksanik illingnut oᴋasôngojut, taᴋᴋeᴋ angmalorilerangat.

¹⁴ Ahâk, iviktitut-iput, ikkomamut nungutauvut, inôsitik ikkomaᴋsoamit piulivlugit sapperpait, ikkomaᴋsoaᴋ tamanna kitjaᴋejârviksaungimat, ikkomablo avatâ iksivaviksaungilaᴋ.

¹⁵ Taimailingavut illungertûtigijattit taipkoa. Tujormiat niuvervigijatit inôsungnernit attunit ᴋemâvut inniksamingnut, piuliklerteᴋangilatit.