Jesaiase 46 - Labrador Inuttitut Heritage Bible

Gûdingoanik.

¹ Bele pâmangavoᴋ, Nêbo ochosimavoᴋ, adsingoangit nergjutinut nujuartunut nergjuteᴋotinullo pititauvut, (Gûdingoat) nangmaᴋattartase ussijauvut, merngortortunut (nergjutinut) ussijauvlutik.

² Ochosimavuk illa pâmangavlutiglo attautsekut, ussiksat piulivlugit sapperpait, nangmineᴋ parngnanairsimavingmut aijuksauvuk.

³ Jâkokkut illipse, tussalersinga, illipselo Israêlitit amiakungit! erᴋsuktaujose uvamnut anânapse timingata illuanẽnipsingnit, nangmartaujoselo uvamnut nutaraunipsingnit.

⁴ Uvanga tâmnautsainarpunga inutoᴋaunipsingnut aglât, ᴋêrtolerluse uvanga erᴋsukpapse. Uvanga taimailiorpunga, uvanga nangmarpapse, uvanga erᴋsukpapse piulivluselo.

⁵ Kinamik adseᴋartitsomavisingâ, adsiliortillunga tâpsomunga? Kinamut adsigênasugivisingâ?

⁶ Taipkoa goldemik navitsivut pôngmit, silberemiglo ôktûtinut ôktorput; goldelerijoᴋ akkilerpât, Gûdingoamik sanarᴋovlugo. Tâmnalo sêrᴋortorvigivlugo tuksiarvigivât.

⁷ Kivikpât tuimingnut, erᴋsuklugolo inniksanganut illivât. Tagvane ᴋikkarpoᴋ inniminit nũtsanane. Nipliaviogalloarune, kiotsangilaᴋ, kappiasungningannillo piulitsangilait.

⁸ Tamattominga erᴋaileritse aulajungnangerluselo, tamanna õmamiutarisiuk, tappatojose illipse!

⁹ Itsarnitat, mattoma sivorngagut pijoᴋartut erᴋaumalersigik! Uvanga Gûdeovunga, assimniglo peᴋangilaᴋ, Gûdeovunga, uvaptut-itoᴋangilaᴋ.

¹⁰ Pigiarnermit ᴋaujijautitsigêrpunga kingorngane pijomârtuksanik, sivorngagullo ᴋaujijautillugit nalliutilungitut sulle; oᴋartungalo: Kajusimautigijara soᴋᴋoserniatsangilaᴋ, idluarijakka tamaita nãmaksitipakka.

¹¹ Tingmiarsoaᴋ ᴋairᴋovara seᴋinerub nuivianit angullo kajusimautigijaminik piniartoᴋ nunamit ungasiktomit. Oᴋautigijamnik nallautsititsivunga, issumagijamnik piniarpungatauᴋ.

¹² Tussalersinga, õmateᴋartose sittijunik, ungasiktose idluarnermit.

¹³ Idluarsaiviksara ᴋannitomut pitipara, ungasigungnairpoᴋ; piuliklerviksara mullutsangilaᴋ. Piuliklerteojomârpunga Zioneme Israêlelo ânanausilerlugo.